Read Pochuri Naga KÜMTSAZHÜ 20 Bible Online

KÜMTSAZHÜ 20 - Pochuri Naga bible

KÜMTSAZHÜ 20

¹Akhah thuoüji küriesarienyi küsü, kümzo küzhuvüh thuoüji nyiri saküzheveh, thi jüma nüh thari sie khazihtewa veh ünüh kümahtsa münyie luo.

²Kajira rüküshu tü amiewuowa kükhu kümjie wiethuoh; ma rüsaküshu thuoüji ma kürholi tewaveh.

³Nyi küsü nüh küsaluo vünüh zhühnyuo na küsa tü küchiekürhe küsü; thitü zanyomküthsüri aveh thuoüji küraluo naveh.

⁴Küliechuri thuoüji marakhu vü mükhahu; ma tü mahwie vü phah naveh thitü zanyoküsü nga künguwa nyu.

⁵Anyira kümshe lovü tü ajuh küsheh kümjie, thitü küthsükümshiwa thuoüji jüma tie zhu naveh.

⁶Anyi hozake wie nga ma mpa ma künyitsasheh zhühchüh ti, thitü thawa nüh künyitsazhütsari phahra na lo?

⁷Künyitsari ma künyitsa vü kütseri, ma tsari ma sevü kütseri tü akütsiaküvüri.

⁸Kajiri küsü nüh ashihküsape kükajipe rügivü shuküpeh kajiwa tü ma notha vi kümsü aveh heja veh.

⁹Thawa nüh, “Hi nü eh luoveh sa kümtsem thuoh; hi tü eh kükhiemuo vünüh müthamthuoh,” ta küzara na lo?

¹⁰Küüte küpaküm thi küüto küpaküm tü zarike küsü vünüh VÜWA vü akükre.

¹¹Kürünguori wie nga ma müke vünüh ma mpa saküthsü veh, ma nüh küsa kümtsewa nga thi awuhlewa nga.

¹²Küüna khüna nga thi aküno nothawa nga, masükhürü nga VÜWA nüh sa.

¹³Aküzeh mülo tüm, noh tü mükhuom üsü nüh; noh notha ko luo, jüta thuoüji noh tü kütsaküzhu hozake pehra naveh ünüh.

¹⁴“Jümatü mümhie, jüma tü mümhie,” ta aküsüri nüh küza; thitü ma nüh tewa thuoüji ma tü kuoti titi.

¹⁵Suna pehveh, thi ame kükhra lohri khielota; thitü zanyoküthsü pomie thuoüji sitheloh amekürhe küsü.

¹⁶Anyitheri kenüh nyi küsü nüh ma thsünyawa tsü tsa veh üji vi luo, thi alienyiri kenüh ma nüh tsütsa veh üji küshiete vünüh ma shohte luo.

¹⁷Kürieriekhri vünüh lohse künyie-ra tü anyiri kenüh müngem, thitü asevü thuoüji ma po tü alokre nüh prom naveh.

¹⁸Kürüzhe tü küzhüphie vünüh vizhu veh; aküthsü küjokütsü vünüh arie sawaluo.

¹⁹Rhüsanyote kütsewa thuoüji küüzheri kütsaküthsümümtil; jükenüh zanyo mküthsüzhü küphrari sie mtsejutüm.

²⁰Mükütüküzü nyi küsü nüh ma pa nyutü ma zah müzü thuoüji, ma lati tü zo kümthsüthsü vünüh zokünem tü naveh.

²¹Aka küsü arholuo vü shita künguwa tü asevü thuoüji akütsia müngura.

²²“Hi nüh kümsüwa müthoh sale naveh,” ti müküza tüm; thitü VÜWA huo luo, ma nüh noh kükra naveh ünüh.

²³Saküüpa vü küüteri tü VÜWA vü akükre, thi müküleh küüto kütsokrüri tü mümhie.

²⁴Anyira lekha tü VÜWA nüh sakütomthuoh; thinü jüta thuoüji mokümjie anyiri tü ma lehkhuji thsümshira na lo?

²⁵“Jüma tü mütha veh,” ta preratsarmie küphra thuoüji anyiri kenüh küjurü küsü, thi ma kürathuo kümü sevü mpa nüh mase küthsü.

²⁶Kaji kümahtsawa thuoüji kümsüküsawa hejajati, thi satürüawa mari nyiehvü zhejakeketi.

²⁷Anyira sietse tü VÜWA lati, ma lotsawa phahphahti.

²⁸Künyitsasheh thi küzhütsanyitsa tü kajiri müshie ra veh, thi künyitsanüh ma kükajipe vilera veh.

²⁹Vizara kütholathovü tü mari kükhra, thitü kükhruora küzü thuoüji mari asheh küpru.

³⁰Amürhü kühe tü kümsü sakümtse tü veh; küfeküjo nüh alotsari sakümtse veh.