Read Pochuri Naga KÜMTSAZHÜ 14 Bible Online

KÜMTSAZHÜ 14 - Pochuri Naga bible

KÜMTSAZHÜ 14

¹Kümtsavühwa thuoüji ma zheh sara veh, thitü zanyomküthsüvühwa thuoüji ma mpa ma kenüh jüma shohkhrimümti.

²Müsho nü kütsewa thuoüji VÜWA krü, thitü thawa nüh lehkhujiri vü kükholekhoza tse nüh ma mam.

³Zanyomküthsüri küsü azhüküphra thuoüji ma sevü kenüh awuze küsü, thitü aküthsüwa pomie thuoüji jümari müshieshieti.

⁴Shüvotsa mükünyie vü atsuo nga münyie; thitü shüvotsa kükhra vünüh küwale luoshü tururuti.

⁵Küzhütsanyitsa povü thuoüji mürie, thitü küzhüjah povü thuoüji akürie sahzhuzhuti.

⁶Küriesarienyiri tü müjuju vünüh kümahtsa phahphahti, thitü küthsükümshi nyiri kenüh thuoüji zanyoküthsü kürüziwie.

⁷Zanyomküthsüri sie müpeh tüm, küpakenühnyunü noh tü jüla zanyoküthsü zhü küsü nga küserüwa nyu,

⁸anyoküthsüwa kümahtsa thuoüji ma lehkhuji thsüveh, thitü zanyomküthsüra küzhehphro thuoüji müramizhizhiti.

⁹Saküüwuowa nü kümsüküsari lomveh, thitü kümshori thuoüji ma küütso nguraveh.

¹⁰Aluoveh tü ma mpa ma kükha thsü, thi anyitheri tü jüma loküzhe siemküsuo.

¹¹Kümsüküsara zheh tü zoriemtü naveh, thitü kümshora juhthsüzheh thuoüji rhühtha naveh.

¹²Anyiri kenüh lehkhuji kato küveh kümjie sasati, thitü asehkhe vü thuoüji aküsü lehkhuji.

¹³Kükhri küpeh vü nga aluoveh tü lorü, thi loküzhe sehkhe vü thuoüji küshüthuoke.

¹⁴Küreleteküwari thuoüji ma lehkhujiri avi nüh prom naveh, thi anyi kümhieri thuoüji ma küürohküli nüh pro naveh.

¹⁵Küjülori tü zanyo aveh tsotü, thitü kümahtsawa thuoüji ma khiela wa na sa veh ünüh jüla noveh.

¹⁶Aküthsüri thuoüji azhüzhü thi kümsüwa vünüh sühle, thitü zanyomküthsüri thuoüji küüzhi kütheja thi azhümzhü.

¹⁷Shita arüküshuri thuoüji zanyomküthsü mükeri sasati, thitü akeliekünowa thuoüji küzhike.

¹⁸Küjühlowa thuoüji küzhehphro nguveh, thitü kümahtsawa thuoüji zanyoküthsü vi kajilüwe sa.

¹⁹Kümsüwa tü kümhiewa tüvü küngiengieti, kümsüküsawa tü künyitsawa kheri vü wawati.

²⁰Kümkhuori tü ma mpa ma zhephruwa mpa nüh mülo, thitü nyirhieri thuoüji afü hozake peh.

²¹Ma zhephru kümawa thuoüji kükhiemuori, thitü kümkhuori vü küüliewa thuoüji loküzhewa.

²²Mari tü kümsü kümsheri tü sazih mvehlo? Kümhie kümsheri thuoüji künyitsasheh thi küzhütsanyitsa mütututi.

²³Küüro aveh vü akütsa pehveh, thitü azhüküphra mpa puokekütse nü küvingü wie.

²⁴Aküthsü kajilüwe thuoüji mari kümahtsa, thitü küzhehphro thuoüji zanyomküthsüra zho.

²⁵Küzhütsa povü thuoüji akürho külolera veh, thitü akürie küphrahte thuoüji mekütsa.

²⁶VÜWA kükrü vünüh küzhe kümzho pehra veh, thi ma tsari tü kümnyipe pehra naveh.

²⁷VÜWA kükrü thuoüji akürho rütsowa wiethuoh, jütaküsa vünüh aküsü küjurüri kari ra naveh.

²⁸Anyiri khielota küpeh vü kajira kütholathovü pehveh, thitü anyiri mükünyu nü kajitsari tü ferie veh.

²⁹Zhihke nü arüküshuwa thuoüji küthsükümshi küji pehveh, thitü preratsarmie rükümthowa thuoüji küzhehphro sakümsie veh.

³⁰Luoveh kürzi amüshewa thuoüji asazüh vü akürho tsü veh, thitü notha noküsa thuoüji arüri sa küpri veh.

³¹Kümkhuori kümrüri thuoüji ma sakütsüwa müsamnyi, thitü küthotsari vü küükrari thuoüji ma chierhe veh.

³²Kümsüküsawa tü ma kümsü küsa vünüh vehjamümti, thitü künyitsawa thuoüji ma künyitsa vünüh kümnyipe ngurarati.

³³Kümahtsa tü küthsükümshiwa müshe lovü pehpehti, thitü zanyomküthsüra luoveh lovü thuoüji jüma tü müthsü.

³⁴Künyitsawa thuoüji akuoküji sakümsie veh, thitü kükhiemuo thuoüji anyi küsüküsü nga lomveh.

³⁵Asiepe thsü nü sakütsewa thuoüji kajiwa küütso pehpehti, thitü zükrüsheh nü sakütsewa vü thuoüji ma rükümtho teru veh.