Read Pochuri Naga KÜREIHIRI 49 Bible Online

KÜREIHIRI 49 - Pochuri Naga bible

KÜREIHIRI 49

¹Hama künaluo, anyiri aveh! Künaluo, azhih vü arhie ri aveh,

²küsajiwa nga thi kümsiewa nga, künyirhie thi kümkhuowa masükhürü nga!

³Eh po tü kümtsa phrahte naveh; eh luoveh kümshephoke tü küthsükümshiwa sanaveh.

⁴Eh khüna tü noh küthsüzhü vü kümrheke naveh; hi nüh eh küzo küphrahtewa topito arügivü sake naveh.

⁵Küsüro tsotho vü hi tü mokenüh krü na lo, hi kümrhüra künakhieri nüh hi kümkiele vü,

⁶anyi mari künyirhie vü lehkünori nüh thi mari künyierhie küüsheküsha kenüh kürhiehza vü?

⁷Nyi küsü nga ma mpa ma müthuotsüra tsa, nyutü Saküüwuowa vü ma kürhowa ame mütsüra,

⁸küpakenühnyunü ma kürho thuokütsü tü khrashehküm kenüh, thi müwalera tsa wie,

⁹jüti sanü ma tü küsuokürho rhora, thi küphiekewa müngu nüh sam.

¹⁰Ah, kümtsari nga küsü ma nüh ngu naveh, küzhewa thi küzhephrozhenyiewa nga küzarike vünüh pokah wie naveh, thi mari künyirhie tü küpari vü samtü naveh.

¹¹Mari rükunyieri tü küsuokürho mari azheh, wuhle aveh vü mari kürhope azhieri, ma mpa nüh mari nüh azhihri mari vü mpa nüh thoh wie ketünga.

¹²Anyiri tü maloküra saküpehuoranyu, ma tü samwari kümjie ratewa naveh.

¹³Lekhuji hamatü mari mpa zhetaji msheküüjiri kenüh, mari mpa ma souperi müshe nü lozhe kütseri jüta sana.

¹⁴Nyihzhü üta mari tü küsürazhie kenüh chiekemthuoh; aküsü nüh mari kühuowa sanaveh; mari tü kümshoti arüku lovü tetsuo na thuoh, thi mari atso tü tsetewa naveh; Küsürazhie tü mari zhehlo sanaveh.

¹⁵Thitü Saküüwuowa nüh küsürazhie kümzhowa vünüh, eh kürholi thuotsü naveh, küpakenühnyunü ma nüh hi sieke na küveh kenüh.

¹⁶Nyi küsü nüh nyirhieküm vü mükrü tüm, ma zheh kütholahthovü zhiküwa vü,

¹⁷küpakenühnyunü ma küsü vü ma tü, zanyoküsü nga viküwawa nyu; ma kütholahthovü tü ma sevü nyi kütsuowa nyu.

¹⁸Ma kürho vü nga ma tü ma mpa loküzhe vü chieke, nyi küsü nüh kümhie küsa vü ma tü küsiake ngu wie ketünga,

¹⁹ma tü ma para wuhle vü wa naveh, ma tü aküwiewa müngulera wiethuoh.

²⁰Anyiri tü ma loküra saküpehuoranyu, ma tü samwa kümjie rate wana.