Read Pochuri Naga KÜREIHIRI 116 Bible Online

KÜREIHIRI 116 - Pochuri Naga bible

KÜREIHIRI 116

¹Hi tü Vüwa lom, küpakenühnyunü ma nüh eh jikhi, thi hi nüh zhiekekükhuo küna kümtüthuoh kenüh,

²küpakenühnyunü ma nüh hi vü ma khüna küümrheke kenüh, jükenüh eh kürho küju hi tü ma ji naveh.

³Aküsü kükrü nüh hi mükieshemthuoh; küsürazhie künari nüh hi shohtemthuoh; hi tü müshemnomna thi müshekümnomna vünüh münomnamthuoh.

⁴Jüti küsa vü hi nüh VÜWA nyo ji taji: “O VÜWA, hi nüh noh vü khopeke veh,” ti sa.

⁵Külozhisheh, thi künyitsa tü VÜWA; hiri Saküüwuowa tü noküümzeshehwa.

⁶VÜWA nüh külesori kücheveh; hi vikütsuo küm vü, ma nüh hi küloletsü.

⁷Sühle luo, O eh kürholi, noh kümnyie vü; küpakenühnyunü VÜWA nüh, noh vü küwuzhi sakümthuoh kenüh,

⁸küpakenühnyunü noh nüh aküsü vünüh, eh kürholi vizhu kütsü kenüh, arüthsü vünüh eh notha vizhutsü, kümshü vünüh eh jih vizhutsü,

⁹hi tü VÜWA tüvü tse veh rhoküveh azhihwa vü.

¹⁰ Hi tü eh kütsotü sara, hi nüh, “Hi tü kümnomna jishehmthuoh,” ta wie ketünga;

¹¹Hi nüh eh kükrü vünüh, “Nyiri aveh tü kürütso küsü wie,” ti küza.

¹²Hi tü VÜWA vü mowa tsüna lo ma nüh hi vü küwuzhi aveh kenüh?

¹³Hi nüh küülolera ahuowa khake naveh thi VÜWA nyo ji naveh,

¹⁴Hi nüh eh küüshieküphrahzhuri VÜWA vü tsü naveh ma nyiri aveh tsatüvü nüh.

¹⁵VÜWA notha vü akürhe thuoüji ma kümtseri küsü.

¹⁶O VÜWA, hi tü noh siepe; hi tü noh siepe, noh siepevühwa atsa. Eh küphehte noh nüh lejatsüthuoh.

¹⁷Hi nüh noh vü kümnakütsü küsahthuo tsü naveh thi VÜWA nyo ji naveh.

¹⁸Hi nüh eh küüshieküphrahzhu VÜWA vü tsü naveh ma nyiri aveh tsatüvü nüh,

¹⁹VÜWA zheh nyulari vünüh, noh zhila vünüh, O Jerusalem. VÜWA siake!