Read Pochuri Naga KÜREIHIRI 107 Bible Online

KÜREIHIRI 107 - Pochuri Naga bible

KÜREIHIRI 107

¹ O VÜWA vü kümna tsüluo, küpakenühnyunü ma tü kümhie kenüh; ma mükükhaphrükhale küümze tü, küsuokürho küzhike küveh kenüh!

²VÜWA nüh kürhehsari tü jüti küüzawa saluo; jümari tü ma nüh küsühro vünüh kürhehsari kheh,

³thi azhihwa vünüh vizhuhke, zhieshu vünüh thi zhietu vünüh, zhiehseh vünüh thi zhiehtü vünüh.

⁴Wuori thuoüji küpohu jakümri vü tsetewa, kürhora anyuji lehkhuji mphahra nüh sa;

⁵rüma thi kürieh, mari azhie vü mari kürholi tü thasütewa.

⁶Thinü mari küsühro vünüh mari tü VÜWA vü zie, thi ma nüh mari müshekümnomna vünüh mari vizhu;

⁷ma nüh aleh kümsho vünüh mari siewa, mari nüh kürho anyujiwa müjie küju nü.

⁸VÜWA mükükhaphrükhale küümzewa kenüh, mari tü ma küüsiakeluo, ma kükrüküngo küürohri kenüh anyira tsari vü!

⁹küpakenühnyunü ma nüh ajuhküüriehwa alosaküra küveh kenüh, thi zanyo kümhie vi kürümawa saküprotsü veh.

¹⁰Wuori nü aküzo vü thi küsüpe vü shupeh, aküsiküsari tü kümnomna, thi amürüri vü shupeh,

¹¹küpakenühnyunü mari nüh, Saküüwuowa zhüri küruohluo kenüh, thi kümsietsawa kümshe müshüjaküm kenüh.

¹²Mari luoveh tü küüroh kükho vi küngietsuo; mari tü nyi küsü nga nüh, mari küükra münyie nüh külum.

¹³Jüti küsa vü mari tü, mari küsühro vünüh VÜWA vü zie, thi mari müshekümnomna vünüh ma nüh mari vizhu,

¹⁴ma nüh aküzo vünüh, thi aküsü vünüh alievü vizhu, thi mari küphehteri zothuoriejamtü.

¹⁵Ma mükükhaphrükhale küümze kenüh, mari tü VÜWA kümna küütsüluo, anyira tsari vü ma küngo küürohri kenüh!

¹⁶küpakenühnyunü ma nüh, mürü mükhieri zokhurie, thi mürü rüpe tehthuo künyi samtü.

¹⁷Wuori thuoüji mari kükhiemuole aleh khuji kenüh naküm sa, thi mari künakhieri kenüh kümnomna setu;

¹⁸mari tü ashie muomuo wienga nyakuotewa, thi mari tü aküsü kheriri vü shehnyitewa.

¹⁹Thinü mari tü mari küsühro vünüh VÜWA vü zie, thi ma nüh mari müshekümnomna vünüh mari vizhu;

²⁰ma zhü küze nü mari sakümhie, thi küzorie vünüh mari vizhu.

²¹Mari tü VÜWA mükükhaphrükhale küümzewa kenüh, ma vü kümna küütsüluo, anyira tsari vü ma küngo küürohri kenüh!

²²Thi mari tü kümnakütsü küsahthuo kükhurü küüsaluo, thi loküzhe küreihiri vünüh ma küürohkülihri küza luo!

²³Wuori thuoüji ajuhieri vünüh juhküji vü tetsuo, aküji juhri vünüh asü sa;

²⁴mari tü VÜWA küürohküliri ngu, aküsheh vü ma küngo küürohri,

²⁵küpakenühnyunü ma nüh azhütsü, thi tsohmürhü saküsühra, jüma nüh juhküji küüshühri sakütoke.

²⁶Jümari tü atülü vü kuo, jümari tü aküshehlori vü tse tsuo; mari luovehküji tü mari kümsü tsotho vünüh ratewa,

²⁷mari tü kümshe nyiri kümjie, puozhipuoluo thi puolepuoza, thi mari kümshe vü pohtem.

²⁸Jüti sanü mari tü, mari küsühro vünüh VÜWA vü zie, thi mari müshekümnomna vünüh ma nüh mari vizhu;

²⁹ma nüh tsohmrhü saküüzohm, thi juhküji küüshühri tü saküüzohm

³⁰Jüti küsa vü mari tü alowie, küpakenühnyunü mari nüh küzohküm kenüh, thi ma nüh mari sie mari kümngu, kümnyiepe vü ru.

³¹Ma mükükhaphrükhale küümze kenüh, mari tü VÜWA küüsiakeluo, anyira tsari vü ma küngo küürohri kenüh!

³²Mari tü anyira ashieji vünüh ma khake luo, thi kükhruora kümhu vünüh ma siakeluo.

³³Ma nüh arühguri tü küpohu vü saküüreleleti, juwi juhri tü küürie azhito vü küreleleti,

³⁴avi khielota küpe azhih vünüh, amütsü tsama zhih satewa, ma kümsüküsa arhie kenüh.

³⁵Ma nüh küpohu vünüh ajuh kümsheke saküjemtü, nyihküm azhih vünüh juwi juhküshu saküjemtü.

³⁶Thi ma nüh kürümari tü jüla küürho sa, thi mari nüh jülo vü kürho nyuji vishu;

³⁷mari tü azhuhri vü zhuh, thi rheliviri shie, thi avi khielota küpe la.

³⁸Ma kütsia vünüh mari tü saküzhi küjisheh; thi ma nüh mari seshuh züla müküze.

³⁹Mari sakütsuo thi vi saküsaji küma vü, kümrü, küsühro thi luovehküna vünüh,

⁴⁰ma nüh kajitsari rügivü momakütalo küshoke tsü veh thi lekhuji mükünyuri vü mari tse küüzezeti;

⁴¹thitü ma nüh küthohtsari kümnomna vünüh viküsühra veh, thi mari tharuori tü anyihnyihriehkhuori kümjie satsü veh,

⁴²kümshori tü jüma ngu nü alowie veh; thi kümsüküsari aveh tü, mari apo khete tü veh.

⁴³Thawa nüh thsü veh ünüh, ma tü zanyo hamari vü kükheke luo; anyiri tü VÜWA mükükhaphrükhale küümze kümshenoluo.