Read Pochuri Naga KÜREIHIRI 35 Bible Online

KÜREIHIRI 35 - Pochuri Naga bible

KÜREIHIRI 35

¹Kürünyuo luo, O VÜWA, hi sie kürünyuori sie kürünyuotüluo; hi sie küsaluori sie saluo tüluo!

²Ajoh huo thi senyusevi küjehke luo, thi eh kükra kenüh sühraluo!

³Avi thi awiephrü khake nü hi zhekütseri vü! Eh kürholi vü, “Hi tü noh küvizhu,” ti küza luo!

⁴Mari tü küzükrü thi müküsiakesiakhri vü thsem luo, eh kürho ase phahkütseri! Jümari asevü küsühlem thi kürüzam luo, thari nüh hi vü kümsü aro saveh ünüh!

⁵Jümari tü amürhü tüvü müthakuh kümjie küsam luo, VÜWA zhüleri sie nü mari zhezhujam taji!

⁶Mari aleh tü küzo thi küchom luo, VÜWA zhüleri nüh mari küzhe taji!

⁷küpakenühnyunü ma zhühnyo münyie nüh, eh kenüh mari aneh küthi salalati; mazhühnyo münyie nüh eh kürholi kenüh, mari nüh azhikrie chüh salalati kü kenüh.

⁸Mükümshe vünüh mari vü küferie küru luo! thi aneh mari nüh küthi küsawa nüh mari küzam luo, ferie na küsa kenüh mari tü jüma lovü külukem luo!

⁹Jüti sanü eh kürholi tü VÜWA vü nyierakhruo naveh, ma nüh küvizhu vü rietsi taji.

¹⁰Eh rü aveh nüh, O VÜWA, thawa nü noh kümjie lo, noh küthachuri küvizhuwa, ma vünüh ma tü ma ke nüh müzho sheh, küthachuwa thi küthohtsawa tü ma vünüh, ma prüviteküwawa vünüh vizhumtsü ülo, ta küza naveh.

¹¹Apovüri tü süra; mari tü hi nüh müküthsü zanyori hi vü khuo.

¹²Mari nüh kümsü vi kümhie thuotsü; eh kürholi tü saküülorütsü.

¹³Thitü hi tü, mari na küveh vü, hi tü atsahkie müphie, Hi tü eh lü vünü eh tüso rügivü küngietsuo kükhuo sa,

¹⁴hi nüh eh füwa nyutü eh nü kenüh shüthuoke wie nga; nyi küsü nüh ma zah kenüh kürümuo kümjie, hi tü küngietsuo thi külu nü tsetewa.

¹⁵Thitü eh jih kümshü vü mari tü loküzhe vünüh sezhuh, mari tü sezhuh nü hi wuluo; mari thari nüh hi nüh müküthsüri mükütuo nüh hi mshemsühuo;

¹⁶mari nüh hi küzhiküzhia riesa, mari aha hi vü hahrike.

¹⁷Küthake, O VÜWA, noh tü hi nopeh na lo? Mari hi zorietsü nta küsa vünüh hi külole luo, amiewuori vünüh eh kürho külole luo!

¹⁸Jüta thuoüji hi tü ashieji küji vünüh, hi nüh noh kümnatsü naveh; no kükajipe kükhra vünüh hi nüh noh siake naveh.

¹⁹ Hi mükünongüri tü müküleh vünüh, eh nyiehvü nyieramkükhruo tümluo, thi hi kümrhüri tü ma zhühnyo mükünyie vünüh, hi vü nothamkükhro tümluo,

²⁰küpakenühnyunü mari tü kütsarü müphra, thitü azhih hamawa vü zota küpehri vü saluom, mari tü kürieriekhri zhüri mohm.

²¹Mari tü hi vü mari apo ka müzha; mari nüh “Aha, Aha! hiri notha nüh jüma ngumthuoh,” ti sa.

²²Noh nüh nguthuoh, O VÜWA; zoti müpeh tüm! O VÜWA, hi vünüh mületsuo tüm!

²³Noh mpa no mchüke taji eh kümsho kenüh sühraluo, eh kenüh eh Saküüwuowa thi eh VÜWA!

²⁴Hi sakümshotsüluo, O VÜWA, eh Saküüwuowa, noh künyitsa müzhe taji; thi mari tü eh nyiehvü nyiera mükükhruo tümluo!

²⁵Mari tü mari mpa nüh, “Ah, hiri tü hiri luoveh kümngu pehveh,” Mari tü, “Hiri nüh ma müzhumthuoh” ti müküza tümluo.

²⁶Mari tü küzükrü thi küsühpha ti vü thserhiemtüluo, eh lokürü nyierakükhruori vü! Mari tü küzükrü thi müküchiekürhe vi kümphie luo, thari nüh mari mpa hi vü saküji veh ünüh!

²⁷Thari hi nüh phrateküümshokütsü mnguveh ünüh aloküwie kenüh zie luo, thi jüma nyiehvü nga, “Kajiwa tü VÜWA, ma tü ma siepewa kümhie no nü lozheveh,” ti küza.

²⁸Jüta thuoüji eh mizhi tü noh künyitsa küza naveh, thi rülo küsuo aveh noh küsiake küza naveh.