Read Pochuri Naga KÜREIHIRI 19 Bible Online

KÜREIHIRI 19 - Pochuri Naga bible

KÜREIHIRI 19

¹Atülü tü Saküüwuowa kütholahthovü phrahte veh; thi maküürori nüh ma ke nüh küüroh zhühchüh veh.

²Rülo küsü nüh rülo küsü vü azhüküphra küsho zhuru, thi rüza küsü nüh rüza küsü vü aküthsü küzazhu veh.

³Küphrahte münyie, nyutü azhü münyie nüh sa; mari jikhi tü müküna ra;

⁴ tü mari jikhi tü azhih aveh vü tewa, thi ma zhüri tü azhih küpote vü tewathuoh. Ma nüh jümari vü arünyi kenüh juhthsüzheh küsü khake.

⁵Jümatü kümnyutepawa nüh ma wiepa jam nü shukütse kümjie, thi kümzhori nyi küsü nüh lozhe nü, ma küzhüwa sakütse üta wiethuoh.

⁶Ma shuküru thuoüji atülüri küpote vünüh, thi ma kümkiele tü jümari küpohte küju; thi ma küzhe vünüh zanyoküsü nga müküthira.

⁷VÜWA khonyo tü ju, kürholi saküürho veh; VÜWA povüzhü tü azhütsa, anyi küjülo wa sakümtsa veh;

⁸VÜWA küsosiezhüri tü kato, aluovehwa nyierakhruo veh; VÜWA zhühnyo tü mütham, anotha saküwie veh;

⁹VÜWA kükrü thuoüji mütse, küsuokürho küzhike; VÜWA zhühkhori tü zhütsa, thi nyitsa kheh.

¹⁰Jümari tü suna nyiehvü nga nüh kümngu leh, suna latha nyiehvü nga nüh hozake; awejuh nyiehvü nga nüh münge, thi awepha vünüh kürütsuori nyiehvü nüh münge.

¹¹Jüma nyiehvü nga jümari vünüh, noh siepewa tü hamna tsümthuoh, jümari kümzhe vünüh ajisuo küji pehra.

¹²Thitü thawa nüh ma küsazihri thsüra na lo? Küüthi mükülehri vünüh noh nüh hi sakümtse luo.

¹³Noh siepewa tü kükuoti kükhiemuori vünüh asevü vikem luo; jümari nüh eh nyiehvü mükükete tüm! Jüta thuoüji hi tü kümte küpehwa nyuthuoh, thi mükükhieh küphrürie küji vünüh kümtewa nyuthuoh.

¹⁴Eh povü azhüri tü thi eh luoveh kümshephoke tü noh notha vü küvikütse saluo, O VÜWA, eh lokrüwa thi eh kürhehsawa.