Read Pochuri Naga KÜREIHIRI 33 Bible Online

KÜREIHIRI 33 - Pochuri Naga bible

KÜREIHIRI 33

¹VÜWA vü nyierakhruo luo, O nohri künyitsari! Küsiake tü kümshori küngule.

²Topito vi VÜWA sia luo, loso türake atakhu vi nü ma vü khiküzü sa tsüluo!

³Ma vü zah kürüthe satsüluo, Khuthsüshe taji ziekümsieluo,

⁴küpakenühnyunü VÜWA zhü tü müshoküm kenüh; thi ma küüroh aveh tü kütsotüke vünüh küsahthuoh kenüh.

⁵Ma tü künyitsa thi kümsho lo; azhihwa tü VÜWA mükükhaphrükhale küümze nüh pro.

⁶VÜWA zhü vünüh atülüri tü sa, thi ma po rütho vünüh jümara thopahiri aveh sa.

⁷Ma nüh juhküji ajuhri tü, lehuo küsü lovü küvizhuh üta vizhuh; ma nüh aküshehri tü aluovü thse.

⁸Azhih aveh tü VÜWA küükrü luo, azhih vü kürhori aveh tü ma kükrü vünüh kütsie luo!

⁹küpakenühnyunü ma nüh phrahte, thi jüti sa; ma nüh azhütsü, thi jüma tü toke.

¹⁰VÜWA nüh akuoküjiri küzhühphie vi momaküsa vü küütuveh; ma nüh anyiri kürüzhe vi saküümietsüveh.

¹¹VÜWA küzhühphie tü küsuokürho toke veh, ma luoveh kümshe tü awuhle aveh vü pehveh.

¹²Akuohji khiemawa Saküüwuowa nü VÜWA nüh kümkawa, ma ka kümjie vünüh anyiri thawa rüka sa veh ünüh kümnga!

¹³VÜWA tü atülü vünüh noküturu aveh, ma tü anyira tsari aveh ngu veh;

¹⁴ma kükajipe khiela shupehveh ünüh jüla nüh noküze veh, azhih vü kürhori aveh vü,

¹⁵ma nüh mari luoveh aveh saküje tü veh, thi mari saküsari aveh thsüveh.

¹⁶Kaji küsü tü ma thopahiri hozake vünüh mükülole; arieküsari küsü tü ma kükhra küji nüh müvizhu.

¹⁷Arie rawuh tü kükhrara kenüh küluozhe müjuju küsü, thi ma kükhra küji nüh jüma mükülole ra.

¹⁸Halie, VÜWA notha tü ma kükrüri vü pehveh, ma mükükhaphrükhale küümzetü küluozheri vü pehveh,

¹⁹jüvü nüh ma nüh mari kürholi aküsü vünüh vizhura naveh, thi kümkhuojih vü mari akürho vü sara naveh.

²⁰Hiri kürholi tü VÜWA huopeh veh; ma tü hiri küükrawa thi ajohuowa.

²¹Ah, hiri luoveh tü ma vü alowie veh, küpakenühnyunü hiri tü ma kümtse nyo alehno küveh kenüh.

²²Noh mükükhaphrükhale küümze tü, O VÜWA, hiri vü küpehwa saluo, hiri nüh noh vü küluozhe kümjie.