Read Pochuri Naga KÜREIHIRI 7 Bible Online

KÜREIHIRI 7 - Pochuri Naga bible

KÜREIHIRI 7

¹O VÜWA eh Saküüwuowa, noh vünüh hi tü eh kümnyi vi veh; hi zhekütseri aveh vünüh hi külole luo; thi hi vizhutsüluo,

²amiewuowa küsü kümjie mari nüh hi mürhühmjisü nüh, hi netewa, nyi küsü nga hi mükülole nüh.

³O VÜWA eh Saküüwuowa, mükütüküzü hi nüh hama sam thuoüji, mükütüküzü eh ke künyi vü müküleh üji,

⁴mükütüküzü hi tü kümsü vi eh füwa thuole thuoüji, nyutü azhühnyo mükünyu vünüh hi mükünongüwa prüvitewathuoüji,

⁵mükünongüwa nüh hi küüzhe luo thi hi küüpha luo, ma nüh azhih vü eh kürho küünyite luo, jüti sanü eh kürholi azhitho vü küzeh luo.

⁶Sühraluo, O VÜWA, noh rüküshu vünüh, hi mükünongüri ahe sie wuluo na küsa kenüh noh mpa nüh toke luo; sühraluo, O! eh Saküüwuowa, noh nüh ashih küsü kütekemthuoh nü.

⁷Anyi kümhuwa tü saküsezhuh nü noh küümkieshe luo; thi jüma rügivü noh pe kümsie vü khake luo.

⁸VÜWA nüh anyiri ashih sasati; hi künaluo, O VÜWA, eh künyitsa müzhe nü, thi hi vü kümhieju müzhe taji.

⁹ O khuhkekümsüra kümsü tü sehkhe küüsam luo, thitü noh tü künyitsari vizhutsüluo, noh tü amüsheri thi luovehri müteteti, noh tü künyitsa Saküüwuowa.

¹⁰Eh johuo tü Saküüwuowa vü pehveh, ma tü luovehkümshori küloletsü veh.

¹¹Saküüwuowa thuoüji künyitsa shihküsari küsü, thi ma tü rülotsotho arümtho küpeh Saküüwuowa küsü,

¹²Mükütüküzü nyi küsü nüh luovehmükhaphrü thuoüji, Saküüwuowa nüh ma nyuchuwa küzah naveh; ma nüh ma lawih li he savehthuoh;

¹³ma tü ma küsü senyuseviri küchemthuoh, ma shüchuri arükütü shüchuthsoh sasaveh.

¹⁴Halie, khukekümsüwa tü kümsü mohmohti, thi kümsü moh nüh aküriewuo zhuzhuti.

¹⁵Ma tü azhikrie küsü phiephieti, jüma chühzhuzhuti, thi ma nüh saküsa küpie lovü külukeketi.

¹⁶Ma kümsü tü ma mpa ma lü rügivü sheleteruruti, thi ma mpa ma lokrieh rügivü ma küvürie teruruti.

¹⁷Hi nüh VÜWA vü ma künyitsa kümna kütsü lehwa tsü naveh, thi hi nüh VÜWA nyo vü küsiake zah satsü naveh, Kümsie Tsawa.