Read Pochuri Naga KÜREIHIRI 78 Bible Online

KÜREIHIRI 78 - Pochuri Naga bible

KÜREIHIRI 78

¹Künaluo, O eh nyiri, eh küsosie vü; eh lovü azhüri vü nohri khüna kümrheke luo!

² Küüzhühie küsü vünüh hi nüh eh po ka naveh; Khana vü küüzari hi nüh phashu naveh,

³hiri nüh künaraküm thi thsüküm azanyori hiri pari nüh hiri vü küza kümri.

⁴Jümari hiri tü mari tsari vünüh küüthiwa nyu, thitü kürule wuhle vü küza naveh. VÜWA nüh kütholathovü küürohküsari, thi ma kükhra, thi aküngori ma nüh sa.

⁵Ma tü Jacob vünüh povü küsü vishu, thi Israel vü khonyo küsü küteke, jüma tü ma nüh hiri pari vü ma tsari sosie üta azhütsü;

⁶jüti küsa vünüh wuhle künyiawa tü, jümari thsüra naveh, thi mari tü sühra nü jümari vi ma tsari vü küza naveh,

⁷jüti sanü mari küluozhewa tü, Saküüwuowa vü sara naveh, thi Saküüwuowa küürohri müküna nüh sanaveh, thi ma nüh azhükütsü sara naveh;

⁸thi jüta sanü mari tü mari pari kümjie müsanüh sanaveh, müküzhike thi azhümküüna wuhle küsü, mari luoveh tü müküpeh huo wuhle küsü, mari sietse tü Saküüwuowa vü müküzhütsanyitsa.

⁹Efraimri tü alawih vi nü, arie rülo vü asevü sühleteru.

¹⁰Mari tü Saküüwuowa kütsathuowa müsanüh sam, thitü ma khonyo müzhe nü kütse kürüm.

¹¹Ma nüh mowa sanüh mari tü kümam, thi mari vü küükrükükrari küütsa kümam.

¹²Mari para notha vü ma nüh küükrükükra küüroh, Egypt zhih vü, Zoan zhuhri vü.

¹³ Ma nüh juhküji küsuomtü thi, mari tü jüma tseküükari sa, thi ajuhri tü küchizhuhke kümjie satsü.

¹⁴Rülo vü thuoüji ma tü akülu nüh mari küjotsü, thi arüza aveh thuoüji anyih küwie küsü nüh mari küjotsü.

¹⁵Shünyiza vü ma nüh alokrüri lokhuo, thi aküsheh vünüh kümjie ma nüh, mari vü küwale vünüh küzhu.

¹⁶Ma nüh alokrüwa vünüh akuzari küüshuru, thi ajuhri tü arühgu kümjie küüli.

¹⁷Tü mari tü ma vü khiemuo wie hü, areza vü kümsietsawa azhümvi nüh siesaluo.

¹⁸Mari luoveh vünüh mari Saküüwuowa müte, ashie mari nüh münguthuoke nü kükhuo vünüh.

¹⁹Mari nüh Saküüwuowa küluosa phrahte taji, “Saküüwuowa nüh reza vü, ashiekütsape küchetsü ra naveh ülo?

²⁰Ma nüh alokrüwa küürhie vünüh, ajuh tü pouzhuru thi akuzari tü liküpro. Ma tü alohse nga tsüra naveh ülo, nyutü ma nyiri vü asa tsotsüra naveh ülo?” ti küza.

²¹Jükenüh, VÜWA nüh küünara vü, ma tü arükümtho nüh protewa; Jacob vü anyih küsü tsoküze, ma rüküshu tü Israel vü tekuo;

²²küpakenühnyunü mari tü Saküüwuowa vü, kütsotü mükünyie kenüh, thi ma küülole kükhra vü aleh mküno kenüh.

²³Tü ma nüh arügi kümsie vü azhütsü, thi atülü mükhieri satsü,

²⁴thi ma nüh mari küütsa nta mari rügi vü marü küüturu; jüti sanü atülü atsuowa mari vü tsü.

²⁵Anyiri tü rügizhülera lohse tsa; ma nüh mari vü ashie küüsheküsha vünüh tsü.

²⁶Ma nüh zhiehshu mürhü tü atülü vü küümrhü sa, thi ma kükhra vünüh ma nüh zhiehseh mürhü sie zhu;

²⁷ma nüh asa zhitho kümjie rütsü, juhküjiri shünyi kümjie aküsa küpe müwari rütsü;

²⁸ma nüh mari kürünape zhila vü jümari küütsuotsa, mari kürhope aveh mükieleshe.

²⁹Thi mari tü tsa taji müwa mühiesheh, küpakenühnyunü mari nüh mowa münguthuoke nüh, ma nüh kütsü kenüh.

³⁰Thitü mari nüh mari kümnguthuokewa müjie kütsükheh tüvü, mari po lovü ashie tüwie küveh vünüh,

³¹Saküüwuowa rüküshu tü mari vü süra luohsa, thi ma azhievü kümzhotsawa kürhiethem, jüti sanü Israel nyiri kümjihzhuwa sakürünyiem.

³²Hamari aveh azhievü nga nüh mari tü khiemuo wie hü; ma küngo azhievü nga mari tü mütsotü nüh sa.

³³Jükenüh ma nüh mari rülo tü arütho kümjie küüram, thi mari mahviri tü kükrüküngo vünüh küüram.

³⁴Ma nüh mari kürhietheküm vü, mari tü ma phah; mari tü luovehkhaphrü nü tsaza taji Saküüwuowa phah.

³⁵Mari nüh Saküüwuowa tü mari lokrü ta müsheke, kümsietsa Saküüwuowa tü mari kürhesawa ta müsheke.

³⁶Thitü mari tü mari apo nüh ma rie nü sieke; mari tü mari mizhi nüh ma vü riem.

³⁷ Mari luoveh tü ma wuovü mükükhaphrükhale müsa; mari tü ma kütsathuozhüwa vü müzhütsa.

³⁸Tü ma nüh, rüthaküna kenüh, mari künakhie nojatsü, thi mari müzorie nüh sam; ma nüh ma rüküshu küzhim, thi ma rükümtho aveh mükükezhu nüh sam.

³⁹Ma nüh mari tü asa ti küsa vünüh müsheke, amürhü tü mürhü ru veh thi shele müru le.

⁴⁰Küzakele nga mari tü reza vünüh, ma zhümvi nüh siesaluo na lo, thi reza vünüh ma sheküsüm!

⁴¹Mari tü ma mütelele ti sa, thi Israel kümtsewa arüsakümthom.

⁴²Mari tü ma kümzhowa amüshe lovü müsa, nyutü küümaküshiwa vünüh ma nüh, mari kürhehsa amüshe lovü müsa;

⁴³ma nüh Egypt vünüh athsoshiri küsa vü, thi Zoan zhuhri vünüh ma küükrükükrari amüshe lovü müsa.

⁴⁴Ma nüh mari rühguri tü azüh saküjemtü, jüti sanü mari tü jümara kuzari nüh müzhura nüh sam.

⁴⁵Ma nüh mari azavü wiehzü küüzhüh küze, thi awuhri nüh mari zoriem.

⁴⁶Ma nüh mari luoshüri vi akrehvüh vü tsüm, thi mari küürohkükho thsovi vi nü ashukrie vü tsüm.

⁴⁷Ma nüh rahzhi vi mari rheliviri küzoriemtü, thi mari jichuori awehjuh nüh zoriemtü.

⁴⁸Ma nüh mari mieshümiesari vi rahzhi vü tsüm, thi mari nyihnyihri vi nyiazamüvüri vü tsüm.

⁴⁹Ma nüh mari vü arüküshu kükrükhre küze, arükümtho, thi müshekümnomna küze, jümari nü küzorie rügizhüleri nga nyi küze.

⁵⁰Ma rüküshu kenüh ma nüh lekhuji küsü sa; ma nüh mari tü aküsü vünüh mümshie, thitü mari kürho vi kümnomnaküji vü tsüm.

⁵¹Ma nüh Egypt vü küwuo khu aveh rehthem, Ham juhthsüzhehri vü mari kümzho küshu khuwa.

⁵²Jüti sanü ma nüh ma nyiri tü nyihzhü kümjie sie wa, thi nyihnyih kümjie rezavü mari küjotsü.

⁵³ Ma nüh mari tü küloji vünüh siewa, jüti küsa vünüh mari tü kükrü münyie nüh sa; thitü juhküji nüh mari mükünongüri külüwutem.

⁵⁴Jüti sanü ma nüh mari sie kümtse zhih vü sieru, ma ke azhie wuovü nüh küchara azhihwa vü.

⁵⁵ Mari tüvü nüh akuoküjiri noh nüh zhejam; asuope kenüh ma nüh mari vü totsü, thi Israel kuohri vi mari juhthsüzhehri vü küüjuh.

⁵⁶Tü mari tü kümsietsa Saküüwuowa müte thi azhümvi nüh sa, thi ma pohvüri mümzhe nüh sam,

⁵⁷Jüti sanü mari pari üta sühle tewa thi aroküshisa; mari tü kürieriekhri lawih küsü kümjie kürühküükhom,

⁵⁸küpakenühnyunü mari nüh mari azhie kümsieri vi taji, arüsaküshu nü ma rüsakümtho küm kenüh, mari nüh kükhrüke atsori vi nü, ma saküüngah taji noküüjizhi sa.

⁵⁹Saküüwuowa nüh küünara vü, ma tü arükümtho nüh pro, thi ma nüh Israel tü kuleja khehm.

⁶⁰Ma nüh Shilo vü kürho kulem, ma nüh anyiri aza vü kürho juhthsüzhehwa,

⁶¹thi aküsiküsa vü ma kümzho vizhutsüm, ma kütholathovüwa vi küümaküshiwa ke vü thsem.

⁶²Ma nüh ma nyiri vi anyuchuwa rügivü thsem, thi ma ka rügivü ma rükümtho shuküze.

⁶³Anyih nüh mari vizari tsothem, thi mari rülavüri tü kümnyu zah münyie nüh sa.

⁶⁴Mari levüri tü anyuchuwa nüh külum, thi mari tünyivühri tü mükülu.

⁶⁵Thinü VÜWA tü aküzeh vünüh joküsühra üta, thi kümzhori nyi küsü nüh akhah kenüh küüzie üta.

⁶⁶Thi ma küwuluori zheküüshele üta, ma nüh mari küsükürho küzükrü vü thsemthuoh.

⁶⁷Ma nüh Josef juhthsüzheh kulemthuoh, ma nüh Efraim kuoh tü mürüka;

⁶⁸Thitü ma nüh Judah kuoh rüka, Zion küzhi, ma nüh külowa.

⁶⁹Ma nüh ma kümtsezheh tü atülü kümsie kümjie sa, azhihwa ma nüh küsuokürho kenüh vizhuküm üta.

⁷⁰Ma nüh ma siepewa David rüka, thi ma tü nyihzhüriekhuo vünüh ma vizhu;

⁷¹ma nyi Jacob thi ma kaküvi Israel küühuo nta anyihzhü avühri, atsa küpehri künyi vünüh sieru.

⁷²Ma nüh luoveh kümsho vi mari no, thi aküzhü ake vi mari küjotsü.