Read Pochuri Naga KÜMTSAZHÜ 13 Bible Online

KÜMTSAZHÜ 13 - Pochuri Naga bible

KÜMTSAZHÜ 13

¹Zanyoküthsü tsawa thuoüji ma pa küsüphie künaveh, thitü küriesarienyiri thuoüji küphra künamvi.

²Avi vünüh anyi kümhieri tü ma po kümhie tsatsati, thitü aroküshiri nüh küsangü thuoüji küvürie.

³Ma po küzitewa thuoüji ma kürho müshiera veh, ma pomie ga kümzhawa thuoüji küferie vü teru veh.

⁴Küliechuwa kürholi thuoüji tsangüthuokeveh, tü zanyoküsü nga müngu, jüti küsa vü küükhekünyiawa kürho thuoüji nyirhiesheh nü tsüveh.

⁵Künyitsari thuoüji küzhüjah mürhüm, thitü kümsüküsari thuoüji khielota küzükrü thi saküüzükrüsheh müke sa.

⁶Ma leh müshokütsewa thuoüji künyitsanüh ma huote, thitü kükhiemuo nüh kümsüküsari khamlele veh.

⁷Nyi küsü nüh künyirhiera küthse sa, tü zanyo küsü nga münyie luo, küpawa nüh kümkhuo küthse sa, tü künyirhie pehshe.

⁸Anyira kürho thuokütsü tü makünyirhie, thitü kümkhuori thuoüji kürhehsa rühle küsü nga münyie luo.

⁹Künyitsara küwie tü nyierakhruo veh, thitü kümsüküsara lati thuoüji zokünem tü naveh.

¹⁰Ma küshüluoshütü vünüh müküükheke küsaluo sasati, thitü küshike küviri thuoüji kümahtsari.

¹¹Kürüzih vünüh künyirhie küngura thuoüji ratewaveh, thitü pipi nüh küvizhuhwa thuoüji saküzhitsü naveh.

¹²Küluozhe küpam thuoüji luoveh sakünamümti, thitü küsangü küsajura thuoüji akürho athsoh küsü.

¹³Azhü kümawa thuoüji ma mpa ma vü küzorie viru veh, thitü azhünyo küsiakewa thuoüji ajisuo tsü naveh.

¹⁴Aküthsüra küsosie thuoüji akürhowa küwuzhu wie thuoh, aküsü kümhie vünüh ma tü shele tewaveh.

¹⁵Ase kümhie thuoüji küütso mülie ra veh, thitü kütsotüküzüla lehkhuji thuoüji mari ferie veh.

¹⁶Zanyo aveh vü nga kümahtsawa thuoüji zanyoküthsü vi nü zanyosasati, thitü zanyo mküthsüwa thuoüji ma küzhehphro kütsaveh.

¹⁷Zhühleküvü kümsüwa thuoüji anyiri küsühro vü saküüjoke veh, thitü küzhütsanyitsa zhüleküvüwa thuoüji saküümhie viru veh.

¹⁸Küsüphie müküchiewa vü küthotsathorü thi küzükrü ru veh, thitü küsosiezhü küünawa thuoüji chierhe veh.

¹⁹Küsangü küsajurawa thuoüji akürho vü loküra nguveh, thitü kümsüwa vünüh küürele thuoüji zanyomüküthsüri kenüh akükre küsü.

²⁰Aküthsüri sie nü kütse thuoüji thsüra veh, thitü zanyomküthsüri sie kütsehju thuoüji kümnomna ngu naveh.

²¹Müngukümsü tü kükhiemuori zhe veh, thitü kütsarhienyurhie tü künyitsari jisuo satsü veh.

²²Anyi kümhieri thuoüji ma tsa atsari vü aka satütüti, thitü kükhiemuora künyirhie thuoüji künyitsari kenüh vizhuh sasati.

²³Kümkhuora zhiwuo thuoüji kütsaküzhu khielota petsütsüti, thitü jüma tü mükümsho vünüh chijamümti.

²⁴Anyi ma wuze kümshiewa thuoüji ma tsa mürhü veh, thitü ma kümze küvehwa thuoüji ma küsosie mhieveh.

²⁵Künyitsari thuoüji ma kütsangü alosaküüra wale, thitü kümsüküsara vo thuoüji kütsangü vünüh münomna pehpehti.