Read Pochuri Naga KÜREIHIRI 27 Bible Online

KÜREIHIRI 27 - Pochuri Naga bible

KÜREIHIRI 27

¹VÜWA tü eh küwiewa thi eh küülolewa; hi tü thawa krü na lo? VÜWA tü eh kürho shiehkuwa; hi tü thawavü krü na lo?

²Mükünongüri nüh hi küprü vü, hi sie saluo nü aküriezhüke phrashu. Eh kürholuori thi küümaküshiri tü, müshü nü külu naveh.

³Ma mpa nüh thopahiri küsü nüh, kürünape sa hi wiejieluo wie nga, eh luoveh tü kükrüwa nyu; ma mpa arie nüh sühra hi sie kürünyuo wienga, hi tü alehno wie naveh.

⁴Hi nüh VÜWA vü zanyo nga ti sa, hi nüh jüma ase phah wie naveh; jüti sanü hi tü VÜWA zheh vü kürho sanaveh, eh kürho rülo aveh, VÜWA küzü noh nti, thi ma kükhurüzheh vünüh kürü naveh,

⁵küpakenühnyunü küsühro rülo vü ma kükhu vünüh, ma nüh hi küthi na küveh kenüh; Ma nüh ma juhthsüzheh küsate kükhu vünüh hi küthiphoh naveh, ma nüh hi vi lokrü küsü rügivü sakü toke naveh.

⁶Thi khinyi hi tü hi mükünongüri hi mükieshe pehküvehri, anyiehvü eh lü toke naveh; thi hi nüh ma juhthsüzheh vünüh, zie taji loküzhe küsahthuo tsü naveh; Hi nüh VÜWA vü azah jikhiküzü sa tsü naveh.

⁷Künaluo, O VÜWA, hi nüh zhiekümsie vü, hi vü lozhisheh luo thi hi rületsüluo!

⁸Noh, “Noh tü eh tso phah luo,” ti küza. Eh luoveh nüh noh vü, “Noh tso VÜWA, hi tü phah veh,” ta küza.

⁹Hi vünüh noh tso müküthi tümluo. Arüküshu vünüh noh siepewa samküüsühle tümluo, noh tü eh küükrawa saru. Hi vimja tüm, hi mükule tümluo, O hi küülole Saküüwuowa!

¹⁰küpakenühnyunü eh pa thi eh zah tü hi kule kümthuoh kenüh, thitü VÜWA nüh hi vike naveh.

¹¹Noh leh vi hi sosieluo, O VÜWA; thi lekhuji akuto küsü vü hi siewaluo, hi mükünongüri kenüh.

¹²Eh küwuluori kümshe vü hi müjake tümluo; küpakenühnyunü mükünyu apovüri tü hi vü sühramthuoh, thi mari tü küvürie sahzhu veh.

¹³Hi tü rhoküveh azhihwa vü, VÜWA kümhie ngu naveh ti tsotü veh!

¹⁴VÜWA huola luo; müzho luo, thi noh luoveh tü ji luo; O, VÜWA huo luo!