Read Pochuri Naga KÜMTSAZHÜ 16 Bible Online

KÜMTSAZHÜ 16 - Pochuri Naga bible

KÜMTSAZHÜ 16

¹Amüshe kürüzhe tü anyiri rügivü pehveh, thitü amizhi kürüle thuoüji VÜWA vünüh.

²Anyira lehkhujiri aveh tü ma mpa ma notha vü mütsem, thitü VÜWA nüh asietse küte veh.

³Noh küüroh vi VÜWA vü tsüm luo, jüta thuoüji noh kürüzhe tü vizhura naveh ünüh.

⁴Zanyo aveh nga VÜWA nüh ma mpa ma kenüh sasa veh, kümsüküsawa nga küsühro rülo vü kenüh sasa veh.

⁵Kükuotikuoshi aveh thuoüji VÜWA vü akükre; kütoh luo, ma tü mükümnomna müsa ra.

⁶Künyitsa thi küzhütsanyitsa künakhie thuoüji thuotsü naveh, thi VÜWA kükrü vünüh anyiri tü kümsü kari veh.

⁷Anyira lehkhujiri tü VÜWA alokütu sathuoüji ma mükünongüri wie nga ma sie kükathuo sa ra veh.

⁸Mükümsho vünüh nyirhie peh na küsanü, künyitsa vünüh pike küpeh nüh küümpha khe.

⁹Anyira müshe tü ma lehkhuji rünyiazati, thitü VÜWA nüh ma lekhari küjotsütsüti.

¹⁰Rügi vünüh küru küthsü vinü küürathuori tü kajiri küsü pomie vü peh veh, ma po tü küsathuotü vü mükhiemuo.

¹¹Kümsho küüto thi küüteri tü VÜWA zhi, achükhu vü küütori aveh tü ma küüroh khe.

¹²Kajiri nüh kümsü küsa tü akükre küsü, küpakenühnyunü künyitsari nüh kükajipe tü küvizhu kenüh.

¹³Künyitsa pomie tü kajiri nüh nokülo, thi kükato küphrahtewa tü ma nüh lo.

¹⁴Kajira rükümtho tü aküsü zhühle küvü, thi aküthsü nyiri nüh jüma sakütsaketsüna.

¹⁵Kajira nyieh küwie vü akürho peh veh, thi ma küütso tü thsehthe vü atsoh viküru külu kümjie.

¹⁶Kümahtsa ngu noküsa thuoüji suna nyiehvü nüh kümpha, rakasa kürüka nyiehvü nüh kümpha.

¹⁷Kümshora lerü thuoüji kümsü vünüh anatovü küreke; ma lehkhuji huotekütsewa thuoüji ma kürho müshie veh.

¹⁸Kükuoti tü küzorie atüvü wawati, thi küwukhawurie sietse tü küülu atüvü wawati.

¹⁹Kümshori sie nü kürünyie sietse nüh küümpha khe, küriezari sie nü zhechieküvira küsuo nyiehvü nüh.

²⁰Azhü vü tsake kütsü thuoüji tsarhie naveh, thi VÜWA vü lehkünowa thuoüji loküzhewa.

²¹Luoveh aküthsü thuoüji küthsütsa nyiri ta ji veh, thi loküm küphrahte tü aküzhe zhi wie naveh.

²²Kümahtsa thuoüji jüma küpehwa kürho, thitü küzhehphro thuoüji zanyomküthsüwa phraküsosie.

²³Zanyoküthsüwa müshe thuoüji ma zhüküphra mtsashe nü phrateveh, thi aküzhe ma pomie vü thsephepheti.

²⁴Akülo zhü thuoüji awepha kümjie, akümo[2] vü kürholi thi satsa vü kümnge.

²⁵Anyiri kenüh kükato kümjie aleh wawati, thitü sehkhe vü thuoüji aküsü leh vü tewawati.

²⁶Küürohra kürüma tü ma kenüh küroh veh; ma po nüh ma khrikhriti.

²⁷Anyi mame mkünyieri tü kümsü msheveh, thi ma zhüküphra tü anyih nüh kütü kümjie.

²⁸Küürele nyiri thuoüji küsaluo sakünyuohnyuohti, thi küzhüweri tü afütori saküporierieti.

²⁹Küvürie nyiri tü ma zhephruwa müraveh, thi ma küjo nü aleh mükümhie vü wawati.

³⁰Notha künokhrowa tü ariele zanyori vü rünyiazati, ma pomie kümkophoekewa thuoüji kümsü küüzhiluo viru veh.

³¹Alüküpru thuoüji kütholathovü kajilüwe, jüma tü künyitsa kürho vü nyiera veh.

³²Zhihke nü arükümthowa thuoüji akükhrari nyieh vünüh mpham, thi anyuji küvirawa nyieh vünüh ma sietse takrü kütsewa nyiehvü nüh mpha.

³³Aküze tü athüchi vü jakeketi, thitü küürathuo thuoüji aveh VÜWA vünüh.