Read Pochuri Naga KÜREIHIRI 73 Bible Online

KÜREIHIRI 73 - Pochuri Naga bible

KÜREIHIRI 73

¹Saküüwuowa thuoüji künyitsari vü mühie tsam, luoveh lovü kümtseri vü.

²Thitü eh kenüh thuoüji, eh mpha tü müshüketsa nta küsa vü pehmthuoh, eh lekhari tü nyicho na küsa vü pehmthuoh,

³küpakenühnyunü hi tü kükuotikuoshi noküüma kenüh wie, hi nüh kümsüküsara kütsarhienyurhie küngu vü,

⁴küpakenühnyunü mari tü kümnomnari mükünyie kenüh; mari satsa tü khra thi müzho.

⁵Anyi küpari kümjie mari tü küsühro vü pehm veh; anyi küpari kümjie mari tü müsamna.

⁶Jükenüh kürhiezarhiechi tü mari azho; athsü küsü kümjie küwusawurieh nüh mari küzhute.

⁷Aküthü nüh mari notha tü vüzhu, mari luoveh tü aküzhe nüh promzhie.

⁸Mari tü romizhi vi küriesarienyi phrahte; müsie sheh nü mari tü mürüküvehri sakükrü.

⁹Mari tü atülüri vü mari apo thse, thi mari mizhi tü azhihwa vü mnyishi nü phrateveh.

¹⁰Jükenüh anyiri tü sühle nü mari siake; thi mari vü müküleh müngu.

¹¹Thi mari nüh, “Saküüwuowa tü khiela nüh thsüra na lo? Kümsietsawa vü aküthsüpehveh ülo?” ta sa veh.

¹²Halie, hamari tü kümsüküsari; kürüzih vü peh nü mari tü künyirhie vü zhiwa.

¹³Hi tü müjuju vünüh eh luoveh sakümtsemthuoh, thi mükükhieh vünüh eh ke khrümthuoh,

¹⁴küpakenühnyunü rülo küsuo ajü hi kürhie kütsü kenüh, thi arüne kürüzhu phrasosie.

¹⁵Mükütüküzü hi nüh, “Hi nüh hakümjie vünüh phrahte naveh,” ta küza thuoüji, hi tü münyitsanüh samnathuoh noh tsara wuhle vü.

¹⁶Thitü hama mokümjie thsümshi naveh ünüh, ta hi nüh müshe thuoüji, jüma tü eh kenüh kükhoküürohküsa küsü thuoh

¹⁷hi nüh Saküüwuowa kümtsezheh lovü müjie küwa küju nü; jüti sanü hi tü mari sehkhe thsü naveh.

¹⁸Noh nüh mari vü küücho azhieri vü satsamthuoh; noh nüh mari tü küferie vü küülukemthuoh.

¹⁹Sütsuo küsü vünüh mokümjie mari tü zoriem lo, kükrüküngori nüh ra khehm wie!

²⁰Mari tü nyi küsü nüh küsühra vü amoh küsü kümjie, küsühra vü noh nüh mari rüzheri küma sa.

²¹Eh kürholi tü khaküm vü, eh luoveh lovü shüphieküm vü,

²²Hi tü zhehphro thi müküchiesa, hi tü noh wuovü samwa küsü kümjie.

²³Jüta wie ketünga hi tü noh vü nyitse huowieveh; noh nüh eh azhie wuovü küjeh tse veh.

²⁴Noh nüh noh kümshe vünüh hi küjotse, hasevü nüh noh nüh hi kütholathovü vü vike naveh.

²⁵Noh küchie nüh atülü vü hi tü thawa pehveh lo? thi azhih rügivü noh wie küchie nüh, zanyo küsü nga eh kümngu münyie luo.

²⁶Eh sazhü thi eh luoveh tü sazih mühie veh, thitü Saküüwuowa tü eh luoveh kümzho, thi küsuokürho eh suopewa,

²⁷küpakenühnyunü halie, noh vünüh, letsuoteküwari tü pokahm na küveh kenüh; noh vü mükülehri tü asehkhe vü thsemümti.

²⁸Thitü eh kenüh thuoüji, Saküüwuowa küshehnyi nüh mühie, hi nüh VÜWA Saküüwuowa tü eh kümnyipe samthuoh, jüta küsa vü nüh hi tü, noh küürohri aveh küza ra na küveh kenüh.