Read Pochuri Naga KÜREIHIRI 31 Bible Online

KÜREIHIRI 31 - Pochuri Naga bible

KÜREIHIRI 31

¹Noh vü, O VÜWA, hi tü kümnyiepe phah veh; piketü hi tü küzükrü vü müthse tümluo; noh künyitsa vünüh hi vizhu luo!

²Noh khüna hi vü kümrheke luo, shiti vünüh hi külole luo! Eh kenüh noh tü eh kümnyipe lokrü küsü saluo, hi külole na küsa kenüh shiekukümzho küsü saluo!

³Ah, noh tü eh lokrü thi eh shiehkuwa, noh nyo rieh vünüh hi sierüsiewu thi küjotsüluo,

⁴eh kenüh küzheke küsa anehwa vünüh hi vi zhu luo, küpakenühnyunü noh tü eh kümnyipewa küsa kenüh.

⁵Hi tü noh ke vü eh sietse tsüveh; noh nüh hi rhehsamthuoh, O VÜWA, kütsotüke Saküüwuowa.

⁶Noh tü müjuju anguori chieke küsari mürhü; thitü hi thuoüji VÜWA vü alehno veh.

⁷Noh mükükhaphrükhale küümze kenüh, hi tü nyiehrakhruo naveh, küpakenühnyunü noh nüh eh kümnomna ngukümthuoh kenüh, noh nüh eh küwuluori sa tsaketsüthuoh,

⁸thi hi vizhu nü eh mükünongüri ake vü müthse nüh samtüthuoh; noh nüh eh mpha vi azhie kümza vü thsemtüthuoh.

⁹Hi vü lozhisheh luo, O VÜWA, küpakenühnyunü hi tü müshekümnomna vü pehkümthuoh kenüh; eh küshüthuoke vünüh eh notha tü sariemthuoh, eh kürholi thi eh kru nga,

¹⁰küpakenühnyunü eh kürho tü, luoveh küna vünüh küzekümthuoh kenüh, thi eh mahviri tü arütho müküsahra vünüh küzemthuoh; eh kenüh eh kükhra tü sazihmthuoh, thi eh rüri tü sarie küzemthuoh.

¹¹Hi tü eh küwuluori aveh müküchieküzhüwa, eh zhephruri vü kükrüküngo küsü sa, ehküthsüluori vü hi tü saküümzhoh küsü samthuoh; alera vü hi künguri tü hi vünüh temthuoh.

¹²Aküsüri küsü üta hi tü kümshe vünüh küma küzemthuoh; hi tü küfü küsü kükuo üta samthuoh.

¹³Ah, hi nüh hozake küzhühwe künara, awuowuo vünüh küükrükükra künara! mari nüh jüle taji mari tü, eh kürholi vi nta sa.

¹⁴Thitü hi tü noh vü alehno veh, O VÜWA, hi nüh, “Noh tü eh Saküüwuowa,” ti küza.

¹⁵Eh tsothori tü noh ke vü pehveh; eh mükünongüri thi hi saküümnomnari ake vünüh hi vizhu luo!

¹⁶Noh siepewa vü noh nyiehwa wieketsüluo; noh mükükhaphrükhale küümze vü hi külole luo!

¹⁷Hi tü küzükrü vü müthse tümluo, O VÜWA, küpakenühnyunü hi nüh noh ji küveh kenüh; kükümsüküsari vi küzükrü vü thsem luo, mari tü jikhi müsanüh küüzoti Küsürazhievü küzem luo.

¹⁸Akürie pomieh tü zhü mküüphrate tümluo, jümari tü künyitsari vü mküchiezhü phrahte nü rhiezarhiechi thi momakütalo vünüh.

¹⁹O noh kümhie tü küzakele nga ji lo, noh nüh jüma tü noh kükrüri kenüh samtüthuoh, thi noh vünüh kümnyi viküvehri kenüh kürohmtüthuoh, anyi tsari notha vü nüh!

²⁰Noh tsatüvü kühiete vünüh noh nüh mari küthimtüthuoh, anyiri romzhi vünüh; noh kümnyi kükhu vünüh noh nüh, mari küjehte nü küsaluo mizhiri vünüh totemthuoh.

²¹VÜWA tü kütsia küvüwa saluo, küpakenühnyunü ma nüh aküngo sasheh nü, ma mükükhaphrükhale küümzewa hi küütsa kenüh, anyuji küsü wuküm kümjie hi tü thuote küm vü.

²²Hi tü eh küpretsaprelo vünüh, “Hi tü noh notha vünüh zhe kületsuomthuoh,” ti küza. Thitü noh nüh eh küzhiekekükhuori künatü, küükra kenüh hi nüh noh vü küzie vü.

²³VÜWA kümzeluo, nohri kümtseri aveh! VÜWA tü küzhütsanyitsari müshie veh, thitü kuotikuoshi nü zanyoküsari thuoüji, hozake vünüh thuotsütsüti.

²⁴Müzho luo, thi noh luoveh tü ji luo, nohri VÜWA huo küvehri aveh!