Read Pochuri Naga KÜMTSAZHÜ 21 Bible Online

KÜMTSAZHÜ 21 - Pochuri Naga bible

KÜMTSAZHÜ 21

¹Kajira luoveh tü VÜWA ke vü kuza juh küsü; ma nüh jüma ma kümshe vü kürele küzezeti.

²Anyiri lehkhuji aveh tü ma mpa ma notha vü nü katom, thitü VÜWA nüh aluoveh küte veh.

³Künyitsa thi kümsho tü küsahthuo nyiehvü nüh VÜWA vü küüvikütse khe,

⁴kükuotikuoshi notha thi kürhieza luoveh, kümsüküsa lati aveh tü kükhiemuo.

⁵Kümütsawa kürüzhe tü küüsheküsha vü küjoküzera tsa veh, thitü pretsaprelo kütsewa thuoüji mükhuotewa veh.

⁶Akürie mizhi vünüh künyirhie küngu thuoüji aküsakükrü rateküwa thi aküsü küjurü küsü.

⁷Kümsüküsara küvürie nüh jümari ramnaveh, küpakenühnyunü mari nüh kümsho küsa kuleküm kenüh.

⁸Künakhiera leh tü kükhoküle mü, thitü kümtsera khuoke thuoüji katom.

⁹Nyimza apokükhrawa sie rho na küsa nü azheh luomuo rügivü kürho nüh kümpha.

¹⁰Kümsüküsara kürholi thuoüji kümsü sa ngü, ma zhephruri tü ma notha vü noküümze münyie luo.

¹¹Küriesarienyiri kümnomna kütsü vü küjühlori tü zanyothsüteru veh; aküthsüri süphiekütsü vü ma tü zanyoküthsü nyietera veh.

¹²Künyitsari tü kümsüküsara zheh nopeh veh; kümsüküsari tü küferie vü vijamümti.

¹³Kümkhuori nüh küzie vü thawa nüh ma khüna küwute naveh ünüh; ma nüh küzie vü küünatüwa nyu.

¹⁴Küüzhe vünüh küte thuoüji arüküshu sakükhaphrü veh; thi atüso vünüh ajisuo kütsü thuoüji arükümtho kükho sakükhaphrü veh.

¹⁵Kümshowa sakütsü vü, künyitsari kenüh lozheveh, thitü kümsüküsari vü thuoüji luovehküzah.

¹⁶Küthsükümshi vünüh anyiri tse tekütsewa thuoüji, küsüri küsezhuh vü münyie naveh.

¹⁷Loküraküsa külori thuoüji kümkhuori sam naveh; akhah thi avüjuh külowa thuoüji münyirhiera.

¹⁸Kümsüküsawa thuoüji künyitsari kenüh thuokütsü sanaveh, thi kütsotüküzülari nüh kümshori thuokütsü sanaveh.

¹⁹Kürüthuorüshe thi küütsükürevühri sierho na küsanü reza vü tewa kürho nüh küümphakhe.

²⁰Akürhe künyirhie tü aküthsüri nüh kürhope vü pehpeh ti, thitü zanyomküthsüri thuoüji jüma shohrierieti.

²¹Künyitsa thi nyuri noküümze zhekütsewa thuoüji, akürho thi küchiekürhe ngura naveh.

²²Anyi kümahtsawa tü akükhrara nyuji küteveh thi mari nüh alehno küveh shiehkuwa zophuomtütüti.

²³Ma po thi ma mizhi küvitewa thuoüji küsühro vünüh ma mpa ma viterarati.

²⁴“Küriesarienyi,” tü kürhiehzara nyo, küwukhawurie nyiri tü kükuotikuoshi müke sasati.

²⁵Küliechu wa nüh ma kümngu vünüh ma zothem küpakenühnyunü ma ke nüh müküro nta küsa kenüh.

²⁶Kümsüküsari tü rülo aveh vü sachihle veh, thitü künyitsawa thuoüji tsütsüti thi müküzhi.

²⁷Kümsüküsara küsahthuo thuoüji akükre; ma nüh kümsü lekhuji vünüh jüma viru thuoüji küzakele nga msüle nathuoh lo.

²⁸Küzhühja povü thuoüji pokahm naveh, thitü anyira zhü küünawa thuoüji pehra naveh.

²⁹Kümsüküsari tü ma nyieh sakümzhozhoti, thitü kümshori thuoüji ma lehkhujiri müshe tsetseti.

³⁰Kümahtsa küsü nga, küthsükümshi küsü nga, küzhühphie küsü nga VÜWA vü külo müsara.

³¹Arie küsa rülo kenüh rawuh tü külieke sa veh, thitü akükhra thuoüji VÜWA zhi.