Read Pochuri Naga KÜREIHIRI 50 Bible Online

KÜREIHIRI 50 - Pochuri Naga bible

KÜREIHIRI 50

¹Kükhrawa, Saküüwuowa VÜWA, küza nü azhihwa jizhuh luo, rünyi küshu vünüh ma kütu küju.

²Zion vünüh, küzü küjutsawa, Saküüwuowa nüh wiezhu veh.

³Hiri Saküüwuowa tü ru naveh, ma tü zota mpeh, ma tüvü tü kütsorie anyih küsü pehveh, tsomrhü kükhra küsü ma mükie veh.

⁴Ma nüh kümsie atülüri ji veh thi azhihwa tü jüti sanü ma nüh, ma nyiri ashih sana küsa kenüh:

⁵“Küzhütsanyitsari hi vü sezhuh luo, küsahthuo vünüh hi sie kütsathuozhü küsü saküsari,”

⁶Atülüri nüh ma künyitsa küzazhu veh, küpakenühnyunü Saküüwuowa ma mpa nüh, ashih küviwa küsa kenüh!

⁷Künaluo, O eh nyiri, hi nüh küza naveh ünüh, O Israel, hi nüh noh povüzhü tsü naveh ünüh. Hi tü Saküüwuowa, noh Saküüwuowa.

⁸Noh küsahthuori kenüh hi tü noh phrakümsü müsa; noh kütso kükhurü tü eh tüvü peh huo veh.

⁹Hi tü noh zheh vünüh shüvotsazah küviwa nyu, nyutü noh nyihnyihzah vünüh nyisüvo küviwa nyu,

¹⁰küpakenühnyunü aküze vü samwa küsüküsü nga eh zhi, anyie küsü küzhihori vü mieshümiesari.

¹¹Amürhü vü müwari aveh hi nüh thsü veh, thi atovü küngah küpehri aveh thuoüji eh zhi.

¹²“Mükütüküzü hi tü avorüma thuoüji, hi tü noh vü küüzawa nyu; küpakenühnyunü azhihwa thi, ma lovü küpeh aveh tü eh zhi küsa kenüh.

¹³Hi tü shüvotsazahri sazhü tsa ülo, nyutü anyihsüra züh zhu ülo?

¹⁴Saküüwuowa vü kümnakütsü küsahthuo tsüluo, thi kümsietsawa vü noh küüshieküphrahzhuri thse luo;

¹⁵thi küsühro tsotho vü hi ji luo; hi nüh noh vizhu naveh, thi noh nüh hi sakütholathovü naveh.”

¹⁶Thitü Saküüwuowa nüh kümsüküsari vü thuoüji: Noh tü eh zhühkheri rüzhechina küsa mowa kümsho pehveh lo nyutü eh kütsathuozhü noh pomie vü tse ülo?

¹⁷küpakenühnyunü noh tü saküüto mam, thi noh tü eh zhüri noh se vü jaküzemthuoh.

¹⁸Mükütüküzü noh tü kürühuri ngu thuoüji, noh tü ma füwa sasati; thi küüphroküphrieri sie riekhuo sasati.

¹⁹“Noh tü noh po vi kümsü vü thse, thi noh mizhi tü kürieriekhri nüh atsonyie sa.

²⁰Noh tü shupeh nü noh nü phrakümsüsüti; noh tü noh mpa noh zah atsa küjojoti.

²¹Noh nüh hamari sa thitü hi tü zoti peh; noh nüh hi tü noh kümjie küsa küsü ta müshe. Thitü khinyi thuoüji hi nüh noh shüke naveh, thi noh tüvü azhühzhowa sanaveh.

²²Hama müsheluo, nohri Saküüwuowa küümari, hi nüh müjie kümzürie vünüh, jüti sanü nyi küsü nga nüh, küvizhu mükünyie müjie küsa vünüh!

²³Thawa nüh ma küsahthuo kümnakütsü viru veh ünüh, hi küchiekürhe sa veh; thawa nüh ma leh tü müsho veh ta sa veh ünüh, hi nüh Saküüwuowa küülole küjokütsanaveh,” ta küza.