Read Pochuri Naga KÜREIHIRI 34 Bible Online

KÜREIHIRI 34 - Pochuri Naga bible

KÜREIHIRI 34

¹ Hi tü tsotho aveh VÜWA tsiatsü naveh; ma küsiake tü mükütuo nüh eh po lovü tü naveh.

²Eh kürholi tü VÜWA vünüh kükuoti sa; kümnomnawa tü küna nü alowie luo.

³O hi sie nü VÜWA saküji luo, thi hiri kürü nü ma nyo sakümsie luo!

⁴Hi nüh VÜWA phahthuoh, thi ma nüh hi kühuthuoh, thi eh kükrü aveh vünüh hi vizhuthuoh.

⁵Ma vü noluo, thi wiezhiluo; jüta thuoüji nohri anyieh tü piketü küzükrüwa nyuthuoh.

⁶Anyi kümkhuo hamatü zie, thi VÜWA nüh ma künatsü, thi ma küsühro aveh vünüh ma külolethuoh.

⁷VÜWA zhühleri nüh ma kükrüri kürünape sa mükiele, thi mari vizhu.

⁸O VÜWA tü mühiem ti küsa müpo thi noluo! Anyi thawa nüh ma vü kümnyipe vi veh ünüh külozhewa!

⁹O VÜWA krü luo, nohri ma nyiri, küpakenühnyunü ma kükrüri küzüla mükünyieh kenüh!

¹⁰Amiewuo atsari tü münyie nüh rüma tsetseti; thitü VÜWA küphahri thuoüji zanyo kümhieh mükünyie müsa.

¹¹Raluo, O atsari, eh zhü künaluo, VÜWA kükrü hi nüh nohri sosietsü naveh.

¹² Anyi mokümjie küsa thawa nü akürho müngu veh lo, thi arülo hozake mnguvehlo, kümhie ngunta küsakenüh?

¹³Kümsü vünüh noh mizhi khetem luo, thi kürieriekhri küphrahte vünüh noh pomieh khetem luo.

¹⁴Kümsü vünüh kari luo, thi kümhie saluo; luoveh kürüzih phah luo, thi jüma zhe luo.

¹⁵VÜWA notha tü künyitsari vü pehveh, thi ma khüna tü mari nüh küzie vü pehveh.

¹⁶VÜWA nyieh tü kümsü küsari vü ruohluo veh, azhih vünüh mari kümshekewa tehthuo nta.

¹⁷Künyitsari nüh zie nü kükra kükhuo vü, VÜWA nüh künatü veh, thi mari küsühro aveh vünüh mari vizhu tüveh.

¹⁸VÜWA tü luovehkuokümri shehnyi veh, thi sietse vü zonyahkümri külole veh.

¹⁹Künyitsari tü kümnomna nga zhim; thitü VÜWA nüh jümari aveh vünüh vizhutsü veh.

²⁰Ma nüh ma rüri aveh küjehte veh; jümari küsü nga müzokhuo.

²¹Kümsü nüh kümsüküsa rehthem naveh; thi künyitsari kümrhüri tü mshemsümü naveh.

²²VÜWA nüh ma siepera kürho rhehsa veh; ma vü kümnyipe küviri thuoüji nyi küsü nga mshe kümsüwa nyu.