Read Pochuri Naga KÜREIHIRI 28 Bible Online

KÜREIHIRI 28 - Pochuri Naga bible

KÜREIHIRI 28

¹Noh vü, O VÜWA, hi tü noh ji veh; eh lokrüwa, hi vü mürüpo tümluo, mükütüküzü noh nüh hi vü zohmta thuoüji, azhikrie lovü tekütsuori üta sam nathuoh.

²Eh zhiekekükhuo jikhi künatüluo, küükra kenüh noh vü hi nüh küzie üta, hi nüh eh ke kükhroke üta noh kümtsezheh kümtsetsawa vü.

³Hi tü khukekümsüri sieke nü temwa tümluo, kümsü küürohri sie nü, ma zhephruri vü luoveh kürüzih nüh phrahte tü, rokümsü nüh mari luoveh lovü kütüri sie nü temküwa tüm.

⁴Mari küüroh müzhe nü mari müthoh satsüluo, thi mari nüh küüroh kümsü müzhe nü; makeri’a nüh küüroh müzhe nü satsüle luo; mari jisuo kütsülehwari mari kümlie tsüm luo,

⁵küpakenühnyunü mari nüh VÜWA küürohri müküchieke kenüh, nyutü ma ke nüh küüroh, ma nüh mari zochiem naveh, thi mari kükhake lewa nyuthuoh.

⁶VÜWA tü kütsiaküvüwa saluo! küpakenühnyunü ma nüh, hi nüh zhiekekükhuori jikhi künatsü kümthuoh kenüh.

⁷VÜWA tü eh kükhra thi eh johuo; eh luoveh tü ma vü alehno veh; jükenüh hi tü kükra thuoh, thi eh luoveh tü rietsi veh, thi eh zah vi nü hi tü kümna vi ma vü tsü veh.

⁸VÜWA tü ma nyiri kükhra wa, ma tü ma nüh thsekümwa küülole kümnyipewa.

⁹O noh nyiri külole luo, thi noh ka tsia tsüluo; noh tü mari kühuowa saluo, thi küsuokürho mari küjehke peh luo.