Read Pochuri Naga KÜMTSAZHÜ 2 Bible Online

KÜMTSAZHÜ 2 - Pochuri Naga bible

KÜMTSAZHÜ 2

¹Eh tsa, mükütüküzü noh nüh eh zhüri vike, thi eh zhühtsüri noh vü sathe sa thuoüji,

²noh khüna tü kümahtsa vü kümrheke sa, thi noh luoveh tü küthsükümshi wuovü keke luo;

³ah, mükütüküzü noh nüh kümahtsa kenüh zie nü khuo thuoüji, thi küthsükümshi kenüh noh jikhi sakümsie thuoüji,

⁴mükütüküzü noh nüh rakasa üta jüma phah, thi künyirhieri küthi küsa üta phah thuoüji;

⁵noh tü VÜWA kükrü thsümshira naveh, thi Saküüwuowa[1] zanyoküthsü phahra naveh;

⁶küpakenühnyunü VÜWA nüh kümahtsa tsü küveh kenüh; ma po vünüh zanyoküthsü thi küthsükümshi shuru veh;

⁷ma tü kümshori kenüh kümahtsa küchesatüveh; ma tü künyitsa vünüh kütseri kenüh joh huo küsü

⁸kümsho lekhujiri rükie taji, thi ma nyira leh müshie taji nü.

⁹Jütathuoüji noh tü künyitsa, thi kümsho thsümshira na küveh kenüh, thi küzarike, aletse kümhie küsüküsü nga thsümshira naveh;

¹⁰kümahtsa noh luoveh lovü turu naveh, thi noh kürholi vü zanyoküthsü tü lomnathuoh,

¹¹Kümahtsa nüh noh nyiehvü nopeh naveh; küthsükümshi nüh noh rükiete naveh;

¹²kümsü lehwa vünüh noh vizhu taji, khaphrüteküwa küphrahte nyiri vünüh,

¹³kümsho lekhujiri kükuleri, aküzo lehri vü tse nta,

¹⁴kümsü küsa vü nyierakükhruori, thi kümsü küüzhike külori,

¹⁵anyi jümari lekhuji tü kükhuhm, thi mari tü mari alehri vü mkato.

¹⁶Noh tü nyimza küüweküsiehwa vünüh külole naveh, nyizavühwa küüzhu zhüri vünüh,

¹⁷ma kürünyuo kürefü kükule vühwa, thi ma Saküüwuowa kütsathuo küümavühwa;

¹⁸küpakenühnyunü ma zheh tü, aküsü lovü kuoküzhoke tekütuthuoh kenüh, thi ma lekhujiri tü aküsü rüzhe vü tewathuoh;

¹⁹ma vü küwari nyi küsü nga sheleküru münyie, nyutü mari tü akürho lekhujiri künyie lera müsa.

²⁰Jükenüh noh tü anyi kümhieri leh vü tse naveh, thi künyitsara lekhujiri vü saluo,

²¹küpakenühnyunü künyitsari tü azhih mazhiri sana küveh kenüh, thi künyitsa nyiri tü jüla peh huo naveh;

²²thitü kümsüküsari tü, azhihwa vünüh vijam naveh, thi aroküshiri tü jümawa vünüh ruzhum naveh.