Read Pochuri Naga KÜREIHIRI 37 Bible Online

KÜREIHIRI 37 - Pochuri Naga bible

KÜREIHIRI 37

¹Kümsüküsari kenüh no kütsaza msatümü, Kümsüküsari no nüh kümngu msatüm!

²küpakenühnyunü mari tü are kümjie shita wane tewa naveh, thi zhihkhane kümzhi kümjie wazhüm naveh.

³VÜWA lehnoluo, thi kümhie saluo; jüta thuoüji azhihwa vü kürho sara naveh,

⁴VÜWA nolo luo, thi ma nüh noh müshe küsangü tsü naveh.

⁵VÜWA vü noh leh tsüm luo; ma vü alehnoluo, jüta thuoüji ma nüh satsü naveh ünüh.

⁶Ma nüh noh phraküümshokütsü tü aküwie kümjie vizhutsü naveh, thi noh kümshowa tü küzheto vü kümjie vizhutsü naveh.

⁷VÜWA tüvü zoti peh luo, thi ma kenüh küzhike nü peh luo; ma leh vü kütsarhiewa no nü kütsaza msatüm, aro kümsü vikütse anyiwa no taji!

⁸Arüküshu vünüh küzhi luo, thi rükümtho kule luo! Noh mpa nüh noh küsüro kütsü msatümluo,

⁹küpakenühnyunü kümsüküsa thuoüji vijam na küveh kenüh; thitü VÜWA huoküpehri thuoüji azhihwa mükate naveh.

¹⁰Tsotho pike sevü, kümsüküsari tü, münyie nüh sam nathuoh; noh nüh ma zhiewa no wie ketünga, ma tü jüla küpehlawa nyuthuoh.

¹¹Thitü sakürnyikütseri thuoüji azhihwa mükate naveh, thi mari mpa nüh küwale kütsarhienyurhie vünüh nolo naveh.

¹²Kümsüküsawa nüh künyitsari vü küjojoti, thi ma vü aha hahriri ti;

¹³thitü VÜWA nüh kümsüküsawa vü kükhrikhri ti, küpakenühnyunü ma rülo tse ta küsa ma nüh ngu küveh kenüh.

¹⁴Kümsüküsawa tü anyusuowa shozhu nü mari lawih heheti, kümkhuowa thi küthohtsawa vikütsuo na küsa kenüh, kümsho vünüh kütsewa kürhiethe na küsa kenüh,

¹⁵mari nyuchuwa tü mari mpa mari luoveh lovü tu naveh, thi mari lawih tü jim naveh.

¹⁶Kümsüküsari nüh hozake vü nüh küwale küpeh thuoüji, künyitsari nüh pike küpeh nüh kümpha khe,

¹⁷küpakenühnyunü kümsüküsawa apie tü jim na küveh kenüh; thitü VÜWA nüh künyitsawa vite pehpehti.

¹⁸Kümte mükünyiewa rülori tü VÜWA nüh thsü veh, thi mari aka tü küsuokürho küpeke naveh;

¹⁹kümsü tsotho vü mari tü küzükrü vü müthse, kümkhuojih rülori vü mari tü küwale sa.

²⁰Thitü kümsüküsawa tü küpokah mümti, thi VÜWA mükünongüri thuoüji, kütholahthovü arekümzhi kümjie; mari tü ratewawa ti, mari tü anyikhu kümjie ratewawa ti, mari tü ratewa veh, nyikhu üta mari tü ratewa veh.

²¹Kümsüküsawa tü nanati, thi müthuo lera nüh sasati, thitü künyitsawa thuoüji sihkha thi tsütsüti;

²²küpakenühnyunü VÜWA nüh tsiatsüküsari thuoüji, azhihwa müka naveh, thitü ma nüh müzükümri thuoüji vijam naveh.

²³Anyira lekhari tü VÜWA vünüh thi ma nüh thawa leh vü nolo veh ünüh ma nüh vizhutsü veh;

²⁴ma nüh külum wie ketünga, ma tü alü vünüh saküshowa nyu, küpakenühnyunü VÜWA nüh ma ke vü küpehwa küsa kenüh.

²⁵Hi tü rünguo thitü khinyi nü khruomthuoh; tü künyitsawa kuleküm hi tü müngu nyutü ma tsari lohse khuotsa kütse müngu.

²⁶Ma tü mnyishiwiethuo nüh tsü thi küüna peh huoveh, thi ma tsari tü kütsiaküvüri küsü sateru veh.

²⁷Kümsü vünüh kari luo, thi kümhie saluo; jüta thuoüji nohri tü küsuokürho küpeke naveh,

²⁸küpakenühnyunü VÜWA tü kümsho loküm kenüh; ma tü ma nyiri kükulewanyu. Künyitsari tü küsuokürho müshie naveh, thitü kümsüküsawa atsari thuoüji vijam naveh.

²⁹Künyitsawa nüh azhihwa müka naveh, thi jümawa vü küsuokürho jüla kürho sanaveh.

³⁰Künyitsawa apo thuoüji kümtsa phra veh, thi ma mizhi tü kümsho phraphrati.

³¹Saküüwuowa khonyo tü ma luoveh lovü tü veh; ma lekhari tü münyicho.

³²Kümsüküsawa tü künyitsawa no veh, thi ma rehthe nta phah veh.

³³VÜWA tü ma mpa ma kümzho vü kuleküjawanyu, nyutü ma shi küsa vü mshemsü nü küjawanyu.

³⁴VÜWA huo luo, thi ma leh vü saluo, thi ma nüh azhihwa kümka nta noh saküji naveh; thi kümsüküsawa küzorie phah naveh.

³⁵Hi nüh kümsüküsa nyi küsü ngu, thi Lebanon müsethso üta kuoshikükuo hi nüh ngu.

³⁶Hi nüh kariwa lehü, thi halie, ma tü münyie nüh sam la; hi nüh ma phah wie ketünga, ma tü mphahra nüh sam.

³⁷Kümte mükünyie nyiwa thi kümshonyiwa noluo, küpakenühnyunü luovehkürüzih nyiwa kenüh thuoüji, kümwumra peh küveh kenüh.

³⁸Thitü küphrürieri thuoüji, aveh nga zoriem naveh; kümsüküsawa küshuküra thuoüji vijam naveh.

³⁹Künyitsawa külole tü VÜWA vünüh; mari küsühro tsotho vü ma tü mari kümnyipe.

⁴⁰VÜWA nüh mari kükra thi mari vizhu veh; kümsüküsawa vünüh ma nüh mari vizhu veh, thi mari küülole veh, küpakenühnyunü mari tü ma vünüh kümnyipe viküveh kenüh.