Read Pochuri Naga KÜREIHIRI 62 Bible Online

KÜREIHIRI 62 - Pochuri Naga bible

KÜREIHIRI 62

¹küpakenühnyunü Saküüwuowa mpa nüh küüzhe vünüh, eh kürholi huoküveh wie; ma vünüh eh küülole ru veh.

²Ma mpa wie nüh eh lokrüwa thi eh küülolewa, eh shiehku kümzhowa, hi tü jisheh nü küüsewa nyu.

³Ma külorie na küsa kenüh noh tü, küthake anyi rügivü peh na lo, kürüngake azie küsü kümjie, kükelekeza rüpe küsü kümjie na ülo?

⁴Mari tü ma küthola vünüh ma saküütsuotsa nta kümshe mpawie, mari tü müküleh vü loküzhe sa veh. Mari tü mari apo vünüh tsiatsü veh, thitü alovü thuoüji mari tü müzüzüti,

⁵küpakenühnyunü Saküüwuowa mpa nüh, küüzhezhü vünüh eh kürholi huote küveh kenüh, küpakenühnyunü eh küluozhe tü ma vünüh küsa kenüh.

⁶Ma mpa wie nüh eh lokrüwa thi eh küülolewa, eh shiekukümzhowa; hi tü küüngahwa nyu.

⁷Eh küvizhuwa thi eh küsiakesiakhriwa tü, Saküüwuowa vü münyie veh; eh lokrü kükhrawa, eh kümnyipewa thuoüji Saküüwuowa.

⁸Tsotho aveh ma vü alehnoluo, O anyiri; ma tüvü noh luoveh küshozhu luo; Saküüwuowa tü hiri kenüh kümnyipewa.

⁹Kürünyie kürho nyiri tü arütho küsü wie, kümsie kürho nyiri tü mazhünyo mkünyie küsü wie; küütoku lovü nü kütothuoüji mari tü rügi vü tewaveh; mari tü arütho nyiehvü nüh müphieh.

¹⁰Nyurazhi prüküvi vü no mtsotü tümluo, Rühukütsari rügivü momaküsa küluozhe müthse tüm; mükütüküzü künyirhie zhi wie ketünga, nohri luoveh jümari rügivü müthse tümluo.

¹¹Saküüwuowa nüh küsükeri küzathuoh, hama hi nüh künyikeri künarathuoh: kükhra jüma tü Saküüwuowa zhi;

¹² thi jüma tü noh vü, O VÜWA, mükükhaphrükhale küümze zhi sa veh, küpakenühnyunü noh nüh anyi küsü müthoh thuotsü veh, ma küüroh müzhe taji.