Read Pochuri Naga KÜREIHIRI 94 Bible Online

KÜREIHIRI 94 - Pochuri Naga bible

KÜREIHIRI 94

¹O VÜWA, noh tü amüthoh küsa Saküüwuowa, noh müthoh küsa Saküüwuowa, wie zhuru luo!

²Süraluo, O azhih lesawa; kürhiezari vü mari Kümlie tsüluo!

³O VÜWA, kümsüküsari tü küthakele nga, küthakelenga kümsüküsari tü rietsi na lo?

⁴mari tü mari kükuotikuoshi zhüri küsho zhu, kümsüküsa aveh vünüh mari tü rhiezarhiechi.

⁵Mari tü noh nyiri sanyahjamthuoh, O VÜWA, thi noh ka sakümnomnaveh.

⁶Mari nüh tünyivühri thi aküpriri rehthem, thi apa mükünyieri fethem;

⁷thi mari nüh, “VÜWA tü ngu müveh; Jacob Saküüwuowa tü müshemveh,” ta küza.

⁸Thsüluo, O küzhetsatsa nyiri! küzheri, nohri tü küsie thsü na lo?

⁹Ma tü khüna sakütsü, ma tü mükünara ülo? Ma tü notha sakütsüwa, ma tü müngura ülo?

¹⁰Ma tü akuoküjiri phraküsosiewa, ma tü phramsosie ülo? Ma tü zanyoküthsü vi nyiri sosie veh,

¹¹ VÜWA tü anyira kümsheri thsü, mari tü athuoh, thitü arütho küsü wie.

¹²Noh nüh phraküsosie nyiwa tü kümngatsawa, O VÜWA, thi noh khonyo sosie zhu kütsüwa tü kümngatsawa.

¹³Küsühro rülori vünü kümnyie ma tsü na küsa kenüh, kümsüküsari kenüh küphieke müjie küchüh küju nü,

¹⁴küpakenühnyunü VÜWA nüh ma nyiri kükulewa nyu; ma nüh ma ka kütherajawa nyu;

¹⁵küpakenühnyunü künyitsari vü kümsho, tü sheleru na küveh kenüh, thi luoveh lovü kümshori aveh tü jüma müzhe naveh.

¹⁶Kümsüküsari vü thawa nüh, eh kenüh sühra tü veh lo? thawa nüh kümsüküsari vü eh kenüh tsietü veh lo?

¹⁷Mükütüküzü VÜWA nüh eh küükrawa müküsatüla, eh kürholi tü küüzo azhih vü shita rhoteküwa wie thuoh.

¹⁸Hi nüh, “Eh mpha nyicho vehthuoh,” ta kümshe vü, noh mükükhaphrükhale küümze nüh, O VÜWA, hi shohkütsie.

¹⁹Eh luoveh kütsaza küzhi vü, noh luoveh saküürüzih nüh eh kürho saküüwietsü.

²⁰Kümsüküsa takrüri tü, noh sie wuluora naveh ülo, Müküleri tü ale ta saranaveh?

²¹Mari tü kürü tsarü nü künyitsara kürho ruoluo, thi mükükhiehri müshemsü nü küsüm.

²²Thitü VÜWA tü eh shiekuwa samthuoh, thi eh Saküüwuowa tü eh kümnyipe lokrüwa samthuoh.

²³Ma nüh mari vü mari künakhiewa visheleru naveh, thi mari kümsüküsa kenüh mari saküümiemnaveh; VÜWA hiri Saküüwuowa nüh mari saküümiemnaveh.