Read Pochuri Naga KÜREIHIRI 40 Bible Online

KÜREIHIRI 40 - Pochuri Naga bible

KÜREIHIRI 40

¹Hi tü küzhike nü VÜWA huo; ma tü hi vü kümrheke thi eh kükrie künatsü.

²Küüzo zhikrie lovü nüh ma nüh hi shohzhu, anyuohnyi küünyuo vünüh hi vizhu, thi eh mpha vi alokrü küsü rügi vü satsü, eh lekhari tü saküütotsü.

³Ma nüh eh po lovü azah kürüthe thsetsü, hiri Saküüwuowa vü küsiake zah küsü. Anyi hozake wienga ngu thi krünaveh, thi VÜWA vü mari alehküno thse.

⁴Thawa nüh VÜWA vi ma lehkünowa sa veh ünüh, kümnga tsawa, thawa nüh kürhieza vü müsühle nüh müküleh nyiazari vü temküwari vü!

⁵Noh nüh saküzhimthuoh, O VÜWA eh Saküüwuowa, hiri wuovü noh küngo küüroh thi noh kümsheri; nyi küsü nga noh sie kümtera münyie luo! Hi nüh mari zhüchüh thi küza ti küsa, mari tü küchiera nyieh vünüh wiethuoh.

⁶Noh tü küsahthuo thi zanyoküthsüri mümngu; thitü noh nüh akhüna küsaphie vi hi tsü. Noh tü kütso kükhurü, thi kükhiemuo kükhurü küvileh nyu.

⁷Thinü hi nüh, “Halie, hi tsethuoh; külu lasipha küsü lovü hi zhüku tü rhüsa veh;

⁸Hi tü noh kümshe küsa lom, O! eh Saküüwuowa; noh khonyo tü eh luoveh lovü tü veh,” ti küza.

⁹Küvizhu aloküwie zhüle hi nüh küza, ashieji aküji vü küzathuoh; halie, hi tü eh pohmie mükhete, noh nüh küthsü üta, O VÜWA.

¹⁰Hi tü noh nüh küülole küükra eh luoveh lovü müküthi, hi nüh noh kütsotüke thi noh küülolera phrahtethuoh; hi tü noh mükükhaphrükhale külo, thi noh kütsotüke müküzhühwu ashieji aküjiwa vünüh.

¹¹Noh tü, O VÜWA, noh külohna hi vünüh küjehke temwa tümluo, noh mükükhaphrükhale külo thi noh kütsotüke tü, küsuokürho hi kümshie luo!

¹²küpakenühnyunü mküürührhüra kümsüri nüh, hi mükieshekümthuoh kenüh; eh künakhieri nüh eh nyiehvü tewa thuoh, hi nüh müküngura küju; mari tü eh lü rügivü ashehri nyiehvü nüh; eh luoveh tü hi sazihmümti.

¹³Lozhetüluo, O VÜWA, hi vizhu tü nti! O VÜWA, hi kükra nti presü luo!

¹⁴Mari tü aveh kürü küzükrü vü, thi küsüpha vü thsem luo thari nüh eh kürho prütewa nta phahveh ünüh; mari tü asevü küüsühle, thi müküsiakesiakhri vü viküürum luo, thari nüh hi saküümnomna müngu veh ünüh!

¹⁵Mari küzükrü kenüh mari tü azühküüngeke luo; mari tü hi vü, “Ngatsa, ngatsa” ta sa!

¹⁶Thitü noh küphahri aveh tü noh vü nyierakhruo thi aloküwie luo; noh küülolera küümzeri tü mükütuo nüh, “Aküjiwa tü VÜWA lie,” ti küüphrahte luo!

¹⁷Eh kenüh thuoüji, hi tü mükhuo thi thsohtsa; thitü VÜWA nüh eh kenüh müshe veh. Noh tü hi küükrawa thi hi küvizhuwa; müküzhike tümluo, O! eh Saküüwuowa!