Read Pochuri Naga KÜREIHIRI 25 Bible Online

KÜREIHIRI 25 - Pochuri Naga bible

KÜREIHIRI 25

¹Noh vü, O VÜWA, eh kürholi toke veh.

²O! eh Saküüwuowa, hi tü noh vü tsotü veh, hi vi küzükrü vü müthse tümluo; hi mükünongüri tü eh nyiehvü müküürietsi tümluo.

³Ah, noh huo küpehri küsü nga küzükrü vü müthse tümluo; aroshi nü müküüzhirari tü küüzükrüm luo.

⁴Noh lehri hi saküüthsüluo, O VÜWA; noh lekhujiri hi sosieluo.

⁵Noh küzhütsa vü hi siewaluo, thi hi sosieluo, küpakenühnyunü noh tü eh külole Saküüwuowa küsa kenüh; noh kenüh hi tü rülo aveh huo küveh wie.

⁶Noh külohnawa müshephohke luo, O VÜWA, thi noh mükükhaphrükhale küümze, küpakenühnyunü jümari tü khanavü nüh pehteküruthuoh kenüh.

⁷Eh küviza kükhiemuori mümshetü tümluo, nyutü eh küphrürie; noh mükükhaphrükhale küümze müzhe nü hi müsheluo, noh kümhie rieh nüh, O VÜWA!

⁸Kümhie thi kümsho tü VÜWA; jükenüh ma nüh kükhiemuori aleh vü süphie veh.

⁹Ma nüh kürünyieri mowa vünü mühie veh ünüh, jüvü siewa veh, thi ma lehkhuji vi kürünyiewa sosie veh.

¹⁰VÜWA lekhuji aveh tü mükükhaphrükhale küümze, thi zhütsanyitsa, ma kütsathuo thi ma pohvü küsari thuoüji.

¹¹Noh nyo rieh nüh, O VÜWA, eh küzih nojatsüluo, küpakenühnyunü jüma tü ji küm kenüh.

¹²Anyi VÜWA kükrüwa tü thawa lo? Ma nüh ma küwa leh kürükawa süphie naveh.

¹³Ma tü ma mpa nüh kütsarhie vünüh küpeke naveh, thi ma tsari nüh azhihwa kümkale naveh.

¹⁴VÜWA sie afü küsa thuoüji ma kükrüri kenüh müpa, thi ma nüh mari vü ma kütsathuowa sa küthsü veh.

¹⁵Eh notha tü VÜWA vü peh huo veh; küpakenühnyunü ma nüh eh mpha tü, aneh vünüh phezhu na küveh kenüh.

¹⁶Noh tü hi vü sühle luo, thi hi vü lozhisheh luo; küpakenühnyunü hi tü küzom thi münomna kümthuoh kenüh.

¹⁷Eh luoveh küsührori sakürüzi mtüluo, thi eh kümshekümnomna vünüh hi vizhu luo.

¹⁸Eh kümshemnomna thi küsühro müshenoluo, thi eh kükhiemuo aveh noja luo.

¹⁹Hi küümaküshiri küzake nüh müshenoluo, thi mari tü mowa küvürie kümrhümzhü vi hi mürhü veh ünüh.

²⁰O eh kürho huote luo, thi hi vizhu luo; hi vi küzükrü vü müküüthse tümluo, küpakenühnyunü hi tü kümnyi noh vünüh viküveh kenüh.

²¹Kümhieju thi kümsho tü hi küümshie luo, küpakenühnyunü hi tü noh huo küveh kenüh.

²²Israel rhehsaluo, O Saküüwuowa, ma küsühro aveh vünüh.