Read Pochuri Naga KÜREIHIRI 22 Bible Online

KÜREIHIRI 22 - Pochuri Naga bible

KÜREIHIRI 22

¹Eh Saküüwuowa, eh Saküüwuowa, noh tü mokenüh hi kulemthuoh lo? Noh tü mokenüh hi küükra vünüh letsuomthuoh lo, hi nüh külühchi zhühnyori vünüh?

²O! eh Saküüwuowa, hi tü arülo vü zie, thitü noh nüh mükühu; thi arüza vü zie, thitü kümnyie müngu.

³Tü noh tü mütha, Israel küsiakeri rügivü kükaji sapeh.

⁴Hiri pari tü noh vü alehno, mari tü alehno, thi noh nüh mari vizhu.

⁵Mari tü noh vü zie, thi mari tü külolera; mari tü noh vü alehno, thi mari tü mülokhu.

⁶Thitü hi tü ajienyuthuoh, thi anyiri nyuthuoh; anyiri nüh müküchieküzhü, thi anyiri nüh mamthuoh.

⁷ Hi künguri aveh nüh hi riesa, mari nüh hi vü pomiehküre kütsa thi mari alü küze;

⁸ “Ma nüh ma kürhowa VÜWA vü tsüthuoh, ma nüh ma küvizhum luo, ma nüh ma kükülole luo, küpakenühnyunü ma nüh ma vü nokülo kenüh,” ti küza.

⁹Tü ashiekuolovü nüh hi küvizhuwa tü noh; noh nüh eh zah tüso vünüh hi külole.

¹⁰Eh küwuo vünüh hi tü noh vü vehjake, thi eh zah nüh hi küwuo vünüh nosü küju, noh tü eh Saküüwuowa satsethuoh.

¹¹Hi vünüh mületsuo tümluo, küsühro tü shehnyi kümthuoh kenüh, thi küükra tü nyi küsü nga münyie luo.

¹²Shüvotsa hozake nüh hi mükieshe veh, Bashan kümzho shüvotsari hi mükiele veh;

¹³mari nüh hi vü mari po ka müzhah, amiewuo khi kükhu kümjie.

¹⁴Hi tü ajuh üta liriemthuoh, thi eh rüri aveh tü müküperüthuoh; eh luoveh tü anyihkha kümjie, jüma tü eh tühso alovü nüh ramthuoh;

¹⁵eh kükhra tü küfükükuorie üta küwehm thuoh, thi eh mizhi tü eh khakhe vü küpekemümti; noh nüh hi vi aküsü zhitho küsü vü küzehzehti.

¹⁶Ah, ashuhri tü hi mükie küzüle veh; kümsüküsari ashie küsü tü hi kümkie samthuoh; mari nüh eh ke künyi thi eh mpha künyi zophiemthuoh.

¹⁷Hi tü eh rüri aveh chiera na thuoh, jümari nüh hi vü nophohke nü notsarü sa;

¹⁸ mari tü mari azhievü nüh eh thsümnyi küsuo, thi eh thsü kenüh mari nüh aküze sa.

¹⁹Thitü noh, O VÜWA, mükiehtuo tümluo! O noh hi küükrawa, eh küükraküzhü shiti saluo!

²⁰Anyuchuwa vünüh hi vizhu luo, ashuh kükhrawa vünüh eh kürho!

²¹Amiewuowa po vünüh hi külole luo, eh kümnomna tü asühprivo rütsüri vünüh külole luo!

²² Hi nüh eh jienüri vü noh nyowa küza naveh; müzawa azavü nüh hi nüh noh siake naveh:

²³Nohri thari nüh VÜWA krü veh ünüh noh siake naveh! Jacob atsa nyimpari aveh, ma sakütholah luo, thi ma vü kükrü vünüh tsie luo! Israel atsari aveh,

²⁴küpakenühnyunü ma tü münomna kümri. Kümnomna müma nyutü mürhorha; nyutü ma tü ma vünüh ma nyieh müküthi, thitü künatüluo, ma nüh ma vü küzie vü.

²⁵Noh vünüh kümhu küji vü eh küsiake ru veh; ma kükrüri atüvü hi nüh, eh küüshieküphrazhuri tsü naveh.

²⁶Münomna kümwa tü tsa thi lora naveh; ma phahkütseri thuoüji VÜWA siake naveh! Nohri luovehri tü küsuokürho kürhowa saluo!

²⁷Azhih küpohte aveh müshe naveh thi VÜWA vü sühle naveh; thi akuoküjira tharuori aveh tü ma tüvü nüh khurü naveh,

²⁸küpakenühnyunü kükhra tü VÜWA zhi, thi ma tü akuoküjira nyiehvü takrü veh.

²⁹Ah, azhih vü kürhiehzari aveh ma vü küngie tsuo naveh; azhitho vü kütsuori aveh ma tüvü küngie naveh, thi mari mpa nüh mükürhorari.

³⁰Kürule vü rhona saküvehri nüh ma kütsü sanaveh; kürule wuhlewa vü anyiri nüh VÜWA khuhke phra naveh,

³¹müjie küwuo nyiri vü ma küvizhu zhüchüh naveh, ma nüh jüma küroh ta küsa.