Read Pochuri Naga KÜMTSAZHÜ 19 Bible Online

KÜMTSAZHÜ 19 - Pochuri Naga bible

KÜMTSAZHÜ 19

¹Nyirhieri sataji zhepe nta küsanü kümkhuori sataji ma künyitsa vünüh kütse nüh küümpha khe,

²Anyiri thuoüji zanyoküthsü mükünyie tü mümhie, thi ma jih vi prüjo kütsewa thuoüji ma lehkhuji khazih mümti.

³Anyi küzhehphrowa nüh ma mpa ma lehkhuji küferie viküru vü, ma luoveh tü VÜWA vü küteteti.

⁴Künyirhie tü afü kürüthe hozake sierura veh, thitü kümkhuori thuoüji ma füri nüh jamümüti.

⁵Küzhühja povü tü kümnomna mütsü nüh külewa nyu, thi akürie küphrahtewa thuoüji mütera.

⁶Anyi hozake wie nga küsikhara küütso phahphahti, thi küsüküsü nga aküte kütsarawa afü sasati.

⁷Kümkhuori tü ma jienüri aveh nüh ma mürhüm, ma füri tü küzakele nga ma vünüh letsuo na lo! Ma nüh azhü vi nü mari phah, thitü mari küsü nga mphahra.

⁸Kümahtsa küngura thuoüji ma mpa nüh ma kümzezeti, küthsükümshi küsawa thuoüji tsarhie naveh.

⁹Küzhüjah povü tü kümnomna mütsü nüh külewa nyu, thi akürie küphrahtewa thuoüji pokahm wie naveh.

¹⁰Zanyo mküthsüri thuoüji küüsheküsha vünüh kürho mükato, atükhari nüh kajitsari takrü na küsa züla shehm.

¹¹Ase kümhie thuoüji anyiri arüküshu saküüzhihke veh, thi ma kütholathovü nüh müküleri notherie veh.

¹²Kajira rükümtho tü amiewuowa kükhu kümjie, thitü ma küütso tü are rügivü aküzo kümjie.

¹³Atsa zanyomküthsüwa thuoüji ma pa vü küferie peh, thi avüvühwa küüraluo thuoüji atsoh rütsuo küpeh huo kümjie wie thuoh.

¹⁴Azheh thi künyirhie tü apari vünüh akaküvi wie thuoh, thitü kümahtsawa vüvüh thuoüji VÜWA vünüh.

¹⁵Küthachuthanyie nü zehmophoke pehpehti, thi kükütsünyiri thuoüji rüma nü münomna wie naveh.

¹⁶Azhühnyo kümzheri thuoüji ma kürho sara veh; azhü kümari thuoüji sü naveh.

¹⁷Kümkhuori noküümzawa thuoüji VÜWA vü küünaveh, thi ma nüh ma küürohküli kenüh ma nüh thuotsüle naveh.

¹⁸Küluozhe pehküveh vü noh tsa sosieluo luo; noh luoveh tü ma küzoriezosa vü müsa tüm.

¹⁹Anyi khielota arükümthowa thuoüji ma kümlie thuonaveh; küpakenühnyunü noh nüh ma vizhu thuoüji, noh tü jüma sale na küveh kenüh.

²⁰Küshike künaluo thi küsüphie vike luo, jütathuoüji noh tü kürule vü kenüh nyiehra naveh.

²¹Anyira müshe lovü kürüzhe khielota tü veh, thitü VÜWA kümshe sana.

²²Anyiri lovü mowa küsangü peveh ünüh ta thuoüji küümze, thi kümkhuori thuoüji azhükürieri nyiehvü nüh mühie veh.

²³VÜWA kükrü thuoüji akürho vü küjotsü veh, thi jüma küpehri thuoüji lora nü münyie veh; ma tü kümnomna ruküsetuwa nyu,

²⁴küliechuri tü ma ke akhu lovü chowumümti, thi ma po lovü vishele müru nüh sasati.

²⁵Kürhiezawa kürhietsüluo, thi küjühlori nüh thsüvira naveh; küthsükümshiri phraluo thi ma nüh zanyoküthsü nyiera naveh.

²⁶Ma pa vü wusawurieh thi ma zah zheküjawa thuoüji küzükrü sashutsü thi küriesa viküru atsawa.

²⁷Eh tsa, zanyoküthsü zhüri vünüh kükhazihra küsüphie küüna lem luo, noh tü küsüphie künana küsa kenüh.

²⁸Mame mkünyie povü thuoüji kümsho riesarienyi, thi kümsüküsara po thuoüji künakhie shohriemümti.

²⁹Küriesarienyiri kenüh küpoka tü lieke veh, thi zanyo mküthsüri kenüh seru küfe lieke veh.