Read Pochuri Naga KÜMTSAZHÜ 15 Bible Online

KÜMTSAZHÜ 15 - Pochuri Naga bible

KÜMTSAZHÜ 15

¹Külonyi ti kürele thuoüji arükümtho saküüreletü veh, thitü küükhrie zhü thuoüji arü saküshushuti.

²Aküthsü mizhi thuoüji zanyoküthsü tsüveh, thitü zanyomküthsüra po thuoüji küzhehphro küshozhuzhuti.

³VÜWA notha thuoüji azhie aveh vü pehveh, kümsüwa vü nga thi kümhie vü nga note pehveh.

⁴Külonyi mizhi thuoüji akürho thsorhu küsü, thitü küürele thuoüji asietse zorie veh.

⁵Zanyo mküthsüwa thuoüji ma pa nüh küsüphie mam, thitü küsosiezhü küviwa thuoüji mtsaveh.

⁶Künyitsara zheh vü thuoüji künyirhie khielota pehveh, thitü kümsüküsara küturu vü küsühro teturu veh.

⁷Aküthsüra pomie thuoüji zanyoküthsü nyuohküze veh; zanyomküthsüra müshe thuoüji jüüta nyu.

⁸Kümsüküsara küsahthuoh thuoüji VÜWA vü kükre küsü, thitü kümshora kükhuo thuoüji ma nüh nokülo.

⁹Kümsüküsara lehkhuji thuoüji VÜWA vü akükre küsü, thitü künyitsa zhekütsewa thuoüji ma nüh lo.

¹⁰Thawa nüh lehkhuji kule veh ünüh ma kenüh kümnomna küüsanü küsosie pehveh, küsosie kümrhüwa thuoüji sü naveh.

¹¹VÜWA tüvü Küsürazhie thi küpokape peveh, nyira luoveh tü küzakele nga na lo!

¹²Küriesarienyiri tü sosiekütsü mülo, ma tü aküthsüwa vü küwawa nyu.

¹³Aloküwie luoveh thuoüji anyiepha sakümza veh, thi luovehkünaluoveh thuoüji asietse zorie veh.

¹⁴Küthsükümshi amüshe thuoüji zanyoküthsü phah veh, thitü zanyomküthsüra po thuoüji küzhehphro vünüh avosa.

¹⁵Amüshe kümnomnawa rülori aveh thuoüji kümsü, thi loküzhe luoveh thuoüji müküütuo kütsazhu peh.

¹⁶VÜWA kükrü nü pike mpa küpeh thuoüji künyirhie hozake peh nü jüma vi küsühro nyiehvü küümpha khe.

¹⁷Kümrhü vünüh shüvotsa küülie fethe küütsa thuoüji küümze vünüh anyawa shuküütsanüih küümpha khe.

¹⁸Arüküshuchari thuoüji küsaluo vizhuzhuti, thitü zhihke nü arüküshuri thuoüji küüjakünya saküüzohtsü veh.

¹⁹Küliechu lehkhuji thuoüji arüzhü nüh shophoh veh, thitü kümshora lekhuji thuoüji alerü kütake küsü.

²⁰Atsa aküthsüwa thuoüji apawa alosaküüwie veh, thitü zanyomküthsüwa thuoüji ma zah mam.

²¹Ase mükünyiewa thuoüji küzhehphro tü makenüh loküzhe küsü, thitü küthsükümshi nyiwa thuoüji müsho nü tsetseti.

²²Küzhühphie kürüzhe müküthse nü müküleh vü tewawati, thitü shikekütsü küzhi vünüh mari tü küsara sasati.

²³Kükato kürüle thuoüji anyiri vü loküzhe tsüveh, thi atsotho vü azhü küphra tü küzakele nga mhie lo!

²⁴Aküthsüra lekhuji thuoüji akürho rügi wuovü küjotsütsüti, jütaküsa vünüh ma tü küsürazhie kükhuwa kaririti.

²⁵VÜWA nüh kürhiezawa zheh zochiemtütüti, thitü tünyivühwa arühri totetsü naveh.

²⁶Kümsüküsara kümshe thuoüji VÜWA vü akükre küsü, alatha zhüri thuoüji ma vü lom.

²⁷Mükümsho müwiküji künyie thuoüji ma zheh kenüh küsühro sasati, thitü athe mükülowa thuoüji rho naveh.

²⁸Künyitsara müshe thuoüji mokümjie rüle naveh ünüh ta rüzheveh, thitü kümsüküsara po thuoüji kümsü zanyori küshozhuzhuti.

²⁹VÜWA tü kümsüküsari vünüh letsuom, thitü ma nüh künyitsara kükhuo künatü veh.

³⁰Anotha küwie tü luoveh nyieraküükhruokhruoti, thi zhühthe kümhie tü arüri sakürherhoveh.

³¹Tha khünawa nüh küsosiezhü vü tsake veh ünüh, ma thuoüji aküthsüri azavü küpeke naveh.

³²Küsüphie müküchie küsawa thuoüji ma mpa ma kuleveh, thitü küsosiezhü küviwa thuoüji küthsükümshi nyie veh.

³³VÜWA kükrü tü kümahtsa vü küsüphie, thi saküürünyie tü küchiekürhe tüvü wa veh.