Read Pochuri Naga KÜREIHIRI 143 Bible Online

KÜREIHIRI 143 - Pochuri Naga bible

KÜREIHIRI 143

¹Eh kükhuo künatüluo, O VÜWA; eh küzhiekekükhuo vü khüna tüluo! Noh künyitsazhütsa vünüh hi rületsüluo, noh künyitsa vünüh!

² Noh siepewa sie nü kümte vü mütu tümluo; küpakenühnyunü noh tüvü nyi küsü nga, nyitsanü rho müküveh kenüh,

³küpakenühnyunü mükünongüri nüh hi küzhe kenüh; ma nüh eh kürho vi azhihvü küche nyamthuoh; hothake sükümri kümjie ma nüh, hi tü aküzo vü shuküüpehmthuoh.

⁴Jükenüh eh sietse tü eh lovü nüh thasü veh; eh luoveh tü eh lovü nüh azüh ngekem thuoh.

⁵Hi tü khanavü rülori müshekera, noh nüh küsari aveh vü hi nüh müshephoke; noh ke nüh mowa sasa veh ünüh hi nüh müsheveh.

⁶Hi nüh noh vü eh ke thsuoke; azhih tü küüweh kümjie eh kürholi tü, noh kenüh kürieh veh.

⁷Hi rületsü nti preluo, O VÜWA! Eh sietse tü sazih veh! Hi vünüh noh nyieh müküthi tümluo, azhikrie lovü teküturi kümjie hi tü sam üsü nüh.

⁸Hi tü arüne vü noh mükükhaphrükhale kümze raküünaraluo, küpakenühnyunü hi tü noh vü eh lehküno thseküveh kenüh. Hi nüh müwa üji mükümhie aleh vi hi sosieluo, küpakenühnyunü hi tü noh vü eh sietse khake küveh kenüh.

⁹Hi vizhu luo, O VÜWA, hi mükünongüri vünüh! Kümnyipe kenüh hi nüh noh vü teke!

¹⁰Noh kümshe sana küsa vi hi sosieluo, küpakenühnyunü noh tü Saküüwuowa küsa kenüh! Noh sietse kümhie nüh aletse kükato rügivü, hi küjotsüluo!

¹¹Noh nyo rieh vünüh, O VÜWA, eh kürho müshie tüluo! Küsühro vünüh noh künyitsa vünüh hi vizhu luo!

¹²Thi noh mükükhaphrükhale küümze vünüh, eh mükünongüri aveh zoriemtüluo, küpakenühnyunü hi tü noh siepewa küsa kenüh.