Read Pochuri Naga KÜMTSAZHÜ 22 Bible Online

KÜMTSAZHÜ 22 - Pochuri Naga bible

KÜMTSAZHÜ 22

¹Künyirhie aküji nyiehvü nüh anyi kümhieri tü kürüka leh, thi kütso tü rakasa thi suna nyiehvü nüh mühie veh.

²Nyirhiewa thi kümkhuowa masü tü kürü serürüti; VÜWA nüh mari aveh küsawa.

³Kümahtsawa tü kükrü ngu nü ma mpa nüh küthithiti; thitü küjühlowa thuoüji tse wa nü jüma kenüh münomnanati.

⁴Saküürünyie thi VÜWA kükrü thuoüji künyirhie, küchiekürhe thi akürho.

⁵Arüzhü thi küjürü tü küreleteküwa lehri vü pehveh; ma mpa ma kühuotewa thuoüji jümari vünüh kietuo pehra naveh.

⁶Kürünguori tü khiema leh wuovü müküze üji mümhie nüh kümte tsüluo, thi ma tü khruom thuoüji jümawa vünüh kietuo teküwawa nyu.

⁷Nyirhieri nüh kümkhuori takrü veh, thi akünari tü küünara tükha.

⁸Mükümsho küzhuhri thuoüji kümsü wievi naveh, thi ma rükümtho zhietsüh tü sazihm naveh.

⁹Küwuzhi notha tü tsiatsü naveh, küpakenühnyunü ma nüh kütsaküzhu vi nü kümkhuori sie küsuo kütsa kenüh.

¹⁰Küriesarienyiri zhezhujam luo, jüta thuoüji küsaluo tü shutewa naveh ünüh, jüti sanü küüraluo thi küsaluo tü münyie nüh sam na thuoh.

¹¹Thawa nüh luoveh kümtse loveh ünüh, thi ma zhüküphra külozhiwa thuoüji, kajiri tü noh fü kümjie sanaveh.

¹²VÜWA notha tü zanyoküthsü rügivü note peh veh, thitü ma nüh kütsotüküzülara zhü thuoüji khamlele veh.

¹³Küliechuwa nüh, “Amiewuowa alievü pehveh! hi tü ale vünüh rehthem üsü,” ta küzazati!

¹⁴Küsühvühwa po tü azhikrie küsheh küsü wie thuoh; VÜWA nüh arüküshuwa vü thuoüji jüma lovü küüluke naveh.

¹⁵Küzhehphro tü kürünguora luoveh lovü phehkem wie thuoh, thitü küsosie zhiehtsüh nüh jümawa ma vünüh kületsuo vü zhejajati.

¹⁶Ma mpa ma künyirhie saküzhi nta kümkhuori kümrüwa, nyutü nyirhiewa vü kütsü thuoüji küthohtsa vü teru naveh.

¹⁷Noh khüna kümrheke nü aküthsü zhüri künaluo, thi noh müshe lovü eh zanyoküthsü thseluo;

¹⁸küpakenühnyunü mükütüküzü noh nüh jüma noh lovü sa thuoüji lom na thuoh, mükütüküzü jümari aveh tü noh pomie vü lieke veh thuoüji.

¹⁹Jüta thuoüji noh lehküno tü VÜWA vü peh naveh, hi nüh jümari noh vü nosü saküthsümthuoh, noh vü wie nga.

²⁰Cherake küphrahte hi nüh noh vü rhü mütsü ülo küsosie thi zanyoküthsü zhü.

²¹Mowa nü kato veh thi zhütsanü noh kütsana küsa kenüh, Jüta küsa vünüh noh tü noh küüzeri vü küzhütsa rületsü ra naveh.

²²Kümkhuora zhi mürühuo tüm, küpakenühnyunü ma tü mükhuo küm kenüh, nyutü amüshemnomna kütseri akheri vünüh müsanya tüm;

²³küpakenühnyunü VÜWA nüh makeri khuotü naveh thi mari kürho küzoriera kürho ma nüh zoriem naveh.

²⁴Arüküshuri sie afü müsa tümluo, nyutü arükümthori vü nyi mütse tümluo.

²⁵Noh tü ma lehkhujiri thsü taji, noh mpa nüh küjurü vünüh küza üsü nüh.

²⁶Küshiete kütsüri vü nyi küsü müsa tüm, mari tü ashehwi vü tsa wie naveh.

²⁷Mükütüküzü noh tü zanyo küsü nga vi küthuo münyie thuoüji mokenüh noh kükhu vünüh noh ze khaküze na lo?

²⁸Alanyira rüh müküükhaphrü tümluo, noh pari nüh shieküsa.

²⁹Noh tü anyiri ma küüroh vü asiezhüsheh küveh ngu ülo? ma tü kajira tüvü tsie naveh; ma tü anyi mküthsüri tüvü kütsiewa nyu.