Read Pochuri Naga KÜMTSAZHÜ 23 Bible Online

KÜMTSAZHÜ 23 - Pochuri Naga bible

KÜMTSAZHÜ 23

¹Noh tü atakrüri sie ashietsa nta shuküpeh vü, noh tüvü mowa pehveh ünüh kümhie ti no luo;

²thi noh khuru lovü anyuju küzhekem luo, mükütüküzü noh tü ashiekütsa apokümhieri küsü thuoüji.

³Ma shie küünguri mümngu tümluo, küpakenühnyunü jümari tü kümra ashie küsa kenüh.

⁴Künyirhie phanti küsa kenüh mü küüro msa tümluo; kule na küsa kenüh mütsasheh luo.

⁵Noh notha nüh jüma rügivü küwieke vü, jüma tü tewathuoh; küpakenühnyunü jüma tü ma mpa nüh zhürüluo aküsa vikevüvüti, aluomü nüh atülü wuovü prüke küwa kümjie.

⁶Anyi kükhokütuora shie mütsa tümluo; ma küüngushie mümngu tüm;

⁷küpakenühnyunü ma tü alovü nüh jümari kürü küveh kenüh. “Tsaluo thi zhu luo,” ta ma nüh noh vü küza; thitü ma luoveh thuoüji noh vü pehm veh.

⁸Noh nüh pike tsa küthseri küwuozhum le naveh ünüh, thi noh zhü külonyiri pokahm naveh ünüh.

⁹Zanyomküthsüra khüna vü azhüphra müthse tüm, küpakenühnyunü ma nüh noh kümahtsa zhüri mam na küveh kenüh.

¹⁰Alanyira rüh mükhaphrü tümluo, nyutü apa mükünyiera zhuh lovü mütu tümluo;

¹¹küpakenühnyunü mari kürhehsawa tü müzho küm kenüh; ma nüh makeri nüh khuona küveh kenüh.

¹²Noh müshe tü küsüphie vü thseluo, thi zanyoküthsü zhüri vü noh khüna künaluo.

¹³Atsari vünüh küsosie müvite tüm; mükütüküzü noh nüh awuze nüh ma fe wie ketünga ma tü küsüwa nyu.

¹⁴Mükütüküzü noh nüh awuze vi ma fe wie ketünga noh nüh ma kürho Küsürazhie vünüh küloletsü naveh.

¹⁵Eh tsa, mükütüküzü noh luoveh tü thsü veh üji, eh luoveh nga alowie naveh.

¹⁶Eh kürholi nyierakhruo naveh noh pomie nüh kükatowa küphra vü.

¹⁷Noh luoveh tü kükhiemuori n mümngu tümluo, thitü rülo aveh vü VÜWA krü peh huo luo.

¹⁸Kürule pehtsa veh, thi noh küluozhe tü viküjatüwa nyu.

¹⁹Künaluo, eh tsa, thi thsüluo, thi noh müshe tü lehkhuji vü küreke luo.

²⁰Akhah küzhura zavü müpeh tüm, nyutü asa kütsacha müwiküjiri azavü müpeh tüm;

²¹küpakenühnyunü akhaküzhuchari thi müwiküjiri tü kümkhuovü ru wie na küveh kenüh, thi küüzheküngu anyiwa tü thsütuonyituo vi küzhu naveh.

²²Noh pa noh küwuowa zhü künaluo, thi noh zah khruoküm vü ma müma tümluo.

²³Küzhütsa süluo, thi jüma müzhu tüm; kümahtsa, küsüphie, thi küthsükümshi sü luo.

²⁴Künyitsawa pa thuoüji nyierakhruo sheh naveh; atsa aküthsü küwuowa thuoüji ma vünüh alowie naveh.

²⁵Noh pa thi noh zah tü aloküüwie luo, noh küwouvühwa tü nyieraküükhruo luo.

²⁶Eh tsa, noh luoveh hi tsüluo, thi noh notha tü eh lehkhujiri küümzhe luo,

²⁷küpakenühnyunü muomuokürho tü azhikrie aküsheh küsü wie; küpruoprü vühwa tü ajuhkhre kümnyie küsü.

²⁸Ma tü kürühuri kümjie lieke huo pehpehti, thi anyiri azavü kütsotüküzüla saküzhitsü tsüti.

²⁹Thawa lokürü peh veh lo, thawa nüh luovehküna pehveh lo? thawa nüh küsaluo pehveh lo? Thawa nüh akürü pehvehlo? thawa nüh azhünyo münyie nüh müsamnaveh lo? thawa nüh anotha rüwuo veh lo?

³⁰Akhah vü küüzhikeri thuoüji, akhah sie wurie nta müküsari thuoüji.

³¹Akhah müru küveh vü jüma müno tüm, ahuo lovü jüma shü küveh vü thi zhuzhuta müzhuke küüzevü.

³²Asekhe vü thuoüji jüma tü arehsü kümjie shü veh, thi amüre nüh kümko kümjie.

³³Noh notha tü azanyo kürütheri ngu naveh, thi noh müshe tü küreleteküwa zanyori phrazhu naveh.

³⁴Noh tü jühküji azhievü küchuo zeküvehri küsü kümjie sam naveh, aluomuo rürihvü zehküvehri küsü kümjie sam naveh.

³⁵Noh nüh, “Mari nüh hi kürhie,” ta küza naveh, “Thitü hi tü müsake; mari nüh hi fe, thitü hi tü züh ta nga müsa. Hi tü küsie süra na lo? hi tü aküzhu küpa phah le naveh,” ti küza.