Read Pochuri Naga KÜMTSAZHÜ 24 Bible Online

KÜMTSAZHÜ 24 - Pochuri Naga bible

KÜMTSAZHÜ 24

¹Anyi kümsüri mü no mümngu tüm, nyutü mari vü nyitsehju nti mümngu tüm,

²küpakenühnyunü mari müshe tü küvürie müsheveh, thi ma pomieri tü akürie haluo küveh kenüh.

³Kümahtsa vünüh azheh tü sa veh, thi küthsükümshi vünüh jüma tü vizhu veh;

⁴Zanyoküthsü vünüh ateri tü amekürhe thi akülo künyirhie aveh vi nü saküproproti.

⁵Kümahtsari tü anyi kümzhora nyiehvü nüh khra, thi anyi zanyoküthsüri tü kümzo küpehra nyiehvü nüh khra;

⁶küpakenühnyunü aküthsü küüjo vünüh arie tü siesara naveh, thi hozake küzhühphieri vünüh khrara küveh kenüh.

⁷Zanyomküthsüri kenüh kümahtsa tü müsie le; akheri vü ma tü ma po müpoka.

⁸Thawa nüh kümsü sa nta rüzhe tse veh ünüh mizhi kümsüwa ta ji naveh.

⁹Küzhehphrowa küüro thuoüji kükhiemuo, thi küriesarienyi thuoüji anyiri kenüh akükre küsü.

¹⁰Mükütüküzü kümnomna rülo vü noh nüh thasü thuoüji, noh kükhra tü zah veh.

¹¹Aküsü vü kuosieteküwari küloletsü luo; kürehthe vü kuomshüke teküwari shote luo.

¹²Mükütüküzü noh nüh, “Halie, hiri nüh hama müthsü,” ta küza thuoüji, luoveh küütewa tü jüma mü thsülo? Noh kürholi no küpeh huowa tü jüma thsü müveh ülo? thi ma tü ma küüroh müzhe nü thuomtsüle nüh sanaveh ülo?

¹³Ehtsa, awejuh zhuluo, jüma tü mhie küm kenüh, thi noh nüh kümpo vü awelü vünüh awejuh küüsürü tü müngem.

¹⁴Kümahtsa tü noh kürholi vü jükümjie ti küsa thsüluo; noh nüh jüma phahra thuoüji kürule vü kenüh kümhie pehra naveh, thi noh küluozhe tü viküjawa nyu.

¹⁵Kümsüküsari nüh künyitsara kürhope huoküpeh kümjie müsa tümluo, ma zheh küvürie müsa tüm;

¹⁶küpakenühnyunü künyitsari tü türü keri külumwie ketünga tesühra leleti; thitü kümsüküsari thuoüji kümsü nüh khamlele mümti.

¹⁷Noh mükünongüwa küülu vü nyieramkhruo tüm; ma jih kümshü vü noh luoveh tü alomwie tüm;

¹⁸Vüwa nüh jüma ngu nü alomzhe nüh sa üsü nüh, thi ma vünüh ma rüküshuwa kürele tewa üsü nüh.

¹⁹Kümsüküsari kenüh noh mtsaza tüm, thi kümsüküsari no nü mümngu tüm;

²⁰küpakenühnyunü kümsüküsari tü küluozhe münyie luo; kümsüküsara lati tü zokünem tü naveh.

²¹Eh tsa, Vüwa thi kajiwa krü luo, thi masü küsü azhü nga müküvi müsa tüm;

²²küpakenühnyunü masü vünüh zhürüluo kümsü shuru mhie küm kenüh, thi masü vünüh küferie ru naveh ta küsa thawa nüh thsüveh lo?

²³Hamari nga aküthsürazhü phrahte. Alesa vü kümrhümze nü mümhie.

²⁴Kümsüküsawa vü, “Noh tü mükükhieh,” ta küüzawa tü, anyiri nüh müzü naveh, thi akuoküjiri nüh rhorha;

²⁵thitü kümsüküsari küshükeri thuoüji künolo peh naveh, thi akütsia kümhie tü mari vü peh naveh.

²⁶Kükato vünüh rüle kütsüwa thuoüji apomie kümetsü veh.

²⁷Alie vünüh noh küüroh küche luo, zanyo aveh nga noh kenüh azhih vünüh külieke luo; jüchih ünüh noh zheh saluo.

²⁸Ma zhühnyo münyie nüh noh zhephruwa povü müsa tüm, thi noh pomie vi mümra tüm.

²⁹Noh tü, “Ma nüh hi vü mowa satsü nüh hi nga ma vü jüti satü naveh; ma nüh mowa sanüh hi nüh anyiwa vü satsü le naveh,” ti müküza tüm.

³⁰Hi tü küliechura zhuh kütuoh vü, thi asemküsara rhelivizhuh kütuoh vü tsekari wa;

³¹thi nüh halie, jüma tü arüzhü nüh shophohm; azhuwa tü akhushu nüh pro, thi jüma azie loh wa zokhuom.

³²Jütiküsa vü hi nüh jüma no nü müsheno; hi nüh noküze thi küsüphie vira.

³³Pike zeh, pike küzheküngu, pike münyie nti ake shekhoke,

³⁴Kürühuri kümjih kümkhuotü noh vü ru naveh, thi rietsokrü küvüri kümjie rü