Read Pochuri Naga KÜREIHIRI 118 Bible Online

KÜREIHIRI 118 - Pochuri Naga bible

KÜREIHIRI 118

¹ O VÜWA vü kümna tsüluo, ma tü mühie küm kenüh; ma mükükhaphrükhale küümze tü küsuokürho pehra veh!

²Israel tü, “Ma mükükhaphrükhale küümze thuoüji, küsuokürho pehra veh,” ti küüza luo.

³Aron zhehlo tü, “Ma mükükhaphrükhale küümze tü, küsuokürho pehra veh,” ti küüphrahte luo.

⁴VÜWA kükrüri tü, “Ma mükükhaphrükhale küümze tü, küsuokürho pehra veh,” ti küüphrahte luo.

⁵Eh müshekümnomna vünüh hi nüh VÜWA ji; VÜWA nüh hi rületsü thi hi sakürüzih tsü.

⁶ VÜWA sietse tü hi vü pehveh, hi tü mükrü. Anyiri nüh hi vü mowa sara naveh lo?

⁷VÜWA tü hi kükra nta hi wuovü pehveh; hi kümrhüri vü kükhrara vü nüh no naveh.

⁸VÜWA vünüh kümnyipe küvi nüh kümpha khe, anyiri vü küüzhe thse na küsanü.

⁹VÜWA vünüh kümnyipe küvi nüh kümpha khe kajitsari vü küüzhe thse na küsanü.

¹⁰Akuohjiri aveh nüh hi mükielem; VÜWA nyo vünüh hi nüh jümari tethuojam!

¹¹Mari nüh hi mükielem, awuowuo vünüh hi mükielem; VÜWA nyo vünüh hi nüh jümari tethuojam!

¹²Mari tü aweri kümjie hi mükiel, arüzhü anyih küsü kümjie mari nüh phierake; VÜWA nyo vünüh hi nüh jümari tethuom!

¹³Hi tü kümkhra nüh küchie, jüti sanü küülu nta sa, thitü VÜWA nüh hi kükratsü.

¹⁴ VÜWA tü eh kükhrawa thi eh zah; ma tü eh küülolerawa samthuoh.

¹⁵Künaluo, kükhrara aloküwie azahri, künyitsa juhthsüzhehri vünüh: “VÜWA ke azhie wuovü tü luovehküze sa,

¹⁶VÜWA ke azhie wuovü tü sakümsiemthuoh, VÜWA ke azhie wuovü tü luovehküze sa,” ti sa!

¹⁷Hi tü küsüwa nyu, thitü hi tü rho naveh, jüti sanü VÜWA küürohküliri küzaküthsüle naveh.

¹⁸VÜWA nüh hi tü mtesheh nü hi phrasosiethuoh, thitü ma nüh hi vi nü aküsü vü müthse.

¹⁹Künyitsa kheriri sanü hi vü tsüluo, jüta küsa vü nüh hi tü jümari vünüh, tu nü VÜWA vü kümna tsü naveh.

²⁰Hama tü VÜWA kheri; künyitsari tü jümawa vünüh tu naveh.

²¹Hi nüh noh kümna tsü veh, noh nüh hi kürüle kenüh, thi eh küülolera samthuoh.

²² Azhehküsari nüh kulejaküm alohwa tü ajühkewa alü samthuoh.

²³Hama tü VÜWA nüh küsa; hiri tü jümawa vü nyierakhruo, thi alowie ünüh raluo.

²⁴Rülo hama tü VÜWA nüh küsa; hiri tü jümawa vü nyierakhruo thi alowie ünüh raluo.

²⁵Hiri külole luo, hiri nüh noh khopeke veh, O VÜWA! O VÜWA, hiri nüh noh khopeke veh, hiri vü küsara tsüluo!

²⁶ Thawa nüh VÜWA nyo vünüh tu veh ünüh, kütsiaküvüwa saluo! VÜWA zheh vünüh hiri nüh noh tsiatsü veh.

²⁷VÜWA tü Saküüwuowa, thi ma nüh hiri vü küwie tsümthuoh. Atsuonari vinü pheteluo, kükhurüpe küju!

²⁸Noh tü eh Saküüwuowa, thi hi nüh kümna vi noh tsü naveh; noh tü eh Saküüwuowa, hi nüh noh khake naveh.

²⁹O VÜWA vü kümna tsüluo, küpakenühnyunü ma tü kümhie kenüh; küpakenühnyunü ma mükükhaphrükhale küümze tü, küsuokürho pehra küveh kenüh!