Read Pochuri Naga KÜREIHIRI 39 Bible Online

KÜREIHIRI 39 - Pochuri Naga bible

KÜREIHIRI 39

¹Hi nüh, “Eh lehri huo naveh, jüta thuoüji hi tü eh mizhi vi mükhiemuo nüh samhie veh; hi nüh eh po khete naveh, kümsüküsawa nüh, eh tsatüvü küpeh küju nü,” ti küza.

²Hi tü azhü müphra thi zoti peh, hi tü eh luoveh kürüzih vü nüh küpe tü zhühnyo mshu nüh sam; eh müshekümnomna tü kümsü tewa,

³eh luoveh tü hi vünüh satewa. Hi nüh kümüshephohke üta anyih tü jutewa, jüti küsa vü hi tü eh mizhi vi phrahte taji:

⁴VÜWA, eh sehkhewa küüthsüluo, thi eh rülori küütewa tü mowa nüh; eh kürho tü mokümjie kuopretewathuoh ünüh hi küthsüluo!

⁵Halie, noh nüh eh rülori tü, amüzaküji pike mpa satsü, thi noh notha vü eh kürhotsotho tü, moma küsa kümjie samtü. Anyiri küsüküsü nga arütho küsü mpa nüh, tsie küveh kümjie tsa wie!

⁶Anyiri tü arüzhe küsü kümjie tsewatseru ti küsa ta wie! Mari tü zhünyo mkünyie vünüh küruohkürahküveh tsa wie; anyiri nüh müjuke veh, thi thawa nüh sazhuh naveh ünüh müthsü!

⁷Thi khinyi thuoüji, VÜWA, hi tü mokenüh huo veh lo? Eh küluozhe tü noh vü pehveh.

⁸Eh küphrürie aveh vünüh hi vizhu luo. Hi tü zanyomküthsüwa nüh mükümsanyi tümluo!

⁹Hi tü azhümphrara, hi tü eh po müka; küpakenühnyunü jüma tü noh nüh sakütsü kenüh.

¹⁰Hi vünüh noh nüh küfewa vitewaluo, hi tü noh nüh kütoh vünüh kükhra münyiethuoh.

¹¹No tü nyuri phrataji küsosie vü mari kükhiemuo kenüh, noh tü mütharü nüh küzorie üta mari nüh külowa zoriemümti; anyiri tü küsüküsü nga arüthoküsü tsa wie!

¹²“Eh kükhuo künatsüluo, O VÜWA, thi eh kükrie vü künaluo; eh rüthsü vü noh luoveh kürünyi müküjehte tümluo! küpakenühnyunü hi tü ru nü teküwa noh küzeh wie, aküpriri küsü, eh pari aveh kümjie.

¹³Hi vünüh notheriem luo, jüta küsa vünüh hi tü aloküwie thsü mhie veh, hi tü tewa nü münyie nüh sa küm müjie küsa tüvü,” ti küza!