Read Pochuri Naga KÜREIHIRI 76 Bible Online

KÜREIHIRI 76 - Pochuri Naga bible

KÜREIHIRI 76

¹Judah vü Saküüwuowa nüh thsümthuoh, Israel vü ma nyo tü ji.

²Ma lojipe tü Salem vü vishusa vehthuoh, ma kürhope azhie thuoüji Zion vü pehveh.

³Ma nüh jüla küürieh shüchuri zoshimtü, ajoh huo, anyuchuwa, thi arie senyuseviri.

⁴Kütholathovü tü noh, küsoukürho aküzhiri nyiehvü nüh.

⁵Rienyiri luovehküjiri tü mari künyiewa kümiemthuoh; mari tü zemophokete thuoh; arie nyiri aveh tü mari ake vi zanyo müküsara samthuoh.

⁶Noh nüh küshüke vü, O Jacob Saküüwuowa, rawuh thi ma rügivü kütse masü khürü tü mütsamngo tewa.

⁷Thitü noh tü, kükrüküngowa! Thawa nüh noh tüvü tsiera na lo küsükeri noh rüküshuwa tü shuteru thuoüji?

⁸Noh nüh atülü vünüh ashiküsa phrahzhutsü; azhihwa tü krü nü zoti pehtewa,

⁹Saküüwuowa nüh ashih küsa vishu nta küsühra vü, azhih vü kümrüri aveh külole nta.

¹⁰Nyiri rükümthowa tü noh siake naveh; rükümthowa kümntiewa tü noh nüh noh rügivü tseke naveh.

¹¹VÜWA noh Saküüwuowa vü noh küphrahzhuzhüri satsüluo, thi jümari saluo; ma mükieshe nü pehküvehri aveh tü aküte ma mükrü üji mükümhiewa vü viru luo,

¹²ma nüh kajitsara sietse tehthuomtü naveh, ma tü azhihwa kajiri nüh kükrüküngowa.