Read Pochuri Naga KÜREIHIRI 32 Bible Online

KÜREIHIRI 32 - Pochuri Naga bible

KÜREIHIRI 32

¹Küphrürie nojakümri thuoüji kümngatsari, thara kükhiemuo nü satemtü thuoh ünüh.

²Anyi thawa nü VÜWA nüh künakhie vü müchieketü nüh kümnga tsawa, thi thawa sietse vü kürieriekhri münyie nüh kümnga tsari.

³Hi nüh eh kükhiemuo müphrazhu thuoüji, arülo aveh vü eh külüchi vünüh eh satsa tü müsü tewathuoh,

⁴küpakenühnyunü arülo thi arüza noh ke tü, eh rügivü küüzho kenüh; eh kükhra tü küzhesa vü rünyi küsa vü üta küwehtewathuoh.

⁵Hi nüh noh vü eh kükhiemuo phrazhuveh thuoh, thi hi tü eh künakhie müküthi; hi nüh, “Hi nüh VÜWA vü eh küphrürie phrazhu naveh,” ti küza; jüti sanü noh nüh eh kükhiemuo aküzih nojatsü.

⁶Jükenüh thari nü nyitsa veh ünüh jümari aveh thuoüji, noh vü akükhuo kütsüluo; müshekümnomna tsotho vü, ajuh khielohta liküveh, jümari nga ma mphara.

⁷Noh tü eh kenüh küüthi azhie küsü, küsühro vünüh noh nüh hi müshie; noh nüh küvizhuwa vi nü hi mükieshe.

⁸Noh khiemawa leh vü küwa leh ünüh noh süphie tsü naveh; eh notha vi hi nüh noh rügivü thse nü zhühphie naveh.

⁹Rawuh nyutü sarüliehrawuh küthsü kümshi mükünyie kümjie müsatüm, jüma tü küphetevüh thi kümkotevüh nüh mpheteji mümhie, jüta mükünyunü jüma tü noh vü küpehwa nyu.

¹⁰Kümsüküsari tü zhi kümnomna sanaveh thitü thawa nüh VÜWA vü alehno veh ünüh, mükükhaphrükhale küümze nüh ma mükieshe veh.

¹¹VÜWA vü alowie luo, thi nyierakhruo luo, O künyitsari, thi künyitsari loküzhe vünüh zie luo, nohri luoveh lovü kümshori aveh!