Read Pochuri Naga KÜMTSAZHÜ 17 Bible Online

KÜMTSAZHÜ 17 - Pochuri Naga bible

KÜMTSAZHÜ 17

¹Tsake nü alohse küüweh kütsa thuoüji, azhehlo küpro kütsaküzhu sanü küsaluo küpeh nyiehvü nüh küümpha khe.

²Atükha thsüsheh nü küsawa tü khielota müzükrü nüh amüke sakütsewa nyiehvü takrü naveh, thi ajienüri küsü kümjie vünüh aka nyi küsuo naveh.

³Anyi tü rakasa kenüh, thi anyiku tü suna kenüh, thi VÜWA nüh luoveh müteteti.

⁴Kümsüküsari tü kümsüküsara zhü künaveh; thi azhükürieri tü mküle amizhi zhü künaveh.

⁵Kümkhuori müküchieküzhüwa thuoüji ma Saküüjewa müchiemzhü nü sa veh; kümsü vü aloküwiewa thuoüji mükümnomna tü külewa nyu.

⁶Azhüri tü kükhruoküzera kajilüwe, thi atsara kütholathovü thuoüji mari apari.

⁷Azhü kümhie küphra tü zanyomüküthsü satewa müveh, akürie küphrahte tü kajira tsa amüke nyu.

⁸Athe tü akütsüwa notha vü kümahtsa loh küsü kümjie; ma nüh küsühle vü ma tü tsarhierhieti.

⁹Mküleküsa noküjawa thuoüji küümze phah veh, thitü mküle saküpehuowa thuoüji afütowa sieketuoveh.

¹⁰Küshüke tü küthsükümshi anyiri vü sheh tu veh, zanyomküthsüri müzake tokütsü nyiehvü nüh.

¹¹Anyi kümsüri thuoüji azhümküüna phahveh, thi mkünyishi zhüleküvüri ma vü küze naveh.

¹²Zanyomküthsüri küsü ma küzhephro vü mütu na küsanü awie vüh ma tsa reteküwa kümtu nüh küümpha khe.

¹³Mükütüküzü nyi küsü nüh kümhie müthoh vünüh kümsü satsüle thuoüji, kümsü tü ma zheh vünüh kariteküwawa nyuthuoh.

¹⁴Küsaluo küsate thuoüji ajuh lizhuküüze kümjie wiethuoh; jükenüh küüraluowa müjie shuteküru vünüh zoti peh luo.

¹⁵Kümsüküsa noküümshowa thi künyitsari msheküsüwa, masükhürü zarike thi VÜWA tüvü akükre.

¹⁶Zanyomküthsü tü aküthsü sü nta mokenüh ame ma ke vü vi na lo, ma nüh amüshe mükünyie vü?

¹⁷Afüwa thuoüji tsotho aveh vü kümzeveh, thi anü küsü tü noküümaküshi kenüh wuoveh.

¹⁸Ase müküthsü nyiwa tü küshiete tsütsüti, thi ma zhephruwa shütü vü küütoh sateruruti.

¹⁹Küphrürie külowa thuoüji küsaluo lo veh, ma mükhie saküümsiewa thuoüji küzorie phah veh.

²⁰Amüshe küükhuhkülewa thuoüji mütsarhie, thi amizhi küürele küpehwa thuoüji kümsü lovü tsuotsakeketi.

²¹Atsa küzhewa thuoüji apawa sakürüthuoke veh; thi zanyo mküthsüwa pa thuoüji loküzhe münyie luo.

²²Loküzhe luoveh thuoüji nahzhi kümhie küsü, thitü loküru sietse thuoüji arüri saküüweh veh.

²³Kümsüküsari thuoüji atüso vünüh athe viviti, kümsho lehkhujiri saküürele nta.

²⁴Küthsükümshi nyiri thuoüji ma nyieh vi kümahtsa wuovü sasati, thitü zanyomküthsüra notha thuoüji azhih küpoteri vü sasati.

²⁵Atsa zanyomküthsüwa thuoüji ma pa müshesaküsü veh, thi ma küwuowa losakürü veh.

²⁶Künyitsari vü ame müna na küsa tü mümhie; Khuouke kümhieri küfeküjo sana küsa tü müküleh.

²⁷Ma zhü küzhi kütsewa thuoüji zanyoküthsü pehveh, azhükünyi küpehwa thuoüji küthsükümshi anyiwa.

²⁸Zota küpeh zanyomküthsüwa wie nga thsü veh ta müshetütüti; ma nüh ma pomie kükhe vü, ma tü mütsasheveh ta phraterana.