Read Pochuri Naga KÜMTSAZHÜ 1 Bible Online

KÜMTSAZHÜ 1 - Pochuri Naga bible

KÜMTSAZHÜ 1

¹Solomon, David atsa, Israel kajiwa küthsüzhü:

²Anyi jümari tü kümahtsa thi süphiekütsü küüthsünta küsa kenüh küthsükümshi zhüri,

³aküthsü vünüh süphiekütsü vira, künyitsa, kümsho, thi küzarike;

⁴Küjülori vü kümahtsa tsü na küsa kenüh, vizari vü zanyoküthsü thi kümahtsa tsü na küsa kenüh,

⁵kümahtsa nyiri nga künara nü küthsüra vü küzhiküzhi wa na küsa kenüh, thi küthsükümshi nyiri tü küsara ngurana küsakenüh,

⁶küthsüzhü thi amke thsümshira na küsa kenüh, kümahtsarazhü thi mari kümshi thsümshira na küsa kenüh.

⁷ VÜWA kükrü thuoüji zanyoküthsü pokhuwa wiethuoh; zanyokümshiri thuoüji kümahtsa thi küsüphie mam.

⁸Künaluo, eh tsa, noh pa küsüphie, thi noh zah küsosie mükuleja tüm;

⁹küpakenühnyunü jümari tü noh lü kenüh sürie küsa kenüh, thi noh ku kenüh azhori.

¹⁰Eh tsa, mükütüküzü kükhiemuori nüh noh müraru thuoüji mazhüri mükünatümluo.

¹¹Mükütüküzü mari nüh, “Hiri vü nyiraluo, azüh küüthü na küsa kenüh huopeh la ünüh, hiri kürü müküüzhikera sanü, mükükhiehri thuola ünüh raluo;

¹²Küsürazhie kümjie hiri kürü mari akürho, thi ajü müzhu ünüh raluo, azhikrie lovü küturi kümjie;

¹³hiri tü akürhe zanyori aveh phahra naveh, hiri tü zhechieküvirari vi hiri zheh saküpro naveh;

¹⁴noh küzewa hiri azavü vehjake luo, hiri aveh ameküthseku küsü sanaveh ünüh,” ta wie ketünga,

¹⁵eh tsa, mari sie aleh jüri vü nyi mütse tüm, mari lekhuji vünüh noh mpha küpele luo;

¹⁶küpakenühnyunü mari mpha tü kümsü vü zhüwawati, thi mari tü azüh küthü nta preleprezazati,

¹⁷küpakenühnyunü müjuju vünüh aneh jaküütatati, amüwa küngu vü,

¹⁸thitü anyi hamari tü, mari mpa mari azüh kenüh huopehpehti, mari mpa mari kürho kenüh mari tü, aküthuo thsethseti.

¹⁹Jümari aveh lehkhuji tü, küvürie vünüh akünyia ngunguti; jüma tü ma mükaküvehra kürho vitewawati.

²⁰Kümahtsa tü aleküza vü zie kümsie tsetseti; asüküsape vü ma tü ma jikhi sakümsiesieti;

²¹külojuri rügivü ma tü ziezieti; anyujiwa kheriri lehpie vü ma tü azhüphrahte taji:

²²“Küthakelenga, O küjühlori, küjühloh lo na lo? Küthakelenga küriesarienyiri nüh, mari küriesarienyi na lo, thi zanyomküthsüri tü zanyoküthsü mülo nüh sapeh na lo?

²³Eh küsosiezhü mzhe nü kükheke luo; halie, hi nüh noh vü eh kümsheri küshoketsü naveh; hi nüh eh zhüri noh saküthsü naveh,

²⁴küpakenühnyunü hi nüh noh ji, thitü nohri nüh müküna nta samthuoh, eh ke thsuo küze, thitü nyi küsü nga mükükheke,

²⁵thi nohri nüh eh küzhüphie aveh müküchie samthuoh, thi eh küsosiezhü küsü nga küsawa nyu,

²⁶Hi nga nohri kümsü nokükhri naveh; ngosetu nohri vü ka thuoüji hi nüh riesanaveh,

²⁷tsomrhü kümjie küngo setu vü, thi nyiazamrhü kümjie noh lokürü küru vü, müshekümnomna thi amüsheküna nohri vü küru vü.

²⁸Jüta thuoüji mari tü hi ji naveh, thitü hi tü mari kürülewa nyu; mari tü kükhakükhe nü hi phah naveh, thitü hi mphahra,

²⁹küpakenühnyunü mari tü zanyoküthsü mükülo kenüh, thi VÜWA kükrü mükürüka kenüh,

³⁰eh küzhühphie küsü nga küsawa nyu, thi eh küsosiezhüri aveh mamü,

³¹jükenüh mari tü mari lehkhuji avi tsanaveh, thi mari mpa mari küüro rügi nüh makümlie nguna,

³²küpakenühnyunü küjühlori tü mari sühle teküwa nüh zothemthuoh, thi zanyomküthsüra mkütsaza nüh mari zorie veh;

³³thitü thari nüh eh zhükünaveh ünüh, kütote kürho sanaveh, thi kürüzih vü peh naveh, kümsü nüh samkükrüshike nüh,” ti küza.