Read Pochuri Naga KÜREIHIRI 103 Bible Online

KÜREIHIRI 103 - Pochuri Naga bible

KÜREIHIRI 103

¹VÜWA tsiatsüluo, O eh kürholi; thi eh lovü kütü aveh nga, ma kümtse nyowa tsiatsüluo!

²VÜWA tsiatsüluo, O eh sietse, thi ma zakütsakünyia ri aveh müküma tüm,

³noh künakhie aveh noküjatüwa, ma tü noh küna aveh sakümhie veh,

⁴ma nüh küphieke vünüh noh kürho rhesatsü, ma nüh mükükhaphrükhale küümze, thi noküümze vi noh kajilüwe viküvü,

⁵noh kürho küju ma nüh kümhie vi noh losaküra tsü, jüta küsa vünüh noh küviza tü, aluomü üta sakürüthe tsü.

⁶VÜWA tü künyitsa vünüh küüroh veh, thi mürüküvehri aveh kenüh kümshowa küüroh veh.

⁷Ma nüh ma lehri Mosa vü saküthsümthuoh, ma küürohküliri Israel nyiri vü saküthsümthuoh.

⁸ VÜWA tü lonashehm thi lozhishehm, arümshunyi thi mükükhaphrükhale küümze vü wuhzhi

⁹Ma tü tsotho aveh vü küphrawanyu, nyutü ma tü ma rüküshu küsuokürho küpeh wa nyu.

¹⁰Ma tü hiri kükhiemuo müzhe nü hiri vü küsawa nyu, nyutü hiri künakhieri müzhe nü amüthoh küsawa nyu,

¹¹küpakenühnyunü atülü tü, azhihwa nyieh vünüh müsie küm kenüh, ma mükükhaphrükhale külo tü ma kükrüri vü ji shehm;

¹²zhietu vünüh zhieshu thake, jüthake ma nüh hiri küphrürieri vija küm sa.

¹³Apa küsü nüh ma tsa noküümze kümjie, jükümjie VÜWA nüh ma kükrüri tü nokümze veh,

¹⁴küpakenühnyunü ma tü hiri atsonyie thsüküveh kenüh; ma nüh hiri tü azhitho ta müsheke küveh kenüh.

¹⁵Anyiri kenüh thuoüji, ma rülori tü apra kümjie wie; azhuh vü aküwu küsü üta rhoveh;

¹⁶küpakenühnyunü amürhü tü, jüma nyiehvü mürhüwa, thi tewathuoh, thi jüma ape tü müthsü le thuoh.

¹⁷Thitü VÜWA mükükhaphrükhale küümze tü, küsuokürho vünüh küsuokürho küju, ma kükrüri rügivü, thi ma künyitsa tü atsari vünüh atsari küju,

¹⁸ma kütsathuo küsari vü, thi ma nüh azhükütsüri müshe nü küsari.

¹⁹VÜWA tü ma kükajipe atülüri vü vishumthuoh, thi ma kajipe tü aveh vü takrü veh.

²⁰VÜWA tsiatsüluo, O nohri ma zhühleri, nohri kükhrari ma zhü küsari, ma zhü jikhi vü küna nü!

²¹VÜWA tsiatsüluo, ma shiejiri aveh, ma müshe küsa ma nasari!

²²VÜWA tsiatsüluo, ma küürohri aveh, ma nüh kükhraviküveh azhie aveh vü. VÜWA tsiatsüluo, O eh kürholi!