Read Pochuri Naga KÜREIHIRI 119 Bible Online

KÜREIHIRI 119 - Pochuri Naga bible

KÜREIHIRI 119

¹Thari nüh kümte lehkhuji münyie nüh akütsiaküvüri, VÜWA khonyo vü kütseri tü akütsiaküvüri.

²Ma povüzhü küsari tü akütsiaküvüri, mari luoveh ajü vi ma küphahri tü kütsiaküvüri,

³alehmkünyu müküsari nga, thitü ma lehri vü kütse!

⁴Noh küsosiezhü ri tü kükheke nü sa üta noh nüh küümzheju nta azhütsü.

⁵O, noh zhühkheri kümzhe vünüh eh lehkhujiri tü, mükhaphrükhale nüh sanaveh!

⁶Jüta thuoüji hi tü küzükrü vü küthsewa nyu thuoh, eh notha vi noh zhükütsüri aveh vü nophokena.

⁷Luoveh kümsho küsü vi nü noh siake naveh, hi nüh noh künyitsa zhühkhori küthsüra vü.

⁸Hi nüh noh zhühkheri müzhe naveh; O hi mükuleju tümluo!

⁹Vizari küsü tü mokümjie ma lehkhuji kümtse sara na lo? noh zhü jüma kühuote kümzhe vünüh.

¹⁰Eh luoveh ajü vi hi tü noh phah veh; noh zhükütsüri vünüh hi tü, tsemüküze tümluo!

¹¹Hi tü noh zhü vi eh luoveh lovü thsemthuoh, jüta küsa vünüh hi tü noh vü, mükhiemuo nüh sana küveh kenüh.

¹²Noh tü kütsiaküvüwa saluo, O VÜWA; noh zhühkeri vi hi sosieluo!

¹³Hi nüh eh pomie vi küzazhu veh, noh po zhühkhori aveh,

¹⁴hi tü noh povüzhüri lehkhuji tü künyirhie aveh nokülo zake no lom.

¹⁵Hi nüh noh küsosiezhüri vü müshephoke naveh, thi noh lehri vü eh notha nophoeke naveh.

¹⁶Hi tü noh zhühkheri vü nolo naveh; hi tü noh zhü küümawa nyu.

¹⁷Noh siepewa vü küwuzhisheh vünüh satsüluo, jüta küsa vünüh hi tü rho, thi noh zhü müzhe naveh.

¹⁸Eh notha satsüluo, jüta küsa vünüh, hi tü noh khonyo vünüh aküngori ngu naveh ünüh.

¹⁹Hi tü azhih vü küpriri küsü; hi vünüh noh zhükütsüri müküthi tümluo!

²⁰Eh kürholi müngu nü ngetewathuoh, tsotho aveh noh zhühkhori kenüh.

²¹Noh tü kürhiezawa phraveh, müzükümri, noh zhükütsüri vünüh tseteküwari;

²²hi vünüh jümari müküchieküzhü momakütalo vijamtüluo, küpakenühnyunü hi nüh noh povüzhüri kümzhethuoh kenüh.

²³Kajitsari nüh shupeh nü eh müküleh phahwie ketünga, noh siepewa thuoüji noh zhühkheri vü müshephoke naveh.

²⁴Noh povüzhüri tü hi nüh nokülowa, jümari tü hi zhühphiekütsüri.

²⁵Eh kürholi tü azhitho vü küpeke mthuoh; noh zhü müzhe nü hi sakürholuo!

²⁶Hi nüh eh lehkhujiri küüza vü, noh nüh hi rületsü; noh zhühkheri vi hi sosieluo!

²⁷Noh küsosiezhü lehkhujiri vi hi saküüthsümshi luo, thi hi tü noh küngo müshephoke naveh.

²⁸Luovehküna kenüh eh kürholi tü ratewaveh; noh zhü müzhe nü hi saküükhratüluo!

²⁹Mükünyu lehkhujiri hi vünüh vi kületsuom luo; thi noh khonyowa külozhisheh vünüh hi sosieluo!

³⁰Hi nüh küzhütsanyitsa lehkhujiwa rükamthuoh, hi nüh noh zhühkhori eh tüvü samthuoh.

³¹Hi tü noh povüzhü vü khephoke veh, O VÜWA; hi vi küzükrü vü müthse tümluo.

³²Hi tü noh zhükütsü lehkhujiwa vü zhü naveh, noh nüh eh küthsükümshi sa küüji vü!

³³Hi sosieluo, O VÜWA, noh zhühkheri lehkhujiri; thi hi nüh jüma tü sehkhe küju sawa naveh.

³⁴Hi vü küthsükümshi tsüluo, jüta küsa vünüh hi tü, noh khonyowa sara naveh, thi eh luoveh ajü jüma müzhe naveh.

³⁵Noh zhükütsüri lekhuji vü hi siakeluo, küpakenühnyunü hi tü jüla noloküm kenüh.

³⁶Eh luoveh tü noh povüzhüri vü küükhe luo, thi akünyia vü nyu nüh!

³⁷Eh notha tü müjujuri küno vünüh küüsühle luo; thi noh lehkhujiri vü akürho hi tsüluo.

³⁸Noh siepewa vü noh küphrahzhuzhüwa kütom luo, jüma tü noh kükrüri kenüh.

³⁹Küüjo hi nüh krüshike küvehwa kürele küzem tüluo; küpakenühnyunü noh zhühkhori tü mühiem.

⁴⁰Halie, hi tü noh küsosiezhüri müngu veh; noh künyitsa vünüh hi vü akürho tsüluo!

⁴¹Noh mükükhaphrükhale küümzewa tü, hi vü küüru luo, O VÜWA, noh küülolewa tü noh nüh küphrahzhu müzhe taji;

⁴²jütathuoüji hi müküchieri kenüh hi tü, kürüle pehra naveh, küpakenühnyunü hi tü noh zhü vü alehno küveh kenüh.

⁴³Thi eh po vünüh noh lehküno zhü vizhumküru tümluo, küpakenühnyunü eh küluozhe tü, noh zhühkhori vü pehküveh kenüh.

⁴⁴Hi nüh mükütuo nüh noh khonyo müzhe peh huo naveh, küsuokürho thi sehkhe küju;

⁴⁵thi hi nüh küüchuo vünüh tse naveh, küpakenühnyunü hi nüh noh küsosiezhüri küphah kenüh.

⁴⁶Hi nüh povüzhüri nga kajira tüvü phrahte naveh, thi küzükrü vü küthsewa nyu;

⁴⁷küpakenühnyunü hi nüh eh nokülo tü, noh zhükütsüri vünüh küngura kenüh, hi nüh külowa.

⁴⁸Hi nüh noh zhühnyori siake veh, jüma tü hi nüh lo, thi hi nüh noh zhühkheri vü müshephoke naveh.

⁴⁹Noh siepewa vü noh zhü müsheke luo, noh nüh jümawa vü eh küluozhe satsü.

⁵⁰Eh kümnomna vü hama tü eh luoveh saküürüzihwa jüta küsa vünüh noh küphrahzhuwa nüh hi vü akürho tsü.

⁵¹Saküüwuowa mükünyie nyiri nüh hi riesakükhri kheh, thitü hi tü noh khonyo vünüh sühle temwa.

⁵²Hi nüh khana vünüh noh zhühkhori kümshe vü, hi tü luovehkürüzih sa, O VÜWA.

⁵³Kümsüküsa kenüh, arükümtho nüh hi retemümti, noh khonyo kükuleri nüh.

⁵⁴Noh zhühkheri tü eh zah saru, eh zhetse zheh vü.

⁵⁵Rüza vü hi nüh noh nyo müshekeke ti, O VÜWA, thi noh khonyo münyiazati.

⁵⁶Kütsia hamatü hi vü tsuotsake, jüti küsa vünüh hi nüh noh küsosiezhüri müzhera.

⁵⁷VÜWA tü eh suope; noh zhüri müzhe nti hi nüh phrahzhu veh.

⁵⁸Eh luoveh aveh vi hi nüh noh kükhuo saveh; noh küphrahzhu müzhe nü hi lozhisheh luo.

⁵⁹Hi nüh noh lehkhujiri kümshe vü, hi tü eh mpha tü noh povüzhüri vü küreleke;

⁶⁰Hi tü müküzhike nüh pretsaprelom; noh zhühnyori müzhe nti.

⁶¹Kümsüküsara kuliri nüh hi tietewie nga, hi tü noh khonyo müküma.

⁶²Hi nüh noh siake nti tsotüla vü sühra, küpakenühnyunü noh künyitsa zhühkhori kenüh,

⁶³hi tü noh kükrüri aveh riekhuo vü nyiküsü, noh küsosiezhüri kümzhera riekhuo.

⁶⁴Azhihwa tü, O VÜWA, noh mükükhaphrükhale küümze nüh pro; noh zhühkhe vi hi sosieluo!

⁶⁵Noh nüh noh siepewa sie kümhie ta sathuoh, O VÜWA noh zhü müzhe taji.

⁶⁶Aleküsathsü thi zanyoküthsü kümhie vi hi sosieluo, küpakenühnyunü hi tü noh zhühnyori müshetsü küveh kenüh.

⁶⁷Hi kümnomna tüvü hi tü noh khazih tewa; thitü khinyi thuoüji hi tü noh zhü müzhe vehthuoh.

⁶⁸Noh tü mühiem thi kümhie sasati; noh zhühkhe vi hi sosieluo.

⁶⁹VÜWA mükünyieri nüh akürie vi külüwu mthuoh, thitü eh luoveh ajü vi hi nüh noh küsosiezhüri müzhe veh;

⁷⁰mari luoveh tü aküthü kümjie külie, thitü hi thuoüji noh khonyo vü nolo.

⁷¹Hi münomna küm jüma tü eh kenüh kümhie, jüta küsa vünüh hi tü noh zhühkheri thsüra.

⁷²Noh po lo vü khonyowa tü eh kenüh, suna thi raka anyienyie akre nyiehvü nüh mühiem.

⁷³Noh ke nüh hi zhe thi saküüje; hi tü noh zhühnyori thsü na küsa kenüh, küthsükümshi vi hi tsüluo.

⁷⁴Noh kükrüri nüh hi ngu nü nyierakhruo naveh, küpakenühnyunü hi nüh noh zhü vü küluozhe kenüh.

⁷⁵Hi nüh thsü veh, O VÜWA, noh nüh kürathuokütsüri tü müshom, thi künyitsazhütsa vünüh noh nüh hi sakümnomnathuoh.

⁷⁶Noh mükükhaphrükhale küümze tü, eh luoveh sakürüzih na ti lieke luo, noh siepewa vü noh küphrahzhu müzhe taji.

⁷⁷Noh noküümze hi vü küüru luo, hi tü rho na küsa kenüh; küpakenühnyunü noh khonyo tü hi nüh nokülowa kenüh.

⁷⁸VÜWA mükünyieri tü küzükrü vü thsem luo, küpakenühnyunü mari nüh kürhokhonyo vi nü, hi saküsaji kümthuoh kenüh; thitü eh kenüh thuoüji, hi nü noh küsosiezhüri vü müshephoke naveh.

⁷⁹Noh kükrüri tü hi vü küüsühle luo, jüta küsa vünüh mari tü, noh povüzhüri thsü mhie veh.

⁸⁰Eh luoveh tü noh zhühkheri vü kümte mükümnyie saluo, jüta küsa vünüh hi tü küzükrü vü, vi müthse nüh sana küveh kenüh!

⁸¹Eh kürholi tü noh küülolewa kenüh mnomnashemthuoh, hi tü noh zhü vü luozhe veh.

⁸²Eh notha tü noh küphrahzhu noküpeh vünüh sazihzihti; hi nüh, “Noh tü küsie eh luoveh sakürüzih na thuoh lo?” ti küna,

⁸³küpakenühnyunü hi tü anyikhu lovü, akhah lehuo küsü kümjiethuoh küsathuoh kenüh, tü hi tü noh zhühkheri müküma.

⁸⁴Noh siepewa tü küthake müküzhike üji mümhie lo? Noh tü küsie hi kümnomnasakütsüri shih sana lo?

⁸⁵Kürhiezari tü eh kenüh azhikrie phieke sa veh, noh khonyo vü mkümzhe nyiri nüh.

⁸⁶Noh zhühnyori aveh tü zhütsa, mari nüh mükünyurühle vünüh vi hi saküümnomatsü; hi kükraluo!

⁸⁷Mari nüh azhih vü pike vünüh hi vü sehkhe satsü zhih; thitü hi tü noh küsosiezhüri mükule wie.

⁸⁸Noh mükükhaphrükhale küümze nüh, eh kürho küsesa tüluo, jüta küsa vünüh hi tü, noh po povüzhüri sa ra naveh.

⁸⁹Küsuokürho, O VÜWA, noh zhü tü, atülüri rügivü sakütohmthuoh.

⁹⁰Noh küzhütsanyitsa tü awuhle aveh vü pehwa veh; noh nüh azhihwa vishuthuoh, thi jüma tü tokemthuoh.

⁹¹Noh nüh küchieke vünüh jümari tü nosü tsie veh; küpakenühnyunü azanyo aveh nga noh sieperi küsa kenüh.

⁹²Mükütüküzü noh khonyo tü eh nokülowa mükünyu tüla, hi tü eh kümnomna vünüh pokam naveh.

⁹³Hi tü piketü noh küsosiezhüri küümawa nyu; küpakenühnyunü jümari vünüh noh nüh, akürho vi hi tsü kümthuoh kenüh.

⁹⁴Hi tü noh zhi, hi külole luo; küpakenühnyunü hi nüh noh küsosiezhüri küphah kenüh.

⁹⁵Kümsüküsari tü hi zorie nta hi huo mütike veh; thitü hi tü noh povüzhüri müsheno veh.

⁹⁶Hi nüh aküjutsa aveh ngumthuoh, thitü noh zhühnyo thuoüji müza küluoshe.

⁹⁷O, hi tü küzakele nga noh khonyo lo! jüma tü rülo aveh vü hi nüh kümshephokewa.

⁹⁸Noh zhühnyo nüh hi sanü, hi mükünongüri nyiehvü saküüthsümthuoh, küpakenühnyunü jüma tü hi siepeh huo kümthuoh kenüh.

⁹⁹Eh küsosieri aveh nyiehvü nüh hi nüh, küthsükümshi küüzhi pehvehthuoh, küpakenühnyunü noh povüzhüri tü, eh kümshephoke küsa kenüh.

¹⁰⁰Hi tü kükhruoküzeri nyiehvü nüh thsümshi veh, küpakenühnyunü hi nüh noh küsosiezhüri küsa kenüh.

¹⁰¹Hi nüh kümsü lehkhuji aveh vünüh eh mpha khete, noh zhü müzhe na küsa kenüh.

¹⁰²Hi tü noh zhühkhori vünüh anato vü sühle temwa, küpakenühnyunü noh nüh hi sosiekümthuoh kenüh.

¹⁰³Hi nüh kümpo vü noh zhüri tü, küzakelenga münge lo, awejuh nyiehvü nüh eh po vü münge!

¹⁰⁴Noh küsosiezhüri vünüh hi tü küthsükümshi ngu veh; jükenüh hi tü mükünyu lehkhuji aveh mürhüm.

¹⁰⁵Noh zhü tü eh mpha vü lati küsü; thi eh lekhuji vü aküwie küsü.

¹⁰⁶Hi nüh küüshiezhü küsü küshie thi jüma kütom thuoh, noh künyitsa zhühkhori müzhe na küsa kenüh.

¹⁰⁷Hi tü müküüzara saküümnomna; hi vü akürho tsüluo, O VÜWA, noh zhü müzhe taji!

¹⁰⁸Eh küsiake kütsü vike luo, O VÜWA, thi noh zhühkhori vi hi sosieluo.

¹⁰⁹Hi tü mükütuo nüh eh ke vü eh kürho küjehke, thitü hi tü noh khonyo müküma.

¹¹⁰Kümsüküsari nüh eh kenüh küjurü khesa, thitü hi tü noh küsosiezhüri vünüh khazih temwa.

¹¹¹Noh povüzhüri tü küsuokürho eh ka, ah, jümari tü eh luoveh loküzhewa.

¹¹²Hi tü noh zhühkheri sazhu nti eh luoveh kheke küsuokürho, sehkhe küju.

¹¹³Hi nü amüshe künyi küsa nyiri mürhüm, thitü hi tü noh khonyo lom.

¹¹⁴Noh thuoüji eh küüthi azhie thi eh johuo; hi tü noh zhü vü luozhe.

¹¹⁵Hi vünüh tewaluo, nohri kümsüküsari, jüti küsa vünüh hi tü, eh Saküüwuowa zhühnyori sa ra na küveh kenüh.

¹¹⁶Noh nüh küphrahzhu müzhe nü hi küjehte luo, jüta küsa vünüh hi tü rhora naveh, thi eh küluozhe vü hi tü, küzükrü vü vi müküthse tümluo!

¹¹⁷Hi site peh luo, jüta küsa vünüh hi tü, tote ra naveh ünüh, thi mükütuo nüh noh zhühkheri kenüh, küsieke peh huo naveh ünüh!

¹¹⁸Noh nüh noh zhühkheri vünüh, khazih teküwa aveh tü müshüjajati; ah, mari rokümsü tü kürütso wie.

¹¹⁹Noh nüh azhih vü kümsüküsari aveh tü, arühsü kümjie chiekeketi; jükenüh hi tü noh povüzhüri lo.

¹²⁰Noh kükrü kenüh eh sa tü kükhekheti, thi hi tü noh shihri krüm.

¹²¹Hi tü mowa nü müsho thi kato veh ünüh sa thuoh; hi kümrüri vü hi müsa tümluo.

¹²²Noh siepewa kümhie kenüh kümhiezhü phrazhutsüluo; vüwa mkünyieri tü hi müküümrü tümluo.

¹²³Eh notha tü noh küülolera küno vünüh zihm, thi noh künyitsa küphrahzhu küsaju ra kenüh.

¹²⁴Noh mükükhaphrükhale küümze müzhe nü, noh asiepewa vü saluo, thi noh zhühkheri vi hi sosieluo.

¹²⁵Hi tü noh siepe; hi vü küthsükümshi tsüluo, jüta küsa vünüh hi tü noh povüzhüri thsü ra naveh!

¹²⁶VÜWA kenüh küürohkülih tsotho thuoh, küpakenühnyunü noh khonyo tü zokhuo kümthuoh kenüh.

¹²⁷Jükenüh hi tü noh zhühnyori lom, suna nyiehvü nüh, suna kümhietsawa nyiehvünüh.

¹²⁸Jükenüh hi nüh eh lekhari tü, noh küsosiezhüri nüh küüjo veh; hi nüh müküleh aleh aveh mürhüm.

¹²⁹Noh povüzhüri tü ngoshehm; jükenüh eh kürholi tü jümari münyiazati.

¹³⁰Noh zhüri müküsate nüh küwie tsü veh; jüma tü küthsükümshi vi küjühlori vü aküthsü tsüveh.

¹³¹Apo ka nü hi nüh mnguveh, küpakenühnyunü hi nüh noh zhühnyori kümngu kenüh.

¹³²Hi vü sühle luo thi hi lozhisheh luo, noh nyo külori vü sakütsü kümjie saluo.

¹³³Noh nüh küphrahzhu müzhe nü, eh lekhari tü küüto vü saluo, thi künakhie küsü nga nüh, eh nyiehvü khra mküüzetümluo.

¹³⁴Anyiri kümrü vünüh hi rhehsaluo, jüta küsa vünüh hi tü, noh küsopsiezhü müzhe ra na küveh kenüh.

¹³⁵Noh siepewa vü noh nyieh sa küüwieke luo, thi noh zhühkheri vi hi sosieluo.

¹³⁶Eh notha tü akuzari rüthsü küütsa, küpakenühnyunü anyiri nüh noh khonyo mükümzhe kenüh.

¹³⁷Noh tü nyitsam, O VÜWA, thi kümsho thuoüji noh leküsari.

¹³⁸Noh nüh künyitsa vünüh noh povüzhüri chiekemthuoh, thi künyitsazhütsa aveh vü.

¹³⁹Eh kütsaza nüh hi sariemthuoh, küpakenühnyunü hi küümaküshiri nüh, noh zhüri küma mümti küsa kenüh.

¹⁴⁰Noh küphrahzhu tü müte mühiesheh thuoh, thi noh siepewa tü jüma lom.

¹⁴¹Hi tü zahm thi mamthuoh, tü hi thuoüji noh küsosiezhüri müküma.

¹⁴²Noh künyitsa tü küsuokürho nyitsam, thi noh khonyo tü zhütsa.

¹⁴³Küsühro thi amüshekümnomna tü hi vü teruthuoh, thitü noh zhühnyori tü hi nüh nokülowa.

¹⁴⁴Noh povüzhüri tü küsuokürho nyitsa, hi rho na küsa kenüh küthsükümshi hi tsüluo.

¹⁴⁵Eh luoveh ajü vi nü hi tü zie veh; hi rületsüluo, O VÜWA! Hi nüh noh zhühkheri sanaveh.

¹⁴⁶Hi nüh noh vü zie veh, hi külole luo, jüta küsa vünüh hi tü noh povüzhüri müzhe naveh.

¹⁴⁷Athohle tüvü nüh hi tü sühra nü küükra kenüh zie; hi tü noh zhüri vü luozhe.

¹⁴⁸Arüza vü ariehuori atüvü nüh eh notha tü koteru, jüta küsa vünüh hi tü noh nüh, küphrahzhu rügivü müshephoke ra na küveh kenüh.

¹⁴⁹Noh mükükhaphrükhale küümze vünüh, eh jikhi künatüluo; O VÜWA, noh müsheküükatothsü vünüh, eh kürho müshietüluo.

¹⁵⁰Hi saküümnomari tü amshe kümsü vi hi shehnyi ru; mari thuoüji khonyowa vünüh letsuom.

¹⁵¹Thitü noh thuoüji shehnyi veh, O VÜWA, thi noh zhühnyori aveh tü zhütsa.

¹⁵²Khanavü nüh noh povüzhüri vünüh, hi nüh thsümthuoh, noh nüh jüta küsa vünüh, jümari küsuokürho phahmthuoh.

¹⁵³Eh kümnomna no nü hi vizhu luo, küpakenühnyunü hi tü noh khonyo mükümawa.

¹⁵⁴Eh kenüh khuotüluo thi hi rhehsaluo; noh nüh küphrahzhu müzhe nü akürho vi hi tsüluo!

¹⁵⁵Küülolera tü kümsüküsari vünüh letsuo veh, küpakenühnyunü mari tü, noh zhühkheri mphah nüh saküm kenüh.

¹⁵⁶Aküji tü noh külohna, O VÜWA; noh müsheküükatothsü müzhe nü akürho vi hi tsüluo.

¹⁵⁷Aküzhi vünüh eh mkünongüri thi eh küwuluori, thitü hi thuoüji noh povüzhüri vünüh ehmüshe kükhaphrü msa.

¹⁵⁸Hi tü ehluoveh müühienüh sanü mükütsotüri no, küpakenühnyunü mari nüh noh zhükütsüri mükümzhe kenüh.

¹⁵⁹Hi nüh noh küsosiezhüri küzakele nga lo veh ünüh müshenoluo! Noh mükükhaphrükhale küümze müzhe nü, eh kürho müshiesaluo.

¹⁶⁰Noh zhü aveh tü küzhütsawa; thi noh künyitsa zhühkhori aveh tü, küsuokürho pehra veh.

¹⁶¹Kajitsari tü arüleh münyie nüh hi kümnomna tsü, thitü eh luoveh thuoüji, noh zhü vü arüzhekükrü vünüh tsie veh.

¹⁶²Hi tü noh zhü vü nyierakhruo veh, zanyoküvira küji küngurari kümjie.

¹⁶³Hi thuoüji mükünyu mürhüm thi rhorham, thitü noh khonyo lom.

¹⁶⁴Hi tü rülo küsü vü türü keri noh siakeketi, küpakenühnyunü noh künyitsa zhühkhori kenüh.

¹⁶⁵Noh khonyo külori thuoüji luovehkürüzih küji peh; zanyoküsü nga mari samküümshüra,

¹⁶⁶Noh küülolera kenüh hi tü luozhe veh, O VÜWA, thi hi tü noh zhühnyori sa.

¹⁶⁷Eh kürholi tü noh povüzhüri münyiazati; hi tü jümari khielota lo.

¹⁶⁸Hi tü noh küsosiezhüri thi povüzhüri müshe, küpakenühnyunü eh leh aveh tü, noh tüvü pehküm kenüh.

¹⁶⁹Eh küzie tü noh tüvü küüru luo, O VÜWA, noh zhü müzhe nü hi vü küthsükümshi tsüluo!

¹⁷⁰Eh küzhiekekükhuo tü noh tüvü küüru luo; noh zhü müzhe nü hi vizhu luo.

¹⁷¹Eh pohmie tü küsiake küshozhu naveh, jüta küsa vünüh noh nüh noh zhühkheri vi hi sosie.

¹⁷²Eh mizhi tü noh zhü azah sanaveh, küpakenühnyunü noh zhühnyori aveh tü kato küm kenüh.

¹⁷³Noh ke tü hi kükra nti küchela luo, küpakenühnyunü hi nüh noh küsosiezhüri rükakümthuoh kenüh.

¹⁷⁴Hi tü noh küülolera kümngu kenüh, O VÜWA, thi akhonyo tü eh künolowa.

¹⁷⁵Hi tü küürholuo, jüta küsa vünüh hi tü, noh siake ra naveh ünüh, thi noh zhühkhori tü hi küükraluo.

¹⁷⁶Hi tü nyihzhü küümie kümjie khazih tewathuoh; küpakenühnyunü hi tü noh zhühnyori müküma wie kenüh.