Read Pochuri Naga KÜREIHIRI 41 Bible Online

KÜREIHIRI 41 - Pochuri Naga bible

KÜREIHIRI 41

¹Kümkhuori kenüh kümshewari thuoüji akütsia küvütsari, küsühro rülo vü VÜWA nüh mari vizhutsütsüti;

²VÜWA nüh ma nyuote thi akürho vü sa ra veh; ma tü azhihwa vü akütsiaküvüwa ta ji veh; noh nüh ma vi ma mükünongüri kümshe vü müthse.

³VÜWA nüh ma künaze rügi vünüh ma sakürhotsü veh; ma küsaküna vü noh nüh ma küna aveh sakümhietsü veh.

⁴Eh kenüh thuoüji, hi nüh, “O VÜWA, hi vü lozhisheh luo; hi sakümhie luo, küpakenühnyunü hi tü noh vü khiemuo kümthuoh kenüh,” ti küza!

⁵Hi mükünongüri nüh romizhi vünüh hi phra taji: “Ma tü küsie sü nathuoh luo, thi ma nyo tü pokah nathuoh lo?” ta küza veh.

⁶Thi nyi küsü nüh hi no nta küru vü, ma tü momaküsa zhüri vi hi vü phrahte, ma luoveh tü rokümsü küvizhuh vü; ma tü alievü küwa vü, ma nüh jüma vi küza nyuoh.

⁷Hi kümrhüri aveh tü kürü eh khuhke zhühwe veh; mari tü eh kenüh kümsütsatsa müshezhu veh.

⁸Mari nüh, “Küsüra zanyo nüh ma rügi vü khetemthuoh; ma khiela zeh veh ünüh jüla nüh ma tü, müsühra lerathuoh,” ta küza.

⁹Eh wietsa füwa hi nüh alehno kütsewa nga, eh lohse tsa kütsewa nga, ma mütseh hi vü khakemthuoh.

¹⁰Thitü noh tü, O VÜWA, hi vü lozhisheh luo, thi hi kha küsühraluo, jüta küsa vü nüh hi tü mari müthoh sara mhie veh nü!

¹¹Noh tü hi vü lozhe veh ta küsa hi nüh hama vünüh thsü veh, jüma vünüh hi mükünongüwa tü, eh nyiehvü khrate mwa.

¹²Thitü eh kümhieju kenüh noh nüh hi küjehtethuoh, thi küsuokürho noh tsa tüvü samthuoh.

¹³ VÜWA tü kütsiaküvüwa saluo, Israel Saküüwuowa, küsükürho vünüh küsükürho küju! jütisaluo thi jütisaluo.