Read Pochuri Naga KÜREIHIRI 69 Bible Online

KÜREIHIRI 69 - Pochuri Naga bible

KÜREIHIRI 69

¹Hi külole luo, O Saküüwuowa! küpakenühnyunü ajuhri tü eh ku vü teruju kümthuoh kenüh.

²Hi tü anyuohnyi küsheh vü kuoretekütu kenüh, ampha künyikepe mükünyie kenüh; hi tü ajuh küshehri vü terumthuoh, thi küüshüh nüh eh nyiehvü müzhiewumthuoh.

³Hi tü eh küzie vünüh mnomthuoh; eh khuti kükhromthuoh. Eh notha tü zote wathuoh eh Saküüwuowa huo taji.

⁴Eh lü sheh nyiehvü nüh zhi, mazhühnyo münyie nüh hi kümrhüri; hi zorie nta küsari tü khra sheh, akürie vünüh hi küprüri. Hi nüh mowa mürühu nüh hi tü, khinyi tsümümle üji mümhie ülo?

⁵O Saküüwuowa, noh nüh eh küzhehphro thsü; hi nüh küsa mükülehri tü noh vünüh küthi müsa.

⁶Noh vü küluozhe küpehri tü hi vünüh, küzükrü vü vimthse tümluo, O kükhratsari VÜWA Saküüwuowa; noh küphahri tü hi vünüh, müküchiekürhe vü vi müküru tümluo, O Israel Saküüwuowa,

⁷küpakenühnyunü jüma tü noh rieh nüh hi tü küüjo vümthuoh, jüti sanü küzükrü nüh eh nyieh küzhutemthuoh.

⁸Hi tü eh jienüri vü küzehri küsü samthuoh, eh zah tsari vü alieri samthuoh.

⁹Noh zheh kenüh kütsazaküsa ehlo vü juphrierakeveh, thi noh kümsamnyi küsa kümsamnyiri tü, hi vü tsuotsakem thuoh.

¹⁰Hi nüh assa sanü eh kürholiri saküürünyie vü, jüma tü eh küüjo sateru.

¹¹Hi nüh atsahkie vi eh thsümnyi küsa vü, hi tü mari vü küzhuühnyuo küsü sateru.

¹²Hi tü akheri vü shuküpehri küphrahtewa samthuoh, thi kümsheri nüh azah sa hi mükiele veh.

¹³Thitü eh kenüh thuoüji, eh kükhuo tü noh vü wie, O VÜWA, küvikütse tsotho vü, O Saküüwuowa, noh mükükhaphrükhale küümze küwale vünüh hi rületsüluo. Noh kütsotüke küükra vi,

¹⁴anyuohnyi lovü kuoshehteküwa vünüh hi külole luo; hi tü eh mükünongüri vünüh, thi küsheh juhri vünüh küüvizhu luo,

¹⁵anyuoküza nüh eh nyiehvü müküüthüwu tümluo, nyutü aküsheh nüh hi müküümzhu tümluo, nyutü küphieke nüh eh nyiehvü, ma po müküüshükheke tümluo.

¹⁶Hi rületsüluo, O VÜWA, küpakenühnyunü noh mükükhaphrükhale küümze tü, mühieküm kenüh; noh küwale külohna müzhe nü, hi vü sühle luo.

¹⁷Noh siepewa vünüh noh nyieh müküthi tümluo; küpakenühnyunü hi tü müshemnokümna vü, pehküm kenüh, shiti hi rületsüluo.

¹⁸Hi shenyi raluo, hi rhehsaluo, hi mükünongüri kenüh lejatsüluo!

¹⁹Eh küüjo noh nüh thsü, eh küzükrü thi eh müküchiekürhe noh nüh thsü; eh küümaküshiri aveh tü noh vünüh thsü.

²⁰Kümsamnyi nüh eh luoveh zokhuomthuoh, jüta küsa vünüh hi tü luovehzahm thuoh, hi nüh noküümze no, thitü küsü nga müngu; thi luoveh sakürüzihri no, thitü hi tü küsü nga mphahra.

²¹Ashie kenüh mari tü kümzhi vi hi tsü, thi eh küürieh kenüh mari nüh kükhaju vi hi küzhu.

²² Mari tüvü mari shiekütsape tü küjurü küsü sateru; mari küsahthuo khuri tü piejü küsü küsam luo.

²³Mari nothari tü küüzom luo, jüta thuoüji mari tü müngura thuoh; thi mari küshih tü küükhe peh huom luo.

²⁴Noh rükümthowa tü mari vü küshokem luo, thi noh rüküshu küjuzhu tü mari küüriehm luo.

²⁵Mari kürünape tü küüzoküza küsü küsam luo, nyi küsü nga mari juhthsüri vü müküürho tümluo,

²⁶küpakenühnyunü noh nüh sosiekütsüri tü mari nüh sakümnomnatsü, thi noh nüh saküümsamnari tü mari nü müsheke.

²⁷Mari vü kümnomna nyiehvü nüh kümnomna thsephetsüluo; mari tü noh vünüh noküja müküpeh tümluo.

²⁸Kürho lasipha vünüh mari tü vizhujam luo; mari tü künyitsari aza vü mküüchieketümluo.

²⁹Thitü hi tü münomnamthuoh thi aküna vü pehmthuoh; noh küülole, O Saküüwuowa, hi vi kümsie vü saluo!

³⁰Hi nüh azah küsü vi nü Saküüwuowa nyo siake naveh; kümnakütsü vi nü hi nüh ma saküji naveh.

³¹Shüvotsa küsü nyiehvü nüh, hama nüh VÜWA sakülozhe naveh nyutü shüvotsazah küsü rütsü, thi tüwuoh küpe nyiehvü nüh VÜWA saküülozhera naveh.

³²Kümrüri tü jüma küüngu nü aloküüwie luo; noh Saküüwuowa küphahwa, nohri luoveh tü saküürholeluo,

³³küpakenühnyunü VÜWA tü küthohtsari künatü veh, thi ma mpa ma nyi kürhoküsi saküvehri tü ma nü mja.

³⁴Atülü thi azhih tü ma küüsiakeluo, juhküjiri thi ma lovü küngah kütseri, azanyo aveh ma küüsiakeluo,

³⁵küpakenühnyunü Saküüwuowa nüh Zion küülole na küveh kenüh, thi Judah nyujiri tü sale na küveh kenüh; thi ma sieperi tü jüla kürho sanaveh, thi jüma mükate naveh;

³⁶ma siepara tsari nüh jüma aka vi naveh, thi ma nyo külori nüh jüla kürho sanaveh.