Read Pochuri Naga KÜREIHIRI 109 Bible Online

KÜREIHIRI 109 - Pochuri Naga bible

KÜREIHIRI 109

¹Zoti müpeh tümluo, O küsiake Saküüwuowa!

²küpakenühnyunü kümsüküsa thi kürieriekhri apo tü, ka nü hi sie saluo veh, akürie müzhiri vi phrahte nü hi sie ruohluo veh.

³Mari nüh kümrhü azhüri vi hi mükieke, thi ma zhühnyo münyie nüh hi ro.

⁴Eh küümze mari tsünüh mari tü hi shele küjo, hi nüh makeri’a nüh kükhuo sa wie ketünga.

⁵Jükenüh mari nüh kümhiewa kenüh, kümsü vi eh jisuo satsü, thi eh küümze kenüh kümrhü vi eh jisuo satsü,

⁶kümsüküsari küsü hi vü küüzeluo; ma küüjori küsü nüh ma küümte luo.

⁷Ma tü kümteno mthuoüji, ma tü küsazih vü küürum luo; ma kükhuo tü kükhimuo ti chiekem luo!

⁸ Ma rülori tü küüzülam tüluo; küpari nüh ma zanyo küüprüm luo!

⁹Ma tsari tü apa mükünyieri küüsam luo, thi ma vüvüh tü küütünyim luo!

¹⁰Ma tsari tü tseletseza nü khuo küütse luo; mari arhie küferie vünüh zhezhu küja saluo!

¹¹Ma nüh küpeh aveh tü aphreküpehri nüh, revi küüzekhehm luo; anyitheri nüh ma nüh, küürohkükho küsa aviri aveh müzhüvi luo!

¹²Nyi küsü nga nüh ma vü kürnyi mükütsa tümluo, nyutü atsa apa mükünyieri nomküümze tümluo!

¹³Ma kütsarhienyurhie tü tethuomtüluo; ma nyo tü wuhle künyiawa vü vijakümwa saluo!

¹⁴Ma para künakhie tü VÜWA tüvü küümshekem luo, thi ma zah kükhiemuo tü vi müküja tümluo!

¹⁵Jümari tü mükütuo wie thuoh nüh, VÜWA tüvü küüpehm luo; thi azhih vünüh ma seküsa tü küütethuom luo!

¹⁶küpakenühnyunü kürnyi kütsana küsa ma nüh, mükümsheke kenüh, thitü kümkhuori thi küthotsari, thi luovehkuokümri mari küsü küju zhewa.

¹⁷Ma tü kümzü lom; kümzü tü ma vü küürum luo! Ma tü akütsia mülo; jüma tü ma vünüh küületsuom luo!

¹⁸Ma tü kümzü vi küsazhe kruzhu kümjie vi küzhum, jüma tü ma sümo vü ajuh kümjie küüjiem luo, thi avüjuh kümjie ma rüri vü küüjiem luo!

¹⁹Jümatü ma nüh thsünyawa vi ma kütiehte kümjie, ma küütiehte luo, rülotsotho kütsekevüh vi nü, ma kütseke kümjie ma kütseke luo!

²⁰VÜWA vünüh hamatü hi küüjori jisuo küsaluo, eh kürho vü kümsü phrahte kütsera jisuo küüsaluo!

²¹Thitü noh tü, O Saküüwuowa VÜWA, noh nyo rieh vünüh eh mütho sanü sieküroluo; küpakenühnyunü noh mükükhaphrükhale küümze tü, mhieküm kenüh, hi vizhu luo!

²²küpakenühnyunü hi tü mükhuo thi thohtsaküm kenüh, thi eh luoveh tü eh lovü nüh münomna mthuoh.

²³Hi tü tewathuoh, münüleh vü arüzhe kümjie; hi tü ashukrie küsü kümjie küzhühjamthuoh.

²⁴Assa küsa vünüh eh kho tü thasümthuoh; eh satsa nga satü tsikükhriekhriethuoh.

²⁵Hi tü eh küüjori vü müküchieküzhü zanyo küsü samthuoh; mari nüh hi küngu vü, mari tü mari alü küzezeti.

²⁶Hi kükratsüluo, O VÜWA eh Saküüwuowa! noh mükükhaphrükhale küümze müzhe nü hi külole luo!

²⁷Hamatü noh ke ti küsa mari nüh küthsüluo; noh nüh, O VÜWA, jüma samthuoh!

²⁸Mari tü küümzüm luo, thitü noh thuoüji kütsiaküüvü luo! hi kümnomna kütsüri tü küzükrü vü thsem luo; noh siepewa tü alowiem luo!

²⁹Hi küüjori tü müküchiekürhe vi küüzhum luo; mari tü athsü küsü nüh kütiehte kümjie, mari mpa mari küzükrü nüh kütietem luo?

³⁰Eh po vi nü VÜWA vü hi nüh kümna küji tsü naveh; kükajipe azhievü nüh hi nüh ma siake naveh.

³¹Küpakenühnyunü ma nüh, küthotsara ke azhiewuovü tsie küveh kenüh, küüsü nta ma mshekümsüri vünüh ma külole nta.