Read Pochuri Naga KÜREIHIRI 38 Bible Online

KÜREIHIRI 38 - Pochuri Naga bible

KÜREIHIRI 38

¹Nyi Küsü Kümnomna kenüh Saküümhie Kükhuo. O VÜWA, noh rüküshu vünüh hi vü müshüke tümluo, nyutü noh rükümtho vünüh hi müphrasosie tümluo!

²küpakenühnyunü noh shüchuri tü hi vü retekütuthuoh kenüh, thi noh ke tü hi vü teküturuthuoh kenüh.

³Eh satsa vü kümtsa mnyie eh kükhiemuo kenüh; eh rüri vü nga kümtsa münyie,

⁴küpakenühnyunü eh künakhie tü, eh lü rügivü tekükuothuoh kenüh; eh kenüh jümari tü akhuo küüzho küsü kümjie küzhom.

⁵Ehküna thsopori tü mkunta, hi mpa hi küzhe kenüh.

⁶Hi tü khemti küngie tsuo thi mükhehke, rülo aveh vü hi tü shükheke nü küwaküru sa.

⁷Eh küshih tü khielota tso kümthuoh kenüh, thi eh satsa vü kümtsa münyiethuoh.

⁸Hi tü phashekemthuoh thi sanyahkemthuoh; hi tü eh luoveh küüraküpre kenüh hi tü lüchih.

⁹VÜWA, hi nüh müngu küpeh aveh tü noh vünüh thsüvehthuoh; eh külüchi tü noh vünüh müküthi thuoh.

¹⁰Eh luoveh tü kütie veh, thi eh kümzho tü sazih veh; thi eh notha küwie nga hi vünüh tewa thuoh.

¹¹Eh füri thi rehfüri tü eh sanakükho vünüh letsuomthuoh, thi eh küshuküranyiri tü lehküsuo vü tsietewathuoh.

¹²Eh kürho küphahri nüh mari küjurüri khe sa veh, hi küümnomna nta küphahri tü küferie phrahte veh, thi rülo aveh ajü aroküshi müshephoke veh.

¹³Thitü hi tü kürüpori küsü kümjie hi tü müküna, azhümküphrarari nyi küsü ma po müküka üta, hi tü apo müka.

¹⁴Ah, hi tü müküünarari nyi küsü kümjie, thi apolovü küshüke mükünyieri kümjie.

¹⁵Thitü noh kenüh thuoüji, O VÜWA, hi tü noh kühuo sa veh; jüma tü noh, O VÜWA eh Saküüwuowa, noh nüh rületsü wie naveh,

¹⁶küpakenühnyunü hi nüh, “Mari tü eh nyieh vü nyiera müküükhruo tüm wie luo, eh mpha nüh künyicho vü, thari nüh hi vü kuotikuoshi veh ünü,” ti khuo,

¹⁷küpakenühnyunü hi tü külum na küsa vü peh kümthuoh kenüh, thi eh küna tü hi vü peh huo tse wie.

¹⁸Hi tü eh künakhie phrahzhu veh, hi tü eh kükhiemuo kenüh luoveh naveh.

¹⁹Zhünyo münyie nüh hi küümaküshiri tü khra sheh veh, thi müküleshe vünüh hi kümrhü tü peh khem.

²⁰Hi nüh kümhiewa asenyiküm kenüh, kümhie kenüh kümsü vi hi tsükümri tü hi küwuluori.

²¹Hi mükule tümluo, O VÜWA! O! eh Saküüwuowa, hi vünüh mületsuo tümluo!

²²Aküpre vünüh hi küükra satsüluo, O VÜWA, eh küülolewa!