Read Pochuri Naga KÜREIHIRI 105 Bible Online

KÜREIHIRI 105 - Pochuri Naga bible

KÜREIHIRI 105

¹O VÜWA vü kümna tsüluo, ma nyo ji luo, nyiri azavü ma küürohkülih sakütsaluo!

²Ma vü azah satsüluo, ma vü küsiake zah satsüluo, ma küngo küürohri aveh küza luo!

³Ma kümtse nyo vü kütholathovü saluo; VÜWA küphara luovehri tü nyieraküükhruo luo!

⁴VÜWA thi ma kümzho phah luo, mükütuo tü ma küpeh phah luo!

⁵Ma nüh küngo küüroh saküsari müsheke luo, ma küükrükükrari, thi ma povü nüh küshu ashihzhüri,

⁶O ma siepe Abraham tsatoriwa, Jacob tsari, ma nüh rüka kümri!

⁷Ma tü VÜWA hiri Saküüwuowa; ma lesari tü azhih aveh vü pehveh.

⁸Ma tü küsuokürho ma kütsathuo müshephohke, ma nüh azhükütsü azhüwa wuhleri anyie küsü kenüh,

⁹ kütsathuo ma nüh Abraham sie saküsawa, Isaac vü ma küüshie küphrahzhu,

¹⁰ma nüh Jacob vü azhühkhe küsü kümjie vünüh, Israel vü küsükürho kütsathuo küsü kümjie vünüh,

¹¹“Hi nüh noh vü Kanan zhih tsü naveh, akaküvi kümjie vünüh, noh müthoh tsü naveh,” ti küza.

¹²Mari tü küzüla tsotho vü, zülasheh wie, thi jüla aküpriri sa,

¹³Akuohji küsü vünüh akuoküji küsü vü, kajipe küsü vünüh anyi küpawa vü tse wa,

¹⁴ma nüh nyi küsü nga mari müküümrü; makeri’a nüh ma nüh kajiri shüke,

¹⁵Hi nüh thsekümri müpa tüm, eh setsaküthsüri vü kümnomna mtsütüm, ti küza!

¹⁶Ma nüh azhih rügivü kümkhuojih küjizhuh vü, thi alohse rükütsüh aveh zoshi khehmtü,

¹⁷mari atüvü ma nüh nyi küsü küze, Josef, atükha küsü kümjie zhu küüzewa.

¹⁸Ma mpha tü amürü nüh akürü kieveh, ma ku tü amürü kümkie küsü lovü thse;

¹⁹ma nüh mowa küza nüh müjie küru küju nü VÜWA zhü tü ma müte.

²⁰ Kajiwa nüh küze nü ma küshu, anyira takrüwa nüh ma sakürüzihtsü;

²¹ma nüh ma zheh vü ma tü avü küsa, thi ma zhi aveh vü takrü küüsa,

²²ma loküzhe vünüh ma kajitsari süphienta, thi ma kükhruori vü kümtsa sosienta.

²³Jüti küsa vü Israel tü Egypt vü ru; Jacob tü Ham zhih vü aküpriri sarho.

²⁴ Thi VÜWA nüh ma nyiri aviküpeshehtsü, thi mari küümaküshiri nyiehvü nüh, mari sakümzho tsü.

²⁵Ma nyiri kümrhü nta ma nüh, mari luoveh sakürele tsü, ma sieperi sie aromhie sheh nta.

²⁶Ma nüh ma siepewa Mosa, thi ma nüh kürükawa Aron küze.

²⁷Mari azavü ma thsoshiwa mari nüh küroh, thi Ham zhih vü küükrükükra küüroh sa.

²⁸ Ma nüh aküzo küze, thi azhihwa saküzo; mari nüh ma zhüri müküna nüh sam.

²⁹ Ma nüh mari ajuh azüh saküjemtü, thi mari anga saküsüm tü.

³⁰ Mari zhih tü awuh vi saküpromtü, mari kajira zekuri vü wie nga.

³¹ Ma nüh phrahte, thinü wiezü küüzhüh ru, thi mari nyuji aveh vü wiezüri ru.

³² Atsohkürü müthoh vünüh ma nüh, mari vü arazhi tsü, thi mari azhih aveh vü atsohrie küürieh.

³³Ma nüh mari rhelivi rhuri, thi ampah rhuri kürhie, thi mari nyuji thsohri feriem thuoh.

³⁴Ma nüh phrahte, thinü akriema ru, thi ashukrie kükalari müküchierhüra ru;

³⁵mari zhih vü renyawa aveh jümari nüh zorie khehm, thi mari zhito vü athsoviri tsa kümtsem tü.

³⁶ Mari zhih vü küwuo khuri aveh kürhiethe khehm, mari kümzho vünüh küshu pokhuri aveh.

³⁷Jüti sanü ma nüh rakasa thi suna vi Israel sie shu, thi ma kuohri azhievü nyi küsü nga ajih mümshü.

³⁸Mari tsezhuteküwa vü Egypt tü alowie, küpakenühnyunü jümara kükrüshike tü, jümawa vü küturu kenüh.

³⁹ Kühiete kenüh ma nüh akülu küsü shohkütara, thi arüza vü wie na küsa kenüh anyih tsü.

⁴⁰ Mari nüh khuo, thi ma nüh amüwa küze, thi atülü vünüh alohse küüsheküsha vi mari tsü.

⁴¹ Ma nüh alokrü satsü, thinü ajuh puzhuru; jüma tü arühku kümjie küpohu vü liwa,

⁴²küpakenühnyunü ma tü ma kümtse phrahzhu kütsü, thi ma siepewa Abraham kümsheke kenüh.

⁴³Jüti sanü ma nüh ma nyiri siezhutaji, azah sanü ma nüh kürükari sie shu.

⁴⁴ Thi ma nüh akuoküjira zhihri vi mari tsü; thi mari nüh anyira küürohkükhra avi suoperi vitewa,

⁴⁵Küpote küju mari tü, ma zhühkhewa müsaji mükümhie kenüh, thi ma khonyori müshe. VÜWA siake!