Read Pochuri Naga KÜMTSAZHÜ 11 Bible Online

KÜMTSAZHÜ 11 - Pochuri Naga bible

KÜMTSAZHÜ 11

¹Mükükato küüte tü VÜWA vü akükre, thitü kümsho küüte thuoüji ma nüh loveh.

²Kükuoti thuoüji, saküüzükrü ruruti; thitü kürünyie thuoüji kümahtsa.

³Kümsho künyitsanüh mari küjotsetseti, thitü küükhuh aroküshi nüh mari zoriemümti.

⁴Arükümtho rülo vü künyirhie tü akütsa münyie luo, thitü künyitsa tü aküsü vünüh vizhura veh.

⁵Kümtemkünyie künyitsari thuoüji ma leh kümsho sararati, thitü kümsüküsawa thuoüji ma mpa ma kümsüküsa vünüh külumümti.

⁶Künyitsa kümshori nüh mari vizhuzhuti, thitü aroküshiri thuoüji mari nüh nokümngu nüh mari revitewa naveh.

⁷Kümsüküsari süm thuoüji, ma küluozhe tü ratewaveh, thi mükünyitsawa küluozhe tü zanyoküsü vü nga nüh müru nüh sasati.

⁸Künyitsari thuoüji küsüro vünüh vizhumthuoh, thi jüma müthoh vünüh kümsüküsari nüh tetututi.

⁹Mükütsotüri tü ma po vünüh ma zhephruri zoriem naveh, thitü künyitsari thuoüji zanyoküthsü vünüh vizhuzhuti.

¹⁰Künyitsari kükato vü pehküveh vü anyujiwa tü nyierakhruo pehpehti; thi kümsüküsari pokahküm vü aloküwie küüzie pehpehti.

¹¹Kümshora kütsia vünüh anyuji küsü tü khaketsütsüti, thitü jüma tü kümsüküsara po vünüh khamlelemümti.

¹²Ma zhephruwa msheküzatüküvehwa thuoüji ase münyie nüh sa veh, thitü küthsükümshi nyiwa thuoüji zota pehpehti.

¹³Azhüküzaküzhiluo kütsewa thuoüji küüzheri saküthsümümti, thitü asietse vü lehkünokütseri thuoüji zanyo küthi pehrarati.

¹⁴Küjokütsü mükünyie vü, anyiri külumümti, thitü zhühphiekütsüri küwale vü thuoüji külohji peh.

¹⁵Anyitheri sakütoh kütsüwa thuoüji, jüma kenüh kürhüküle naveh, thitü nyuri küfe kümrhüwa thuoüji ma luoveh jiranaveh.

¹⁶Külozhivühwa thuoüji küchiekürhe ngura veh, thi küvürie nyiri thuoüji künyirhie ngura veh.

¹⁷Azhükünyiawa thuoüji ma mpa nüh nyiera veh, thitü küüsükürie nyiwa thuoüji ma mpa ma kümnomna viruruti.

¹⁸Kümsüküsawa thuoüji mizhi kümsükümlie nguveh, thitü künyitsa küzhuhwa thuoüji kümlie khem ta ngurarati.

¹⁹Künyitsa vü mükükhaphrükhalewa thuoüji rho naveh, thitü kümsü zhekütsewa thuoüji sü naveh.

²⁰Müshe küürelewa thuoüji VÜWA vü akükre küsü, thitü kümtemükünyie lehri thuoüji ma nüh nokülo.

²¹Thsütoh luo, kümsüri tü müünomna nüh külewa nyu, thitü künyitsari thuoüji vizhu wie naveh.

²²Awu nyakuo vü suna nashu küsü kümjie nyimzavüh küzü kümahtsa mkünyiewa thuoüji.

²³Künyitsara küsangü thuoüji kümhie nüh asehkhe sa; kümsüküsara küluozhe thuoüji arükümtho.

²⁴Nyi küsü nüh müjuju tsü, tü aveh nga künyirhienyirhie wa veh, küpawa thuoüji ma nüh kütsülehwa küjehtepehpehti, thi kümnomna kümnguwie.

²⁵Nyuri küülie mküürüpari tü sakünyirhietsü naveh, thi ajuhküzüwa thuoüji ma mpa nüh ajuh zü naveh.

²⁶Atsuo küvi sheleri thuoüji nü ma müzü naveh, thitü jüma zhukütsüra lü rügivü thuoüji akütsia pehveh.

²⁷Kükhekünyi nü kümhie küphahwa thuoüji küütso phah veh, thitü kümsü küphahwa thuoüji ma vü jüma ru veh.

²⁸Ma künyirhie lehno kütsewa thuoüji wazhüm naveh, thitü künyitsari thuoüji anyawa kümzhi kümjie rhühtha naveh.

²⁹Ma zhehlo saküüsührowa thuoüji amürhü aka vi naveh, thi zanyomküthsüwa tü aküthsüwa siepe sanaveh.

³⁰Künyitsara vi thuoüji akürho arhu küsü, thitü khonyo mkünyiewa thuoüji akürho vija veh.

³¹ Mükütüküzü künyitsari tü azhih vü amüthoh satsüthuoüji, kümsüküsari thi kükhiemuori nü küzakelenga satsü na lo!