Read Pochuri Naga KÜREIHIRI 89 Bible Online

KÜREIHIRI 89 - Pochuri Naga bible

KÜREIHIRI 89

¹hi nüh noh mükükhaphrükhale küümze vü, azah sanaveh, O VÜWA, küsuokürho; eh po vi nü hi nüh awuhle aveh vü, noh künyitsazhütsa zhüchüh naveh,

²küpakenühnyunü noh mükükhaphrükhale küümze tü, küsuokürho vishukümthuoh kenüh, noh küzhütsanyitsa tü atülüri kümjie müzhom.

³Noh nüh, hi tü hi nüh rükaküsawa sie kütsathuo samthuoh, hi nüh eh siepe David vü küshiemthuoh:

⁴ Hi nüh noh küthsoküzhi küsuokürho vishu naveh, thi awuhle aveh kenüh noh kükajipe satsü naveh, ti küza üti küza.

⁵Atülü tü noh küngo küüsiakeluo, O VÜWA, kümtseri kümhu vü noh künyitsazhütsa siake naveh!

⁶küpakenühnyunü thajüwu vü thawa nüh, Vüwa vi kümjiera na lo? Atülü vü kürhori thawa nü VÜWA kümjie lo,

⁷kümtseri küshülü vü Saküüwuowa kükrüri küsü, ma mükie nü pehküveh aveh nyiehvü küji thi kükrüküngo?

⁸O VÜWA Saküüwuowa, thawa nü noh kümjie khra lo, O VÜWA, noh künyitsazhütsa noh mükie küvehri?

⁹Noh nüh juküji ahe nga takrü veh; ma nüh küshühzhuru thuoüji noh nüh saküüzohmümti.

¹⁰Samwa küsü kümjie ma nüh Rahab sanyah küm samthuoh, noh nüh noh pie kükhrawa vü, noh mükünongüri saküvohriemthuoh.

¹¹Atülü tü noh zhih, azhih nga noh zhi; azhihnyieh thi ma vü küpehri aveh, noh nüh jümari aveh phahzhu.

¹²Zhietü thi zhieshu, noh nüh jümasü jetsü; Tabor thi Hermon masü tü lozhe sheh nü noh nyo siake veh.

¹³Noh tü apie kükhra küsü pehveh; kümzhowa tü noh pie, noh ke azhie wuovü tü müsie.

¹⁴Künyitsa thi kümsho tü noh kükajipewa ajupe; mükükhaphrükhale küümze thi küzhütsanyitsa tü, noh tüvü wa veh.

¹⁵Loküzhe küzie jikhi küthsü nyiri tü kümngatsari, thawa nüh, O VÜWA, no tso küwie vü tse veh ünüh,

¹⁶thawa nüh rülo aveh vü noh nyo vünüh rietse veh ünüh, thi noh künyitsa küsieke tsüveh ünüh,

¹⁷küpakenühnyunü noh tü mari kümzho kütholathovüwa; noh küütso vünüh hiri rütsü tü sakümsiemthuoh,

¹⁸küpakenühnyunü hiri johuo tü VÜWA zhi küsakenüh, hiri kajiwa tü Israel kümtsewa vü.

¹⁹Khanavü noh nüh noh kütsotükewa vü, kümohtsa vünüh küphrahte sataji: Thawa nü khra veh ünüh, jümawa rügivü hi nüh kajilüwe thsetsümthuoh, anyiri vünüh kürükawa vü hi nüh sakümsie mthuoh.

²⁰ Hi nüh David phahra, eh siepewa; hi nüh kümtse vüjuh vi ma thsemtüthuoh;

²¹jüta küsa vünüh eh ke tü ma vü küpeke peh huo nathuoh, eh pie nga nüh ma sakümzho naveh.

²²Mükünongüwa tü ma nyie vü mwara, kümsüküsawa nga ma sa mkürünyiera.

²³Hi nüh ma küümaküshiwa ma tüvü nüh sanyahmtü naveh, thi ma kümrhüri kürhieküzehmtü naveh.

²⁴Eh künyitsazhütsa thi eh mükükhaphrükhale küümze tü, ma vü küütse naveh, thi eh nyo vünüh ma rütsü tü sakümsie naveh.

²⁵Hi nüh ma ke vi juhküji rügivü sanaveh thi ma ke azhie wuovü vi nü rühguri vü sanaveh.

²⁶Ma nüh hi vü, “Noh tü eh pa, eh Saküüwuowa, thi eh küülole lokrüwa,” ta zie naveh.

²⁷ Thi hi nüh ma tü vi nü küwuo khuwa sanaveh, azhih vü kajira kümsietsawa küüsanaveh.

²⁸Eh mükükhaphrükhale küümzewa tü, hi nüh ma kenüh küsuokürho sanaveh, thi ma kenüh eh kütsathuowa tü müzhoshe pehnaveh.

²⁹Hi nüh ma küriwa küsuokürho vishu naveh, thi ma kükajipewa tü atülüri rülori üta vizhutsü naveh.

³⁰Mükütüküzü ma tsari nüh eh Khonyowa kulem thuoüji, thi eh zhühkhori müzhe nü mütse thuoüji,

³¹mükütüküzü mari nüh eh zhühkheri vürie, thi eh zhükütsüri müsa, ti thuoüji,

³²Jüta thuoüji hi nüh eh zhietsüh vi nü, mari küphrürie sakümnomna tsü naveh, thi mari künakhie kenüh kümnomna tsünaveh;

³³thitü hi tü ma vünüh, eh mükükhaphrükhale küümzewa viküjawa nyu, nyutü eh küzhütsanyitsawa vü mükünyu küsawa nyu.

³⁴Hi tü eh kütsathuowa küvüriewa nyu, nyutü eh pomie vünüh shuküwa zhüwa mümzhi ra.

³⁵Küsükeri vünüh aveh kenüh, hi nüh eh kümtse vünüh küshiemthuoh; hi tü David vü küriewa nyu.

³⁶Ma küri tü küsuokürho pehwa naveh, ma kükajipe tü arünyi nüh eh tüvü, küthake pehwa naveh ünüh jüthake pehwa naveh.

³⁷Asa kümjie küsuokürho jüma tü vishu naveh; jüma tü thajüwuri pehküwa küju tsie nü povü sanaveh, ti küza.

³⁸Thitü khinyi nü noh nüh theraja thi kulemthuoh, noh tü noh nüh thsekümwa vü arükümtho nüh promthuoh.

³⁹Noh nüh noh siepewa sie kütsathuowa zoriemthuoh; noh nüh azhitho vünüh ma kajilüwewa sakümne mthuoh.

⁴⁰Noh nüh ma zieri aveh vürie mthuoh; noh nüh ma shiekuri küferie vü samthuoh.

⁴¹Jüla kariküwari aveh tü ma zhi müzhühvi kheh; ma tü ma zhephrura müküchieküzhü samthuoh.

⁴²Noh nüh ma küümaküshira ke azhie wuovü sakümsie mthuoh; noh nüh ma mükünongüri aveh tü, nyierakükhruo samtüthuoh.

⁴³Ah, noh nüh ma nyuchuwa zhieha kürelemtüthuoh, thi noh nüh arie vü ma müküütsie nüh samtüthuoh.

⁴⁴Noh nüh ma ke vünüh kajikütsühwa vimtüthuoh, thi ma kükajipewa azhih vü vijamtüthuoh.

⁴⁵Noh nüh ma küviza rülori sakümlumtüthuoh; noh nüh ma tü küzükrü nüh küzhutemtüthuoh.

⁴⁶Küthakele nga na lo, O VÜWA? Küsuokürho noh mpa nüh noh küthi na lo? Küthakelenga noh rükümtho tü anyih kümhie küüju na lo?

⁴⁷Müsheke luo, O VÜWA, akürho küüte tü mowa nüh, mowa momaküsa kenüh noh tü, anyira tsari aveh saküjethuoh lo!

⁴⁸Anyi thawa nü rhora taji aküsü müngu nüh sa wie na lo? Küsürazhie kükhrawa vünüh thawa nüh, ma kürholi vizhura na lo?

⁴⁹VÜWA, khanavü noh mükükhaphrükhale küümzewa khiela pehveh lo, noh küzhütsanyitsawa vünüh noh nüh, David vü küüshie müsa ülo?

⁵⁰Müsheke luo, O VÜWA, noh siepewa tü, mokümjie müchiemzhü thuoh ünüh; hi nüh mokümjie anyira müküchie eh tüso lovü, vü nüh,

⁵¹noh mükünongüri nüh jümawa vi nü müküchiesa, O VÜWA, mari nüh jüma vi taji noh nüh thsekümwa lekhari riesa.

⁵²Küsuokürho VÜWA tü kümgawa saluo! Jütisaluo, thi Jütisaluo.