Read Pochuri Naga KÜREIHIRI 138 Bible Online

KÜREIHIRI 138 - Pochuri Naga bible

KÜREIHIRI 138

¹Hi nüh noh kümna tsü veh, O VÜWA, eh luoveh ajü vi; nyiazara tüvü hi nüh noh küsiake zah sa veh;

²hi nüh kümtse kükhurüzheh wuovü küngietsuo nü, noh nyo vü kümna tsü, küpakenühnyunü noh mükükhaphrükhaleküümze, thi noh küzhütsanyitsa kenüh; küpakenühnyunü noh nga thi nohzhü nga, zanyo aveh nyiehvü sakümsie kümthuoh kenüh.

³Hi nüh noh küji rülo vü, noh tü hi rületsü, noh nüh eh kürholi kükhra saküzhitsü.

⁴Azhih vü kajiri aveh noh siake naveh, O VÜWA, küpakenühnyunü mari nüh noh po vü azhüri küünarathuoh kenüh;

⁵thi mari tü VÜWA lehkhujira zah sanaveh, küpakenühnyunü aküji tü VÜWA kütholathovü küsa kenüh,

⁶küpakenühnyunü VÜWA tü müsie wie ketünga ma tü küsajiri küsieketsü; thitü msheküüjiri thuoüji ma nüh, kületsuo vünüh küthiveh.

⁷Hi tü küsühro azavü tse wie nga, noh nüh eh kürho tü müshie sa veh; noh nüh noh pie vi nü, hi mükünongüri rükümtho rügivü thsuokeketi, thi noh ke azhie wuovü nüh hi vizhuzhuti.

⁸VÜWA tü eh kenüh ma mshewa saju wie naveh, noh mükükhaphrükhale küümze tü, O VÜWA, küsuokürho küpeh kenüh. Noh ke nüh küüroh mükule tümluo.