Read Pochuri Naga KÜREIHIRI 18 Bible Online

KÜREIHIRI 18 - Pochuri Naga bible

KÜREIHIRI 18

¹Hi tü noh kümzethe, O VÜWA, hi saküükhratüwa.

²VÜWA tü eh lokrüwa, eh shiehkuwa, thi eh küvizhuwa, eh Saküüwuowa, eh lokrü, ma vünüh eh kümnyipe küviwa, eh joh huo, thi eh küülole rütsüwa, eh shiehku kümzhowa.

³Hi nüh VÜWA ji, ma tü küsiake kütsewa, thi hi tü eh mükünongüri vünüh külolemthuoh.

⁴Aküsü kuliri nüh hi mükieshemthuoh, Küzorie küüshü nüh hi külüwute thuoh.

⁵Küsürazhie kuliri tü hi tietemthuoh, Aküsü küjururi nüh hi tothuomthuoh.

⁶Hi tü eh kümshemnomna vünüh VÜWA ji, eh Saküüwuowa vü küükra kenüh hi nüh zie. Ma kükhurüzheh vünüh ma nüh hi kühu, thi eh küüziewa tü ma khüna ju.

⁷Thinü azhihwa tü küre thi küze; ajuperi nga aküzhiri kümjie küüshühtewa, thi küzhüh, küpakenühnyunü ma tü arüküshu kenüh.

⁸Ma nyaku lovünüh anyikhu shutewa, thi ma po vünüh kütsorie nyih shuru; ma vünüh aküzhe nyihieri anyihzhu shuru.

⁹Ma nüh atülüri saküüngie, thinü teturu; aküzo müthsüthsü nüh ma mpha kükhu vü peh.

¹⁰Ma tü küsaküpesa küsü rügi vünüh prü; ma tü amürhü aküsa rügi vünüh the turu.

¹¹Ma tü aküzo vi ma hiete mükieshe, ma akülu küsa küzo ajuh küütü vi ma mükieshe.

¹²Ma tüvü aküwie ma küluri vünüh arahzhi, thi anyihie vüphieru.

¹³VÜWA nüh atülüri vünüh atsohküüshi, thi kümsie Tsawa nüh ma jikhi sa, arazhi thi anyih nyihie ti shuru.

¹⁴Thinü ma nüh ma shüchu shuküze, thi jümari saküüporie; ma nüh atsorie saküürieh, thi jümari küüzhurie kheh.

¹⁵Jüti küsa vü juhküji kulehri tü nguteru, thi azhihwa ajuperi tü saphiem, noh nüh küshüke vünüh, O VÜWA, noh nyaku lo vünüh arütho kühohzhu taji.

¹⁶Ma tü kümsie vünüh turu küju sa, ma nüh hi küüjehte, ajuh khielohta küpeh vünüh ma nüh hi shohzhu.

¹⁷Hi mükünongü kükhrawa vünüh ma nüh hi vizhu, thi hi kümrhüri vünüh hi vizhu; küpakenühnyunü mari tü eh kenüh khra sheh küm kenüh.

¹⁸Mari tü eh lokürü rülo vü hi vü ru; thitü VÜWA tü hi sieküpehwa sa.

¹⁹Ma nüh azhie kümza küsü vü hi siezhuru; ma nüh hi vizhuthuoh, küpakenühnyunü ma tü hi nolo küm kenüh.

²⁰Eh künyitsa müzhe nü VÜWA nüh eh jisuo tsü; eh ke kümtsemüzhe nü ma nüh hi noshele tsü,

²¹küpakenühnyunü hi nüh VÜWA lehri kümzhera kenüh, thi hi tü khuhkemsü sheh nü Saküüwuowa vünüh karitemwa,

²²küpakenühnyunü ma zhühkhori aveh tü, eh tüvü pehküveh kenüh; thi hi tü ma zhühkheri hi vünüh vimja.

²³Hi tü ma tüvü kümte münyie luo, thi hi tü künakhie vünüh hi mpa hi sara.

²⁴Jükenüh VÜWA nüh eh künyitsa müzhe nü, hi noshele tsürathuoh, ma notha vü eh ke kümtse müzhe taji.

²⁵Noh noküümzeri vü noküümze vi nü noh mpa nüh kütsa; kümte mükünyieri vi noh mpa nüh kümte münyie nüh sa;

²⁶kümtse vi nü noh mpa nüh kümtse kütsa; thi küükhuh vi nü noh mpa nüh kürele kütsa,

²⁷küpakenühnyunü noh nüh saküürünyie nyiri vizhu veh; thitü noh tü kürhiezarhiechi notha thuoüji vikütsuo veh.

²⁸Ah, noh nüh eh latiku tsotsü veh; VÜWA eh Saküüwuowa nüh eh küzo saküwie tsü veh.

²⁹Ah, noh vünüh hi tü riekhuo küsü chikümnyah ke; thi eh Saküüwuowa vünüh hi tü, azie rügivü jokejoke ra naveh.

³⁰Saküüwuowa hama, ma leh tü jum; VÜWA nüh küphrahzhu tü zhütsa ta küsa kütoh; ma thuoüji ma vünüh kümnyipe küviri aveh kenüh joh huo küsü,

³¹küpakenühnyunü Saküüwuowa tü thawa lo, thitü VÜWA nyu ülo? thi thawa nü alokrü lo, Saküüwuowa mpa nüh nyu ülo?

³²ma tü akükhra vi hi tseke kütsü Saküüwuowa, thi eh leh kütote sakütsüwa.

³³Ma nüh eh mpha tü asühnyi mpha üta sa tsü, thi kümsieri vü hi küpeh.

³⁴Arie kenüh ma nüh eh ke kümte tsütsüti, jüta küsa vünüh eh pie tü, asahwuo lawih heh ra naveh.

³⁵Noh nüh noh küülole joh huo hi tsüthuoh, thi noh ke azhie wuovü nüh roze veh, thi noh küükra nüh hi saküji tsüthuoh.

³⁶Noh nüh eh kükhu vü eh lekhari kenüh, azhie kümza küsütsüthuoh, thi eh mpha tü münyichothuoh.

³⁷Hi nüh eh mükünongüri zhe thi mari phara; thi mari müjie küzorie küju nü müsühle.

³⁸Hi nüh mari shükükhari, jükenüh mari tü müsühra lera nüh sa; mari tü eh mpha kükhu vü külutewa,

³⁹küpakenühnyunü arie kenüh noh nüh akükhra vi hi tseketsü; noh nüh hi küwuri eh kükhu vü re kütu.

⁴⁰Noh nüh hi mükünongüri aseru hi vü küüreleke, thi hi kümrhüri hi nüh zoriejam.

⁴¹Mari tü küükra kenüh zie, thitü nyi küsü nga nüh küülole münyie nüh sa, mari nüh VÜWA vü zie, thitü VÜWA nüh mari mükühu.

⁴²Amürhü atüvü azhitho kümjie hi nüh mari tokümnyatsü, lekhujiri vü anyisa kümjie hi nüh mari alievü vehjam.

⁴³Noh nüh anyiri küsaluo vünüh hi vizhu; noh nüh hi vi akuoküjiri alü küüsa; hi müküthsü nyiri nüh eh kütsü küüsa,

⁴⁴mari nüh eh zhüküünara vü mari tü eh zhü vi; alienyiri tü künyietsuo nü hi vü ru.

⁴⁵Lienyiri tü luoveh zahtewa, thi mari shiehku kümzhori vünüh khekhe ta sanü shuru.

⁴⁶VÜWA tü rho veh; tinü eh lokrü tü kütsiaküvüwa saluo, thi eh küülole Saküüwuowa tü kütholahwa saluo,

⁴⁷Saküüwuowa nüh amüthoh vi hi tsü thi anyiri sakütsuo nü eh kükhu vü küthsewa;

⁴⁸ma tü eh mükünongüri vünüh hi küvizhuwa; ah, eh küwuluori nyieh vünüh noh nüh khake; küvürie nyiri vünüh noh nüh hi vizhu.

⁴⁹ Hama kenüh hi nüh noh nyo sieke naveh, O VÜWA, akuoküjiri aza vü, thi noh nyo vü küsiake zah sanaveh.

⁵⁰Aküji küchara ri vü ma nüh ma kajiwa vü tsü, thi ma nüh thse kümwa vü mükükhaphrükhale küümze kütsatsati, David thi ma küthsoküzhiri vü küsuokürho.