Read Pochuri Naga KÜMTSAZHÜ 10 Bible Online

KÜMTSAZHÜ 10 - Pochuri Naga bible

KÜMTSAZHÜ 10

¹Aküthsü tsawa thuoüji apawa alo saküwie veh, thitü atsa zanyomküthsüwa thuoüji ma zah sa lokürüveh.

²Kümsüküsa vünüh künyiera tü kütsa münyie luo, thitü künyitsa thuoüji aküsü vünüh vizhura veh.

³VÜWA nüh künyitsari tü rüma mükütse, hitü ma nüh kümsüküsara kütsangü khetetüveh.

⁴Ake küthasüwa thuoüji küthotsa viruveh, thitü küükhakükhera ke thuoüji sa künyirhie ra veh.

⁵Atsa khiemawa nüh müzhü vü kütsaküzhu vizhuh veh ünüh kümahtsawa wiethuoh, thitü atsa khiemawa nüh kümahwie vü zeh veh ünüh küzükrü viruruti.

⁶Akütsia tü künyitsara lü rügivü pehveh, thitü kümsüküsara po thuoüji küvürievüsa küthiküsü.

⁷Künyitsara se thuoüji akütsia, thitü kümsüküsara nyo thuoüji prim naveh.

⁸Aküthsüluoveh thuoüji azhühnyori mzheveh, thitü zanyomküthsüwa thuoüji küfera vü teru naveh.

⁹Thawa nüh küzhühtsa vü tse veh ünüh ma thuoüji luoveh jinü tse veh, thitü thawa nüh ma lehri kürele veh ünüh ma ngum naveh.

¹⁰Thawa nüh anotha kükhro kütsa veh ünüh küsüro satsütsüti, thitü thawa nüh luovehze nü sosieveh nüh luoveh sakürziveh.

¹¹Künyitsara po thuoüji akürhowa küwuzhu küsü, thitü kümsüküsara po thuoüji küvürievüsa küüthiküsü.

¹² Kümrhü tü küsaluo sashutewa veh, thitü küümze thuoüji mküle aveh küzhutemümti.

¹³Thawa nüh thsümshi veh ünüh ma pomie vü kümahtsa ngura veh, thitü ase müküsa kenüh asevü azhietsüh sa veh.

¹⁴Aküthsüri thuoüji zanyoküthsü sazhuhzhuhti, thitü zanyomküthsü küzhewa thuoüji küferie vishehnyi ru veh.

¹⁵Künyirhiera künyirhie thuoüji ma nyuji kümzho; kümkhuora kümkhuo thuoüji mari küferie.

¹⁶Künyitsara kümlie thuoüji akürhowa vü siewa veh, kümsüküsara künyie thuoüji kükhiemuo.

¹⁷Thawa nüh küsüphie vü kükheke veh ünüh akürhowa lekhuji vü pehveh, thitü küsosie kuleküjawa thuoüji khazih tewawati.

¹⁸Thawa nüh kümrhü küthiküsü veh ünüh ma thuoüji akürie pomie pehveh, thi thawa nüh aküriezhü phrashu veh ünüh ma thuoüji zanyomthsü.

¹⁹Azhü küzhile vü, küphrürie mükünyie sam veh, thitü ma pomie küüzhiwa thuoüji azhüküzhü.

²⁰Künyitsara mizhi thuoüji kürüka rakasa; kümsüküsara müshe thuoüji ame küpeh zülam.

²¹Künyitsara pomie thuoüji anyi hozake avo sa tsü veh, thitü zanyomküthsüri thuoüji ase-müküsa kenüh süsüti.

²²VÜWA kütsia tü sakünyirhie veh, thi ma nüh jümawa vü luovehküna müthsephe.

²³Zanyomküthsü nüh mükünyu küsa thuoüji saküüzhie kümjie, thitü aküthsüwa khuoke thuoüji küthsükümshiwa vü lozheveh.

²⁴Kümsüküsawa nüh mowa krüshike veh ünüh ma vü ru naveh, thitü künyitsawa küsangü thuoüji satsü naveh.

²⁵Amürhükümsü nüh rukari küwa vü, kümsüküsari tü münyie nüh samümti, thitü künyitsari thuoüji küsuokürho vishumthuoh.

²⁶Aha vü rhelivi kümjie, anotha vü anyikhu kümjie, thawa nüh ma küze nüh küliechuwa vü nga jükümjie.

²⁷VÜWA kükrü thuoüji akürho saküsuora veh, thitü kümsüküsara mahvi t huoüji mülum naveh.

²⁸Künyitsara küluozhe thuoüji aloküwie vünüh asehkhe sasati, thitü kümsüküsara küluozhe thuoüji zanyo küsü nga mükünyu vü teruruti.

²⁹Thawa leh nü müshotse veh ünüh VÜWA tü ma küjehkümzhowa, thitü kümsü küsari vü thuoüji küzoriezosa.

³⁰Künyitsari thuoüji piketü viküjawa nyu, thitü kümsüküsari thuoüji azhihwa vü kürhowa nyu.

³¹Künyitsara po thuoüji kümahtsa vi zhu veh, thitü küürele mizhi thuoüji tehthuomtü naveh.

³²Künyitsara pomie thuoüji mowa nü küvirakümhie nüh thsü veh, thitü kümsüküsara po thuoüji mowa nü kürele veh